《 乘勝狙擊 》陳山聰咀吳岱融 放炸彈變放笑彈
廣告
由陳展鵬、陳山聰、林夏薇等主演嘅無綫劇《 乘勝狙擊 》今個星期大結局，劇情進入高潮階段，陳山聰奸到出汁，同陳展鵬正式兄弟反目！不過唔知係咪因爲要谷收視，所以近日情節重膠味又重口味，「爆」到令人咋舌之餘，仲有陳山聰及吳岱融上演一幕肉緊咀嘴戲，睇到觀眾個心都離一離！
圖片：myTV《乘勝狙擊》
陳山聰無限kiss 咀埋吳岱融
大家都知大台劇不時都有重口味情節，《乘勝狙擊》都唔例外！昨晚一集就講述奸到出汁嘅陳山聰成為咗狂人吳岱融嘅契仔，兩位奸人惺惺相惜，發表一番「感言」之後，吳岱融突然捧住陳山聰個頭，狠狠地啜陳山聰！ 喂，講還講，唔好咀嘴好喎！相信觀眾見到呢一幕，都應該唔知俾咩反應好。
向《教父》致敬
男男咀戲出街後，山聰接受訪問時表示，呢場咀戯其實係由吳岱融諗出嚟！佢表示類似情節其實喺經典電影《教父》都出現過，不過香港劇集應該係第一次！之後山聰又風騷地話咀女咀到厭，要咀吓啲「靚佬」！
其實陳山聰喺咀咀吳岱融之前，已經同劇中莊思敏無限kiss，同傅嘉莉都有親熱床戯！
我kiss！
床戯當然少不了！
無綫再派膠 陳山聰放炸彈bug位多多
講完男男咀戲，其實前晚一集都有笑位！劇情提及陳山聰師傅潘志文爲幫助陳展鵬奪回「股權轉讓書」，夜半潛入山聰寓所，仲唔知點解要帶埋女朋友張秀文着到靚一靚咁去。但深夜偷竊竟然電筒都冇，好在有… 手機燈囉！唔通佢哋有夜視能力？
「股權轉讓書」三兩下功夫就到手，潘志文同張秀文準備駕車逃走，但大魔王陳山聰早就喺在對方車上裝咗計時炸彈！由潘志文上車後開始倒數，得幾秒時間就會爆炸。好啦，過咗幾秒，炸彈無爆喎又，唔通壞咗？原來個「計時」炸彈係要用手機遙控，陳山聰拎咗部手機搖控引爆汽車炸彈。炸彈上面嘅時間，唔通係個鬧鐘，提醒陳山聰夠鐘炸死潘志文同張秀文？
潘志文張秀文 雙文上演「父女戀」
潘志文同張秀文一個66歲，一個29歲，不過就喺劇中飾演一對愛得黐纏嘅戀人，咁樣嘅「父女戀」真係唔係個個接受到。張秀文喺片中不時作性感打扮益街坊，經常稱潘志文爲「bb」，拍晒心口打情駡俏，好肉質呀！
全文完
