《踩過界》 李佳芯 清純學生妹vs夜蒲女神

由王浩信、蔡思貝、 李佳芯 (Ali)等主演的新劇《踩過界》喺剛過去的周末出街,各個角色造型都相當突出,不過最爆一定係Ali!昨晚一集佢着上貼身迷你裙化身夜蒲女神,又換上校服紥馬尾做氣質領袖生,天使與魔鬼一晚睇晒,觀眾都高呼:「不得了!」

李佳芯 扮清純學生妹

是咁的,劇情講述趙永洪學生時代開始已經暗戀Ali,不過一直都只遠觀而不褻玩,連對方叫咩名都唔知,所以就拜託做私家偵探的老友張振朗尋人!之後畫面開始出現趙永洪的回憶,見到做領袖生的Ali着住灰色校服,紥起馬尾,清純氣質出晒嚟,難怪趙永洪都大讚佢純過蒸餾水!

34歲的Ali扮學生妹完全冇違和感,仲搞到小編回想起學生時代的甜蜜回憶 (如果有的話)…

鏡頭一轉 變夜蒲女神

正所謂「女大十八變」,鏡頭一轉,那些年的清純領袖生已不復見,取而代之的,係夜蒲女神!學生皮鞋變高踭鞋、校服裙變紫色貼身迷你裙,長大後做法官的Ali私生活多姿多采,熱情奔放,喜愛夜蒲,身邊男士團團轉!

「邪花」系Ali回歸

「在橫行無忌舞池內,令全場圍住也應該…」火辣Ali玩得勁投入,表情勁享受,之後再嚟一個近鏡,香汗淋漓的Ali眼睛半開合,露出一個極嫵媚的眼神,觀眾大呼不得了!Ali之前喺《律政強人》及《與諜同謀》都係比較正經的角色,發揮一般,今次終於回歸觀眾最愛佢演的「邪花」系角色!

「兩個人玩我都ok嘅!」

最後Ali同張振朗離開夜店,後者仲話想大家去另一個地方,深入地了解一下,然後兩人一齊望住間酒店……

Ali之後話「兩個人玩我都ok嘅!」張振朗以為自己得米之際,Ali再補充:「不過唔係同你喎,至少唔係呢個moment!」咦,咁即係遲啲有機會?

全文完