《關你家事》肥媽哭揭被前夫家暴

May 31 - 16:04

江美儀、麥長青及林盛斌(Bob)主持的新節目《關你家事》將於下星期播出，節目極具話題性，內容講到「小三」、「出軌」及「家暴」等等尖銳的話題，節目更請來黃宇詩男友彭慶餘的前妻，現身爆料指被人搶老公！另外宣傳片又見到肥媽講到聲淚俱下，透露指自己曾遭家暴，未播已經引起全城討論！

全新節目《關你家事》

洪永城主持的《退休地圖》今個星期就播完，下星期同樣時間換上由江美儀及麥包等主持的《關你家事》，節目以探討時下家庭經常遇到的事情，如家暴、出軌、逃婚和遭拋棄等貼地話題，討論大家應該如何面對。其中更搵來藝人黃宇詩男友彭慶餘的前妻陳小姐，以過來人身份分享！

《關你家事》宣傳片中一大亮點，就係肥媽講到痛哭流淚的一幕！觀眾平時見到的都係肥媽強悍一面，或者同六號(陸浩明)嘻嘻哈哈教煮餸，你又點估到佢曾經係家暴主角？事緣18歲果時，肥媽嫁俾大過佢22年的菲律賓酒廊琴師，對方家境平俗，家庭經濟全靠肥媽支撐，養活一家八口。

肥媽透露前夫婚後一年即失業，每月攤大手板問佢攞錢，每次出糧都要成個糧袋都交俾對方，但每每未到月尾就已經花光。所以肥媽的子女們都勸佢離婚，認為如此下去肯定冇前途。肥媽仲話前夫曾偷食家中女傭，令對方懷孕，衰到冇人有！

以為咁樣做已經夠賤？低處未算低！當前夫覺得肥媽自力更生，佢就想完全控制肥媽，不時拳打腳踢，連刀仔都出埋！只求打到你服。好彩肥媽夠健碩，擋到幾下刀攻拳踢，不過咁做已經傷透佢心，更對小朋友造成好大影響。雖然已經過去多年，但肥媽在節目中重提呢段慘痛經歷時都忍唔住爆喊！

幸好肥媽現任老公Rick對佢極好，令佢重拾信心，現時肥媽有6個仔女、13個孫，得閒登台得閒弄孫為樂，總算苦盡甘來！