《 流行經典 》MLTR驚喜現身 蕭正楠孖曹永廉唱〈當年情〉

星期日播出的《 流行經典 50年》,每星期為大家帶來一張張久違的面孔,帶來一首又一首經典好歌,昨晚一集首次有外國樂隊擔任嘉賓,老牌丹麥樂隊Michael Learns To Rock (MLTR)驚喜現身!唱出經典名曲〈That’s Why You Go Away〉,以及改編自張學友名曲〈吻別〉的〈Take Me To Your Heart〉。另外仲有唔少熟悉的歌手朋友,包括羅敏莊唱出代表作〈挑戰者〉,以及蕭正楠、曹永廉合唱〈當年情〉!

Michael Learns To Rock 驚喜現身

Michael Learns To Rock在1988年成立,成軍至今近30年,在全球的唱片銷售量已經達到過千萬張。當年Michael Learns To Rock是由4名成員組成,不過成員Soren在2000年已經離團。其中〈That’s Why You Go Away〉在廿年前可謂紅極一時,即時在亞洲亦是無人不曉。有一定年紀的朋友,或者愛聽舊歌的年輕朋友們,都一定會聽過呢首經典!

MLTR八月開騷

Michael Learns To Rock三子在台上跟家燕姐等人閒談時,表示八月會在港開演唱會,並且會唱中文歌!之後三子跟歌手楊斯捷合唱改編自張學友〈吻別〉的〈Take Me To Your Heart〉,佢哋唱英文版,楊斯捷就唱原版普通話,掀起全場高潮!

羅敏莊演唱〈挑戰者〉

大家最近見到羅敏莊,可能都係佢同老公陳國邦及可愛女兒陳禛齊齊晒溫馨,不過呢日佢上台唱出代表作〈挑戰者〉,感情澎湃,聲線動人,好歌!

蕭正楠孖曹永廉唱〈當年情〉

蕭正楠近年拍唔少劇,幾乎令人唔記得佢係歌手出身,2002年時橫掃當年多個頒獎禮的新人獎!呢日佢孖住好兄弟曹永廉上台,合唱張國榮經典〈當年情〉,可以話係寶刀未老!其實蕭正楠近年都有唱唔少劇集主題曲,好似唱到街知巷聞的〈巨輪〉、〈一屋老友記〉同今年〈親親我好媽〉等,有一把好歌喉,希望佢除了拍劇外,都可以唱多啲歌啦!

全文完