初出道被指似金城武 Shine黃又南：我唔介意人話似

Shine 一張紙巾打開話題

被問到點解當初要組成Shine，唔單飛發展？天佑話冇諗過咁多：「嗰時淨係覺得有得做就得，同埋覺得玩咋嘛，都唔知咩為之做歌手，頭嗰年每日都好新鮮，一路都係咁玩。」講到第一次見面嘅情形，天佑就話：「嗰時一大班人試音，當中見到又南，我就問佢借紙巾，因為全場好多人，個個都好戰鬥格，唯獨佢坐喺度唔出聲，我覺得佢好似好傾啲！」又南笑言：「我心諗咁多女仔喺度，點解問我呢個男仔有冇紙巾？咁啱我真係有！由一張紙巾開始，大家就開始傾偈，原來大家玩嘅嘢都差唔多，都鍾意打桌球、籃球、踩板 ⋯⋯嗰時經理人亦都知道呢兩個熟喎，跟住就送我哋去日本讀書，一齊住咗半年，到正式出道之後，去台灣又一齊住，已經唔係普通了解，係適應埋大家嘅生活。」

曾是金城武師弟

對於一出道，天佑就被指似郭富城，又南就似金城武，又南表示：「金城武嗰時真係好紅，嗰時我哋十五歲啱啱簽畀經理人，同台灣福隆係同一間公司，好記得去台灣嗰次我好攰瞓著咗，一擘大眼，見到金城武企咗喺我前面，我即刻醒晒，佢好nice，話:『沒事，你睡吧！』我記得嗰時佢落一落公司，但係上唔返嚟，喺樓下畀人包圍住，我覺得有佢咁成功，我唔介意人話似！」而天佑就話「我開心㗎，郭富城啲歌我細個都有聽。《父子》我做過佢個仔，我啱啱拍《風再起時》就做城城後生版，係佢有份叫我做！」

攞金獎未識飄飄然

Shine一出道攞晒所有金獎，問佢哋當時有冇飄飄然？天佑話：「嗰時未識飄飄然，個心態係玩，都唔覺得做緊嘢，冇呢個感覺！」又南就指當時佢哋仍然好似普通人一樣：「出街去尖沙咀飲完嘢，就行去旺角，經過見到自己張海報喎，好開心！但唔識飄飄然，嗰時我住筲箕灣，天佑住粉嶺，大家坐亡命快車各自返屋企。」天佑補充：「如果依家冇機位，我哋都可以搭經濟位，當然長途就最好唔好啦！」