降魔的

《降魔的》大結局 小馬告別芷若 豪仔再現身

近日熱爆的無綫台慶劇《降魔的》昨晚大結局,小馬(馬國明飾)終於承擔起自己降魔的天命,與魔(黃智雯飾)及展明(黃子恆飾)決一死戰,成功殲滅兩人!但最後小馬決定放棄與心儀對象芷若(黃智雯分飾) 發展,獨自繼續降魔使命。同時大結局中出現兩個伏筆,究竟純粹係open-ended結局,定係有續集?

《降魔的》大結局

《降魔的》大結局一開頭又係以催淚情節打頭陣,小馬(馬國明飾)同已死的啤啤(劉佩玥飾) 來一場深情對話,啤啤再次向小馬表達自己的愛慕,但可惜兩人已陰陽相隔。一句「對不起」,一句「我知道」,講講下又係眼淚兩行,為大結局打開序幕。

小馬吻別芷若

小馬決心承擔起自己的使命,繼承兄弟石敢當(胡鴻鈞飾)的意志,誓要與魔(黃智雯飾)及展明(黃子恆飾)決一死戰!臨走前當然要同女神芷若(黃智雯分飾) 道別,講到自己以後唔會返嚟咁,芷若亦大感奇怪。

之後例牌要落場雨添點浪漫,小馬對芷若送上深深一吻,之後就忍痛離去!明明大家互相有意思,但就唔可以一齊,兩個人都好痛苦!

小馬展明決一死戰

小馬前去搵展明報仇,兩人齊齊去到魔製造的異空間,隨即展開殊死戰,展明連多重影分身術都出埋!

小馬本來處於下風,但後來佢將有降魔能力的血噴到展明一臉都係,對方即時無還擊之力,被小馬打到瞓低,腳更被竹枝插穿!

小馬殺死展明

魔現身命令小馬將展明殺死,以換來啤啤及有為(蔣志光飾) 的復活,然後小馬就用魔變出來的槍,狠下心將對方打死!

小馬水晶消滅魔

小馬將展明打死後,更投向魔的懷抱,捉實對方係咁咀,不過原來一切都係圈套!小馬此舉只係令魔分神,然後用石敢當化成的水晶加工子彈打中魔!

魔臨死當然都要死撐,稱小馬殺了人、作了孽,永遠都會受詛咒,永遠都唔會得到幸福!

降魔神槍出現

消滅咗兩大奸角,世界好快又回復和平,大家等咗好耐的降魔神槍終於出現!小馬如今已經係個降魔大師,幾隻小鬼被佢三兩下手勢就消滅,最緊要就係chok番個型仔樣啦!

魔之子將出世?

大結局去到尾聲出現咗兩個伏筆,首先係展明的前女友阿Ling (林凱恩飾) 再出現,更展現自己的紅眼,而佢身上懷有展明的骨肉,相信絕對係魔的化身!

能同渡多少春與秋 一千歲亦自覺不夠

另外大家最期待的畫面亦出現了,石敢當無再出現,反而係胡鴻鈞以豪仔的身分出現在小馬的車上,到底代表啲咩呢?就任憑大家想像了。

其實想愛你 欲斷不能離

咁小馬同莊醫生又如何呢?兩人久別重逢,芷若對小馬有意思係無庸置疑,可惜小馬因殺死展明而被詛咒,佢唔希望再連累身邊人,決定放棄與女神發展,獨自繼續降魔之路。