koo

古巨基玩busking 千人逼爆銅鑼灣

古巨基喺剛過去嘅周日同保險公司到銅鑼灣行人專用區玩busking,一般嚟講,busking都係得兩三人,四丁人都已經叫做多,但今次基仔就一拖十二,keyboard、結他、鼓手、bass、大小提琴,仲有非洲鼓!加埋圍觀、企埋入商場嘅過千途人,塞爆咗成個銅鑼灣行人專用區!
撰文:東方新地

古巨基:畀大家嘅熱情融化咗!

今次busking嘅樂手原來就係基仔演唱會陣容,當中最特別嘅係出現咗三代同堂同場夾band:爺爺玩percussion、爸爸負責彈結他、五歲嘅孫仔就打鼓,係有型嘅!講番點解今次咁「叠馬」,係咪因為第一次busking,要人壯膽?基仔話:「一係唔做,一做就要做到最好!今次都特登邀請咗一個busker,希望可以同唔同範疇嘅樂手合作,睇吓會唔會擦出新火花。平時大家都係隔住電腦mon或者電視螢光幕見到我,今次第一次busking,見到咁多人支持自己,好開心,畀大家嘅熱情融化咗呀!」

古巨基
基仔話當日唔止啲觀眾High,佢哋隊band都好High!
古巨基
圍觀嘅粉絲多達過千人,塞爆成個銅鑼灣行人專用區!
古巨基
基仔背後嘅樂手來自佢演唱會陣容,當中最特別嘅係出現咗三代同堂同場夾band嘅陳氏一家,爺爺玩percussion、爸爸彈結他、五歲嘅孫仔就負責打鼓!
古巨基

High唱「兒歌版」勁歌金曲

基仔現場唱咗三首歌,打頭陣嘅係〈友共情〉,之後就唱出保險公司微電影廣告歌〈初心〉,最後就嚟一首「兒歌版」勁歌金曲,將〈至net小人類〉、〈黃金戰士〉、〈忍者小靈精〉、〈美少女戰士〉等,橫跨幾十年嘅兒歌一炮過唱晒出嚟,聽到大家嘅童年回憶同初心番晒嚟,仲一齊跟住唱𠻹。

古巨基
基仔一炮過將橫跨幾十年嘅兒歌唱晒出嚟,聽到大家嘅童年回憶同初心都番晒嚟!
古巨基
基仔話今次係佢第一次做busking,一係唔做,一做就要做到最好!
古巨基
現場仲吸引咗好多小朋友粉絲𠻹!

即與獻唱〈藍天與白雲〉

唱完三首歌後,現場圍觀數千個觀眾唔肯走,不停大叫encore,唔知以為去咗紅館!出名錫fans嘅基仔當然有求必應,問大家想聽邊首,有觀眾大嗌:「〈藍天與白雲〉!」雖然基仔冇準備過,不過都即刻唱晒成首,呢啲咪有料囉!

古巨基
基仔原本想同粉絲say bye,不過聽到粉絲嗌encore,基仔都有求必應!
古巨基
基仔問大家想聽邊首歌?有觀眾大嗌:「〈藍天與白雲〉!」
古巨基
雖然事先冇準備過,但基仔都即刻唱晒成首〈藍天與白雲〉。