TVB

不平等條約?環球 無綫再反面

 

環球 無綫再反面

因版稅問題,環球唱片曾跟無綫反面,不過之後再度合作。近日,有報道指兩間公司洽談三年續約一次嘅歌曲網絡使用權時,環球因不滿無綫加入一項條款,就係雙方不再續約後,無綫仍可永久使用環球歌手嘅歌曲網上播放,甚至包括海外嘅使用權,簡單啲講就係簽三年約就可以用一世,因此令續約一事陷入僵局!

 

眾星歌曲需下架

對此環球總經理譚先生表示,無綫開出條件難以接受:「環球達成唔到佢嘅條款,所以要求無綫喺合約到期後,將公司歌手所有歌曲下架。」而雙方份約於今年5月1日已經到期,即係以往無綫網絡平台用過環球嘅歌,如劇集主題曲、插曲都要全部下架,包括myTV SUPER、myTV等收費或者免費網絡頻道,而電視頻道則唔受影響。而環球唱片旗下寶麗金、EMI、新藝寶等唱片公司嘅歌手,包括張學友、陳慧琳、陳奕迅、李克勤、譚詠麟、許冠傑、陳百強、張國榮、王菲、Beyond等歌手嘅歌,於無綫網絡平台均需要下架!

 

陳年劇集歌亦要下架

例如2002年劇集《法網伊人》李克勤主唱主題曲〈不知不覺愛上你〉,因合約期限,喺myTV網絡平台都要下架!

 

盧冠廷唔擔心受影響

而下月開騷嘅環球唱片歌手盧冠廷,問到會否擔心少咗個宣傳渠道,表示:「唔擔心,你喺公司做嘢就係跟住公司方向做。(因為有新電視台同網上宣傳,所以唔驚?)都唔關事,我同公司合作得舒服咪跟住佢哋方向囉。」

 

如欲率先接收資訊,請讚好我們的FB專頁並於「已讚好」選單設定「搶先看」,多謝支持。

網址:www.facebook.com/orientalsundayhk