兄弟大茶飯

【兄弟大茶飯】抵死有味對白逐格睇!楊千嬅寸牛扒太硬:你唔𡁻吓對鞋

由蕭正楠和曹永廉主持嘅綜藝節目《兄弟大茶飯》星期一晚上十點半開播,喺播出第1、2集內容是佢兩兄弟夾手夾腳炮製大堆美食,畀一班藝人品嚐,今次唔係佢哋第一次合作做主持,在較早前旅遊綜藝節目《公公出埠》上都合作過,但明顯今次有默契多咗,當中不乏抵死對白,而且仲成日有意無意講大有味嘢!好唔好笑?見人見智啦⋯⋯

撰文:東方新地 |圖片:《兄弟大茶飯》截圖


抵死對白逐格睇!

玩寸汪明荃

第1集,一開始蕭、曹話要喺公司搵兩位女助手幫佢哋手,二人拎無綫台柱汪明荃來講笑,唔止搞阿姐儲物櫃,仲話要佢做助手!

之後又點名搵謝雪心,膽生毛呀!點完一輪至話搵胡美貽,阿曹居然將個貽字識成「軚」,之後蕭正楠更正讀「兒」字音!

嘲阿廉老餅

雜貨店老板指煮滷水要落甘草時,蕭正楠即對住曹永廉講:「即係加埋你!」

叫魚檔老闆配眼鏡

兩位靚女喺魚檔放晒生電問老闆啲鮑魚可唔可以平啲?老闆話減$40啦,蕭正楠聽到即話:「咁嘅樣都平到$40,你配番副眼鏡啦你!」好衰呀!


阿廉最叻洗「鮑魚」

喺檔口買咗啲鮑魚返去,兩人埋頭用牙刷洗擦,蕭正楠話曹永廉:「洗鮑魚,你最叻!」


阿廉話:「一路洗一路有黑水出!會唔會洗得太乾淨,人哋唔覺得係鮑魚?用洗潔精啦好冇⋯」

「起」得快?夠持久?

二人介紹用雞蛋仔夾雪糕,名為「冰火卜卜脆」,蕭正楠笑淫淫話:「冰火,你至鍾意啦!」之後蕭正楠用攪拌機打練奶、鮮奶同雲尼嗱油自製雪糕,曹永廉話:「要打到佢起晒,要啲時間喎!我起就耐啲囉!你起就快啲⋯」蕭正楠話:「係,我起就快啲!」阿廉補充話:但係我起完就耐啲,keep好耐!」

 

 



阿廉冇「不舉」?

去到Canteen,二人要倒啲冰塊做冰鎮生果涼粉,蕭正楠笑阿廉:「咦!舉得起喎!」阿廉話:「唔得!幫幫手⋯⋯得得得!舉得起!唔使幫!」

玩粗口諧音

嘉賓林夏薇試食二人親手整的滷水牛腱後,話:「幾好喎!你滷㗎?」蕭正楠就指住曹永廉笑住話:「老嘢滷嘅!」曹永廉聽完後反擊:「你滷味!」公然玩粗口諧音!


馮盈盈高呼:「我要黑鮑!黑鮑⋯」

蕭正楠和曹永廉準備咗大堆美食畀藝員食,當日TVB喺Canteen搞咗《Amazing Summer》活動,所以有大批藝員出席,而阿蕭同阿曹在攤位上供應美食,好似雞蛋仔、自製雪糕、茶葉蛋、醉雞翼、鴨腎、炆鮑魚等,好豐富!


其中馮盈盈見到攤位的鮑魚﹐立即雙眼發光,出手突破重重人群行上去搶吃⋯


第2集,蕭正楠和曹永廉去到《多功能老婆》拍攝現場,二人整咗溫泉蛋海膽飯、香草斧頭扒同小吃請一班演員食,監製陳寶華、女主角楊千嬅、周柏豪、黃浩然、陳煒、吳若希等食嘢,嗰日三十幾,佢哋一見到咁多食物放喺烈日當空下,都第一時間問乾唔乾淨、食唔食得!


楊千嬅嫌牛扒太硬:你唔𡁻吓對鞋!

見到阿廉即場煮牛扒,原來係煮好再翻熱,千嬅都皺晒眉,之後切開食入口,忍唔住話好靭,黃浩然話自己嗰塊唔靱,問千嬅係咪冇牙,千嬅忍唔住話:「你係咪玩嘢呀?鞋底都冇呢個咁硬啦!你唔嚼吓對鞋!」其實睇黃浩然要扯牛個樣,真係好靱!


直腸直肚嘅千嬅講完,黃浩然都忍唔住笑!


之後佢哋又話啲糖水用上鱈魚膠,千嬅含住嚿牛扒問:「乜膠話?」又大讚佢哋了解食材!

魯振順:咁多Budget?

TVB出名慳皮,但呢集買大大塊斧頭扒、花膠做糖水,仲要買咗好多板新鮮海膽整溫泉蛋海膽飯,魯振順同王梓軒食海膽時就話:「好重手喎!」魯振順問:「咩節目嚟?咁多Budget嘅!」