《Do姐再Shopping》刪減片段曝光：10大爆笑金句回顧＋幕後花絮

爆笑位1：生命力好似曱甴

第一集去MORIPARK Outdoor Village一向鍾意做運動嘅Do姐即時露番兩手，化身Spider Woman攀石，陸永大讚Do姐：「嗰種生命力，真係好似曱甴！」

爆笑位2：驅魔式拱橋影封面

攀完石，Do姐仲有大把精力有就展現驚人嘅柔軟力做拱橋！勁嘅程度已經超越彭丹，而係驅魔人！C君仲大讚佢嘅姿勢可以影CD封面，講起瑜珈式CD封面，唔通係衛蘭嘅經典作？

爆笑位3：你以為你好多鈣質咩！

見住Do姐不停自我挑戰，陸永都忍唔住提佢小心，大叫「你以為你好多鈣質咩！」

爆笑位4：小心鈣質 正在流失

事實上，農夫對Do姐嘅鈣質情況真係好關心，去到第4集，都仲提佢要「小心鈣質！」不過睇片，似C君唔夠力多啲喎！

Do姐嘅成名作「鈣質舞」，都喺節目期間跳，睇佢咬晒唇咁，真係好enjoy！

爆笑位5:農夫狂頂撞Do姐

今集農夫瘋狂頂撞Do姐，大膽到窒到Do姐無聲出，互串絕對比佢哋單方面被鬧好笑！

爆笑位6:翠如自爆溝「正藍」

翠如bb雖然喺節目中表現唔突出，但第2集就一「溝」成名，自爆要溝藍色，畀咗大大個位C君入！

爆笑位7: 農夫瘋狂玩食字

作為食字高手，農夫每集都好多搞笑位，而且無論中、英文互食，都無難度！

爆笑位8 :農夫為筷子棄日本車

一對筷子同部日本車一樣貴，Do 姐就問農夫會揀收車定筷子？農夫就答「梗係收筷子啦，收車有咩用啫，又唔可以挾嘢食，收筷子就實用好多！」果然好有大志，認真爆笑！

爆笑位9: C君Do姐扮情侶

第4集Do姐同C君扮情侶，超級神似！陸永仲大爆Do姐迫佢要加入抱抱環節！果然夠「錫」農夫！

爆笑位10 翠如版：我讀Drama㗎！

翠如bb今輯表現位認真唔多，不過傻傻哋嘅樣子都好多網友鐘意，而節目中佢提到自己「畫畫世家」，好有自信可以估中畫紙價錢到最後錯晒，都令人諗起當年亞視百萬富翁的名句：我讀Drama㗎！

不過翠如bb 喺節目中不斷畀位農夫入，又不停被恥笑，包括有車牌但唔識揸車、唔飲得、攀石被Do姐K.O.、被嫌高音，都可以話係另一有趣位！

最新一集佢仲瘋狂「???」，又畀位Do姐農夫入啦！

《Do姐再Shopping》無出街花絮篇

《Do姐》每晚23：00節目完結之後，TVB不時都會放花絮，好多網友都反映花絮片段仲好睇過出街片！如果想睇返足本花絮，可以去TVB Facebook專頁、Big Big Channel，或者節目Instagram睇返，文末仲放齊咁多集花絮！

爆笑花絮1：陸永唔食「涼嘢」

第三集《Do姐》去到夕張食蜜瓜，Do姐就打算帶大家再試試富良野嘅蜜瓜，點知係咁畀Do姐埋怨投蜜瓜太高價嘅陸永就嬲豬，發脾氣話「我唔食涼嘢㗎！」笑到Do姐嘢都講唔到！

無出街花絮2：Do姐玩體罰 大膽Kiss陸永

陸永串完Do姐唔食涼嘢之後，Do姐就話會體罰陸永，C君隨即聯想到，唔通體罰就係要錫陸永？Do姐果然夠霸氣！

無出街花絮三：Do姐專用防狼絲襪

第一集《Do姐再Shopping》去到專賣山系用品的MORIPARK Outdoor Village ，4人大行日本高質山系用品，可以防水防UV防風，其中一條褲透明到好似絲襪咁，Do姐就好好奇係同來防咩？陸永妙回：「只要Do姐著咗，就可以防狼！」但Do姐就反而想買畀陸永著，唔通Do姐咁重口味⋯⋯

無出街花絮四：C君自爆 奴隸起家

去到介紹做outdoor爐具起家的品牌，C君突然回想起自己的身世，一時感性起來，大爆：「人哋係做爐具起家，我就做奴隸起家！」聞者傷心，Do姐聽到都忍唔住「嘖」咗佢一聲！

爆笑花絮五：Do姐「量子力學」教煮食！

Shopping完後，Do姐再帶大家去試戶外都可以煮到的美食，被翠如問到和牛點整時，擁有大智慧的Do姐講解教學：「總之我就整到啦！」農夫即時和應狠批翠如：「你咩都問嘅，不如問下量子力學！」

無出街花絮6：｜C君用pie計直徑

最後的甜品apple pie 賣相吸引，Do姐仲教大家點整。「首先要有apple，之後再有pie，成個就係apple pie！」C君雖然奴隸出身，都讀過下書，即刻聯想到「有PIE(π) 就可以計直徑」，果然好聰明！

無出街花絮7：｜陸夫賽馬式評述 翠如力保包尾

第一集Do姐大玩Mario Kart，雖然節目只係播咗幾分鐘，但網上有條分幾鐘的花絮仲好笑！無車牌嘅陸永有氣無力地評大家速度，呼籲「安全第一，友誼第二」，而一共有4個人嘅比賽，翠如都不負眾望，力保第4，無整唔見自己，好叻女啊！

無出街花絮8：｜Do姐情陷陸永

Do姐不時對陸永關愛有加，Camping花絮片中，仲突然地叫陸永做一字馬！突如其來的驚喜，令陸永覺得Do姐真係冧佢！「兩年前巴黎我已經覺得Do姐特別錫我，今次日本⋯⋯我覺得佢直頭係冧我！」

5大刪剪片段：

仲未笑夠？一於睇埋原片，分分鐘好笑過節目本身！去片：

佢哋喺北海道的時後去了小樽出名的朱古力店掃貨，今年喺香港都開咗分店，但小樽勝在可以任試，難怪Do姐食得咁開心啦！