s1 fi

初出道被指似金城武 Shine黃又南:我唔介意人話似

Shine黃又南和徐天佑成軍15年,原來緣起於一次借紙巾事件,而講到兩人初出道時被指似金城武和郭富城,又南大讚金城武真人好nice:「有佢咁成功,我唔介意人話似!」而天佑亦話好開心似郭富城:「佢啲歌我細個都有聽!」

撰文:東方新地

圖片:新傳媒圖片庫

Shine 一張紙巾打開話題

被問到點解當初要組成Shine,唔單飛發展?天佑話冇諗過咁多:「嗰時淨係覺得有得做就得,同埋覺得玩咋嘛,都唔知咩為之做歌手,頭嗰年每日都好新鮮,一路都係咁玩。」講到第一次見面嘅情形,天佑就話:「嗰時一大班人試音,當中見到又南,我就問佢借紙巾,因為全場好多人,個個都好戰鬥格,唯獨佢坐喺度唔出聲,我覺得佢好似好傾啲!」又南笑言:「我心諗咁多女仔喺度,點解問我呢個男仔有冇紙巾?咁啱我真係有!由一張紙巾開始,大家就開始傾偈, 原來大家玩嘅嘢都差唔多,都鍾意打桌球、籃球、踩板 ⋯⋯嗰時經理人亦都知道呢兩個熟喎,跟住就送我哋去日本讀書,一齊住咗半年,到正式出道之後, 去台灣又一齊住,已經唔係普通了解,係適應埋大家嘅生活。」

Shine
天佑在試音時主動向又南搭訕,原來係因為見佢坐喺度唔出聲,覺得佢好傾啲。
Shine
開始傾偈後, 兩人發覺大家興趣相投,都鍾意打桌球、籃球、踩板,之後一齊去日本讀書,去台灣又一齊住,兩兄弟感情愈來愈好。
Shine
天佑指初出道時和又南勁friend,直頭做完嘢都會一齊玩,但玩咗幾年,開始各自有自己朋友,依家關係已經唔係出嚟玩嗰啲,但大家有啲咩,大家都會知。

曾是金城武師弟

對於一出道,天佑就被指似郭富城,又南就似金城武,又南表示:「金城武嗰時真係好紅,嗰時我哋十五歲啱啱簽畀經理人,同台灣福隆係同一間公司,好記得去台灣嗰次我好攰瞓著咗,一擘大眼,見到金城武企咗喺我前面,我即刻醒晒,佢好nice,話:『沒事,你睡吧!』我記得嗰時佢落一落公司,但係上唔返嚟,喺樓下畀人包圍住,我覺得有佢咁成功,我唔介意人話似!」而天佑就話「我開心㗎,郭富城啲歌我細個都有聽。《父子》我做過佢個仔,我啱啱拍《 風再起時 》就做城城後生版,係佢有份叫我做!」

Shine
又南初出道就被指貌似金城武,原來兩人曾是同門師兄弟。
Shine
而天佑就咁多年來都被指是郭富城翻版。
Shine
最近天佑被郭富城欽點在新片中演年輕版,又南笑說:「你走唔甩㗎嘞,以後佢都會搵你!」

攞金獎 未識飄飄然

Shine一出道攞晒所有金獎,問佢哋當時有冇飄飄然?天佑話:「嗰時未識飄飄然,個心態係玩,都唔覺得做緊嘢,冇呢個感覺!」又南就指當時佢哋仍然好似普通人一樣:「出街去尖沙咀飲完嘢,就行去旺角,經過見到自己張海報喎,好開心!但唔識飄飄然,嗰時我住筲箕灣,天佑住粉嶺,大家坐亡命快車各自返屋企。」天佑補充:「如果依家冇機位,我哋都可以搭經濟位,當然長途就最好唔好啦!」

Shine
Shine剛踏入十六週年,天佑和又南話多謝大家一直嘅支持。
Shine
在分開五年各自單飛後,近期Shine重新合體,經常一齊工作。
Shine
今年3月Shine將再踏紅館,舉行第二次《Shine Moments Live 2018》紅館演唱會。

下一頁:《2018國際中華小姐競選》佳麗一覽