余香凝

余香凝自爆與陳家樂分手一個月:冇消費佢、冇第三者

余香凝日前被踢爆背陳家樂偷食,暗交保險才俊新歡Victor Hui,本刊記者目擊余香凝凌晨送上門瘟新仔,連日在男家過夜!今日下午余香凝正式回覆傳媒,佢承認與家樂已分手一個月,強調當中並不涉及第三者,與Victor只係生意夥伴,最後又話從沒打算消費陳家樂!

撰文:東方新地|圖片:東方新地、Instagram

余香凝自爆與陳家樂分手一個月

事件曝光後,余香凝今日下午在寓所樓下接受傳媒訪問,親口解說與陳家樂分手一事。素顏的余香凝現身時面容憔悴,企定定給記者拍照時全程零笑容。余香凝首先向大家道歉,令家人、同事以及受影響的人擔心,佢承認與陳家樂已經分手差不多一個月,兩人拍拖數年,有啲位意見不合,無法達成共識,最後大家坐低傾過後,決定分開。

唔係消費陳家樂

余香凝續稱唔係有心呃大家,係因為大家最近都有好多工作,諗住待所有工作完成後先同大家講,絕對冇消費陳家樂的成份。

財政獨立

其次,余香凝表示自己係一個獨立的女仔,唔會用其他人錢、唔會貪名牌,畢業以來都係自己搵錢、自己養屋企人。強調自己同陳家樂絕對係財政獨立。

再次解釋與Victor關係

另外,余香凝再次強調分手並不涉及第三者,Victor只係一位認識已久的好朋友,最近兩人與其他生意夥伴夾份開食肆,食肆月尾就開張,事務十分繁忙。但余香凝嚟緊要離開香港工作一個月,所以凌晨工作完畢都配合其他人開會,開會時Victor家中有其屋企人、生意伙伴,絕對唔係得兩個人,同時為拖埋Victor落水感到唔好意思。

余香凝強調與Victor只係認識已久的好朋友

替陳家樂高興

對於陳家樂近日人氣急升,余香凝表示十分替對方高興,所以希望大家俾啲空間佢哋,專注事業發展。

事件重溫:

陳家樂憑《逆緣》入屋

現年31歲的陳家樂入行15年,當年參加新秀輾轉簽了英皇娛樂開始其演戲生涯,近年事業開始起飛,早前憑無綫劇《逆緣》中「冷凍爺爺」鍾定國一角成功入屋,工作機會不斷,可謂事業高峰!

陳家樂
陳家樂在《逆緣》飾演冷凍爺爺備受好評。
陳家樂
與兩位前輩姜大衛及黎耀祥擦出不少火花

揚言照顧余香凝一生

陳家樂除了事業順利,愛情同樣得意!陳家樂與余香凝於四年前合作拍港台劇《總有出頭天》擦出愛火花,拍拖近四年,人前人後表現恩愛!去年陳家樂駕車接女友放工不慎發生車禍,余香凝當場鼻骨爆裂,肉赤女友的陳家樂聲言會一生一世照顧女友,並送上鑽石戒指作為見證。

陳家樂
陳家樂與余香凝拍港台劇《總有出頭天》擦出愛火

陳家樂

早已認定對方

陳家樂曾不止一次在訪問中提及視余香凝為結婚對象,二人早已同居及互見家長,實是非卿不娶:「我係嘅!如果可以我係好希望一路行到組織家庭,至於得唔得就睇個天,希望我嘅付出可以做到,依家首期都未有,希望盡快展開人生下一個階段。嗰次撞車睇到佢係好強,我好緊張,反而係佢安慰我話佢冇事,叫我唔使擔心。」

去年3月 最後情人節

去年3月,陳家樂駕車接余香凝放工不慎撞車,女友傷鼻骨入院,陳家樂貼身照顧更承諾會照顧女友一世,二人感情穩定,男方一心向著結婚方向進發,今年情人節野餐慶祝,更互拍放上社交網晒恩愛。

情侶波衫

世界盃開鑼在即,陳家樂與余香凝齊齊穿上球衣放閃,余香凝早前喺活動上仲話會跟隨男友捧阿根廷隊!

獨家!余香凝背陳家樂偷食

24歲的余香凝身形高䠷思想成熟,入行以來除男友外零緋聞,今年初佢曾表示愛情至上:「愛情同麵包我會揀愛情,唔使要求對方有車有樓,就算同愛嘅人坐巴士都好滿足,今年生日我都係同陳家樂食雞煲啫,經過撞車事件,我哋感情更加穩固,大家冇乜錢都唔緊要,最重要係開心。」講到至死不渝又如何?遇上有米保險才俊,拜金余香凝現形即背男友偷食,一腳踏兩船!

上周一(4日), 余香凝在大角咀拍MV至凌晨3時許,離開時有製作單位安排的專車唔坐,獨自搭的士到Victor屋企。
Victor亦早已在樓下企定定等余香凝到來。

保險才俊新歡 曾媾星夢新女

據知余香凝趁陳家樂近月忙於工作,暗地撻著年約30歲、在AIA保險做高層的許焯倫(Victor),男方年輕有為醒目上進,余香凝左右逢源! 知情者透露本身有保險經紀牌的余香凝有唔少保險界朋友,呢位Victor之前追求星夢新女戴祖儀不果,所以目標轉向余香凝,並以大量名牌禮物打動女神芳心!

余香凝凌晨送上門至翌日下午三時先離開男家,一早call定車在樓下等,睡眼惺忪個樣殘爆上車。
從事保險公司高層,返工時間有彈性的Victor在余香凝離開後半小時步出寓所,雖然著到官仔骨骨,不過個樣唔多精神,有女陪過夜都唔使去到咁盡㗎!

呢位就係據稱Victor之前追唔到的戴祖儀。

騎牛搵馬系列

16歲入行做模特兒發明星夢的余香凝,去年憑電影《骨妹》在澳門國際影展奪得「最佳新演員獎」後成為影壇新貴,與無家底事業剛起步的陳家樂拍拖,明顯是騎牛搵馬。新仔Victor從事保險業數年,高大靚仔又識氹客仔,很快便攀升至年薪過百萬的經理級。

呢日Victor返完AIA位於九龍灣的大本營,再落尖沙嘴為即將開業的日本燒肉店打點,見佢親力親為搬雜物,幹勁十足。

Victor家住觀塘半山舊式私樓,有車有樓,又與友人在尖沙咀合資開日本燒肉店。拜金余香凝極速見有老闆娘做,又被Victor貴價名牌禮物攻陷,即刻碼實送上門,完全唔念舊情!

做完正經事,Victor就到超市買餸煮飯冧女,然後搭的士返屋企。

花心女兩邊瞞

為咗掩飾一腳踏兩船,據悉余香凝同Victor講早已同家樂分手,不過因為顧及形象唔可以公開,故Victor一直配合女方低調,人多公開場合都保持距離,親密嘢就返屋企先做!至於家樂方面,近日佢埋頭搵銀,同余香凝見面時間極少,女友掛住瘟新仔都懵然不知…

Victor返歸唔夠半個鐘,余香凝校啱時間出現,可以自由拍卡出入又同看更熟晒,好明顯偷情日子唔短!

餐餐外賣趕撲火

上周日(10日),余香凝與Victor雙雙從寓所外出,餐餐買外賣返屋企爭取時間纏綿。現場所見,余香凝每次與Victor同行都非常小心,戴上口罩以免被途人認出,遇上有住客眼望望,二人即前後腳入𨋢好鬼祟。

話明偷食當然唔見得光,二人行去附近屋邨的連鎖快餐店買外賣飯盒,一 人一袋各有各拎。
余香凝與新仔出外一直保持距離,不過回程見附近人少即互相逗玩,Victor伸脷扮鬼扮馬。
隔住口罩都見到余香凝笑到腰果眼。

余香凝同Victor日頭食完飯盒返歸纏綿,夜晚再出動覓食補充體力,先去落單買Pizza,然後再去超市狂掃糧餉。

現場所見,佢哋每遇途人眼望望,即前後腳扮唔識,余香凝緊隨Victor身後返回寓所,繼續二人世界。

暫結束瘟仔生活

由6月4日至6月11日,余香凝都在Victor家過夜,至周二(11日)下午,余香凝終於捨得暫別新仔,二人一同離開寓所後即跳上的士,到達尖沙咀後分道揚鑣。余香凝去健身美容再與友人晚飯直落慶祝生日。連著多日粉藍色裙與白色波鞋的余香凝,終於捨得返回大圍公屋娘家。

年薪過百萬有車有樓

余香凝新歡Victor在 AIA 任高級保險經理,為人進取有頭腦,年薪過百萬,在香港土生土長有車有樓,在其 IG 內有不少生活照,可見其生活尚算健康。平時喜歡與好友出外旅行及參與各種運動,不過閒時亦會唱K劈酒消遣,與一般時下年輕人生活無異。雖然已媾到余香凝,但佢仍以獨身宅男自居,未有在社交網洩露感情狀況。

Victor位於觀塘半山的舊式私樓屬自資物業,以往佢不時約三五知己返屋企打機玩樂,居高臨下背山面海,難怪余香凝唔捨得走啦!

陳家樂含淚回應…

余香凝差不多成個星期都在新仔家風流快活,沒半點失落之情,只有陳家樂默默悼念逝去的三年多感情。早前(6月12日)陳家樂在中環回應本刊記者,對余香凝一心一意的家樂知悉女方連日在新仔寓所過夜,悲痛到一度講唔到嘢,情緒激動轉身拭淚,其後哽咽認分手…

記者遞上余香凝新歡的照片,陳家樂表示唔認識對方。

陳家樂含淚道:「我哋最近分咗手⋯⋯呢排已經冇聯絡,(邊個提出分手? 係咪好傷心好難接受?)我哋一齊坐低傾 ⋯⋯有共識!」

「希望大家畀啲空間我。」

傷感的家樂未有正面回應是否第三者介入,只連番抖大氣說:「希望大家畀啲空間我。」三年感情話變就變,希望家樂化悲傷為力量,將來一定有更好的回報,圈中又多一個孝順又用情專一的筍盤,大把女神排隊等緊喎!