何雁詩DeepV落肚臍 鄭俊弘話任睇唔嬲
11月就從此被困做老襯的鄭俊弘,日前同何雁詩一齊上無綫節目《流行經典50年》,被問及未婚妻婚前最後一擊,為新歌拍MV時身穿大Deep V裙好性感,鄭俊弘話一啲都唔介意,仲猛讚好靚好特別。
撰文:東方新地



大Deep V 險走光
鄭俊弘同何雁詩呢對準新人會喺今年11月7日舉行婚禮,雖然未知到時疫情完結未,不過婚禮會如期舉行,呢排二人一邊忙住籌備婚事,一邊都要努力工作,日前佢哋帶埋雙方父母去揀中式禮服,何雁詩話著褂好好玩,鄭俊弘就笑言好似拍古裝咁!

何雁詩新歌MV疑真空上陣
27歲嘅何雁詩有個開物流公司嘅富爸爸,佢係家中獨女,家住市值5千萬嘅大埔滌濤山獨立屋,去年離開效力五年嘅星夢娛樂,有爸爸做大靠山照住轉做獨立歌手,仲喺疫情下出新歌,日前佢喺社交網上載拍攝新歌〈絕望時請點播〉嘅MV花絮短片,雖然條片得幾秒,但已經有亮點,皆因佢身穿Deep V碎花薄紗裙,胸前中門大開,個Deep V落到肚臍咁滯,疑似真空上陣,當時仲好大風,薄紗隨風飄揚,加上佢唱歌時狂抖大氣,心口位置不斷起伏,真係有機會走光,粉絲同好友陳瀅等留言讚佢索到爆,阿Bob林盛斌更意有所指表示:「如果再大風啲就好嘞!」何雁詩竟懵盛盛反問:「點解?」