小春1

一家三口內地爆紅 陳小春 應采兒 為搵錢煞停追女

由收收埋埋懶神秘冇樣見,到父子兵上陣北上拍綜藝真人騷,陳小春去年帶埋4歲仔Jasper參加第五季《爸爸去哪兒 》拍攝,收穫又點止3000萬人仔酬勞?首波花絮曝光,Jasper萌樣初露相,已經成功引起話題,備受注目;節目播出後更加因為Jasper陽光笑容、暖男個性同埋以柔制剛相處守則,唔止攻陷惡爸爸小春,更俘虜海量中港台粉絲。應采兒話就話新年願望最想生多個,小春亦都恨女恨到出晒面,不過寶貝仔帶挈人氣急升、廣告出騷叫價狂飆,生多個又要使多啲,決定煞停追女大計,食住個勢賺到夠再作打算!

撰文:東方新地

圖片:新傳媒圖片庫及網上圖片

小春 應采兒 殘樣出街

月中,趁住有假又碰巧好姊妹黃伊汶牛一,應采兒一家三口聯同 Yumiko、黃伊汶各自帶埋另一半同星二代齊齊出發去泰國蘇梅島豪遊慶祝。平時鍾意晒仔又愛晒恩愛,此行應采兒離奇低調,全靠好姊妹po相po片,玩足咁多日,竟然只上載一張黑超Jasper咁大把。皆因Jasper自《 爸爸去哪兒5 》後人氣同身價都升到頂點,寶貝仔萌樣有價又有市,更直接影響埋兩公婆接job叫價,當然今非昔比無謂露面太多。不過即使係一千零一張相,Jasper一日之內已經狂吸15萬like,完全係巨星級號召力。

小春
陳小春同應采兒做節目秤不離砣好恩愛,回到香港家中,兩公婆各有各忙。日前,本刊就拍到小春同應采兒分別去同一個商場Salon整頭髮。兩個全力搵錢,冇見一排殘咗好多,搵錢緊要,身體更加重要呀!
小春 應采兒
應采兒雖然冇化妝又街坊裝上陣,不過皮膚滑溜身型又標青,34歲仲好後生,追女仲可以等多幾年。

騷價叫高五倍

據知情人士透露,34歲應采兒同50歲陳小春結婚七年,一早就計劃趁住采兒後生、Jasper又開始獨立,三、四年後追多個女。不過人算不如天算,又話今年最大希望係再次懷孕、去到邊接受訪問都把「 生二胎 」掛在嘴邊,嘴裡想要身體卻很誠實,工作計劃排到年底,二胎惟有讓路等多兩年,知情者透露:「 小春靠《古惑仔》系列同幾首hit歌喺內地keep住有人氣,采兒話晒咁多年都係女主角,不過講到拍劇出騷叫價,兩公婆其實都係二線價,出騷一次大概20、30萬左右。自從《爸爸去哪兒5》之後小春最高叫過150萬一場跨年騷、兩公婆同場就另計,小春開頭拍綜藝節目《極速前進》都係800萬酬勞,依家想叫齊一家三口出動,已經升到5000萬人仔起跳,所以兩公婆疊埋心水搵埋呢轉再諗造人!」Jasper熱潮維持幾耐冇人知、家陣觀眾又善忘,接一個綜藝騷等於拍幾套劇價錢,依家有錢唔搵仲等幾時?

小春
難得有空在港一支公去醫肚同恤髮,50歲小春上鏡好似仲keep到,現真身就脹爆又有個幸福雙下巴。
應采兒 小春
小春出一轉街就係醫肚恤髮咁簡單,女人當然爭好遠,一樣係圓方,應采兒去完Salon又睇吓衫、試吓化妝品,長期滯留內地拍攝,回港立即掃貨。

應采兒 小春

賺到笑

應采兒早前約埋姊妹帶埋老公仔女去蘇梅旅行,Jasper一張相已經吸納15萬個like,至於微博話題,就高達14億。《爸爸去哪兒5》一播完,事隔半個月小春同采兒已經以夫妻檔參與另一個真人騷《三個院子》拍攝,據悉夫妻檔酬勞貼近父子檔。人氣急升後除咗綜藝節目亦有大量廣告商排隊搵上門,兩公婆最新演出係做番自己合體賣鉑金戒指。去年尾有傳本來騷價30萬的小春向台視跨年騷邀約提出150萬出場價,雖然被台視指獅子開大 口,依然無損高企人氣,更獲天后張惠妹邀請演出新歌MV。

小春 應采兒 Jasper
拍完套《爸爸去哪兒》,陳小春一家三口人氣急升,除咗因為兩公婆恩愛又玩得,亦都多得暖男萌爆Jasper唔少。
Jasper 小春
Jasper一張旅行相吸納15萬個like,微博話題更高達14億。
小春 應采兒
小春與采兒以夫妻檔拍真人騷《三個院子》,酬勞貼近父子檔。
應采兒 小春
人氣急升後,兩公婆最近仲做番自己,合體賣鉑金戒指。

恨女恨到發燒

小春在《爸爸去哪兒5》特別寵愛小泡芙,恨女恨到出晒面,其實應采兒亦都有心追多個,多次在採訪中表示想生多個女,又話18年最大願望係再懷孕。兩公婆參加《三個院子》錄影時,同圈中朋友閒話家常,應采兒曾再次斬釘截鐵話要再生。不過小春和應采兒兩公婆為趁Jasper熱潮搵多啲錢,工作計劃已排到年底,追女大計惟有等多兩年。

應采兒 小春
應采兒曾多次在採訪中表示想追多個女。
小春 應采兒
拍《三個院子》時,應采兒更斬釘截鐵話要再生。
Jasper 小春
《爸爸5》熱潮未減,周一(1月22日),應采兒上載Jasper最新圖片,原來去咗幫湖南衛視錄春晚。