Featuregolden

點止〈今期流行〉!睇片回顧古天樂八大經典金曲!

最近向古天樂經典歌曲〈今期流行〉致敬嘅新廣告歌〈幾時都流行〉於網上大紅,令小編忍唔住去回味吓古天樂以往嘅金曲!唔講未必知,原來當年古仔仲攞過無綫十大勁歌金曲頒獎典禮嘅最受歡迎男新人獎金獎,咁威威!好嘢唔私藏,一齊嚟重溫吓呢八首經典金曲啦!
撰文:東方新地 | 圖片:YouTube、新傳媒資料庫、TVB劇照

回顧古天樂八大經典金曲

古天樂活躍喺樂壇嘅時間雖然僅於2000年至2003年約三年,但都推出過《男朋友》、《今期流行》、《樂天》、《Mr. Cool》共4張個人唱片,令大家記憶深刻嘅歌曲唔少㗎!雖則唱功就有很大進步空間嘅,但唔知點解真係聽開有鋪癮!

1. 〈今期流行〉

呢首近期又重新開始瘋傳嘅金曲當然要入選啦!同時呢首歌都係古仔嘅代表作,洗腦旋律加上容易上口嘅歌詞,難怪大家都識唱!

再次爆紅都係因為呢個新嘅「百老匯電器」廣告
再次爆紅都係因為呢個新嘅「百老匯電器」廣告

當年被肥姐恥笑嘅「拜神舞」,真係估唔到今時今日會再次紅到街知巷聞⋯⋯

肥姐說得是⋯⋯

「Keep住流行,流行椎名林樆」~依家連㗎妹都識唱啦!

仲有網民將古天樂拍《星球大戰》嘅產品廣告Crossover〈今期流行〉,零違和感啊!

2. 〈男朋友〉

要小編揀,第二首一定係古天樂當年樂壇出道成名作〈男朋友〉,仲攞埋新城勁爆歌曲獎添!由伍樂城作曲,林夕填詞,其實首歌都真係幾得!就算依家都間唔中會喺Instagram見到有人會用啲歌詞嚟做Caption㗎⋯⋯

「回答我可不可以暫時讓我 講出感覺後 才直說你有男朋友 現在就要走」~~~

3.〈天命最高〉

呢首歌係古天樂喺TVB嘅代表劇作《尋秦記》嘅主題曲,亦係古仔少有嘅電視劇主題曲。無論係套劇定係首歌都係經典啊!

誰求誰 春秋都只聽天地號令~
仲有當年好Pure好True嘅林峯~
又係重播必睇系列!

〈天命最高〉由趙增熹,林夕作詞,收錄在《樂天》一碟。

4. 〈像我這一種男人〉

作曲黃尚偉,同樣係林夕填詞!

5. 〈Mr. Cool〉

「主演Mr. Cool 我笑我不在乎」~~~ 可能係因為首歌由古仔演唱,真係好有型!

6. 〈暗戀王〉

聽名可能大家唔知呢首係咩歌,但係一唱「自從峨嵋山上見到你,我好想飛鵝山上見翻你,會將我啲身家俾埋你,但你身份很神秘」,大家可能就會諗起古天樂喺電影《百年好合》入面為咗鄭秀文唱嘅歌!

7. 〈月亮代表我的心

為咗電影《殺破狼‧貪狼》,古天樂開金口同內地藝人吳樾合唱《月亮代表我的心》,係電影嘅點題歌曲。重點係咩?係古天樂唱國語啊!!!

受訪時,古仔解釋話其實係監製黃柏高提出嘅建議,撮合咗佢同吳樾嘅合唱!

另一個重點係古天樂就係憑電影《殺破狼‧貪狼》喺2018年勇奪香港電影金像獎最佳男主角啊!

《殺破狼‧貪狼》劇照
古天樂
《殺破狼‧貪狼》劇照

8. 〈當年情〉

最後一首歌其實係最令小編觸動嘅歌!2016年時,古天樂同古巨基一齊重唱哥哥張國榮嘅金曲《當年情》,懷念哥哥60歲冥壽,感謝哥哥嘅提拔之情。原來「雙古」都係好朋友嚟㗎~

古仔唱得好有感情㗎!之前幫老友鄭秀文演唱會做嘉賓時,亦有喺現場演唱〈當年情〉,令唔少觀眾都想古仔可以真係喺紅館開演唱會啊!