劉華停工陪產 傳朱麗倩有喜四個月
現年50歲朱麗倩於2012年為劉德華誕下女兒劉向蕙(Hanna)後，劉華一直以來好恨追多個仔，希望湊個好字！近日，有報道指朱麗倩以人工受孕方式追子，試足兩年後終於有喜四個月！恭喜恭喜！
有指朱麗倩上月陀住三個月B仔，帶埋女兒Hanna返大馬拜祭外公外婆，順便搵當地法師一齊誦經為BB祈福。而現陀B四個月嘅朱麗倩，日前更被影到肚凸凸穿鬆身裙、戴住口罩去九龍城，由助手同保鏢陪同下，到海味鋪掃貨。
其實，自從女兒Hanna滿一歲後，朱麗倩定時搵生殖科專家蘇偉基，安排進行人工受孕，雖然曾經歷多次失敗，但朱麗倩仍不放棄，每次等半個月後再試，據知劉華唔想老婆咁辛苦，表示試到50歲唔成功就算，點知試足兩年，終得償所願！此外，篤信地藏王菩薩嘅劉華及朱麗倩，亦會到筲箕灣誠心拜佛求子！
對於太太再有喜，劉華表示：「冇回應，謝謝關心！」雖然劉華非首次做爸爸，但心情依然好緊張，有傳佢下月拍完新片《拆彈專家》後，就會全面停工，專心湊女陪老婆產子。而最近劉華唔使開工，陪太太之外，亦親自接送愛女Hanna返學，更陪女兒做功課、玩耍及睡午覺，好讓太太專心安胎，認真係好爸爸！
如欲率先接收資訊，請讚好我們的FB專頁並於「已讚好」選單設定「搶先看」，多謝支持。
