吳雨霏

吳雨霏挺6個月肚 出山去主題公園做導遊

31歲吳雨霏(Kary)早前喺社交網宣佈懷孕,由於Kary早年曾經小產,謹慎起見,Kary陀B後全面停工,只在IG為品牌宣傳,為安胎未有公開露面。不過日前Kary挺6個月肚出山去主題公園做導遊,原來都係為慈善,真係人靚心善!

撰文:東方新地 相片:ngk@IG

吳雨霏 挺6個月肚做導遊

兩個月前公布成功陀B嘅Kary吳雨霏,立即停工安胎,一直未有公開露面,眨吓眼已經六個月,Kary唔係日日坐響屋企等食養胎,反而係趁有時間去做慈善工作,早幾日Kary做導遊,陪一班由蒙古嚟嘅中學生去玩,原來呢班來自蒙古嘅學生,係舊年十月Kary去當地探訪時識嘅。Kary po咗啲帶隊去主題公園嘅相,相中的Kary一身便服挺住巨肚,不過手臉都未見有腫,佢同大家當日玩得好盡興,Kary盡地主之誼,自己亦相當投入,不時跟卡通人物合照。Kary仲話自己睇見啲小朋友玩得咁開心,自己個心都溶晒﹗Kary粗身大世都做慈善都不遺餘力,呢啲就係最好嘅胎教﹗

吳雨霏
吳雨霏肚凸凸,身懷六個月身孕,但手腳同面都未見腫,得天獨厚,呢啲應該係人美心善。
吳雨霏
Kary同來自蒙古嘅學生玩得好盡興,大家打成一片。

同卡通人物影合照,Kary動作多多,陀住B都相當靈活。
吳雨霏

吳雨霏 宣布懷孕5個月

31歲吳雨霏(Kary)曾經小產,幸好有老公洪立熙(Brian)在身邊扶持,走出傷痛。早前Kary正式宣佈懷孕,在Instagram晒出「一家三口」相,並透露已有咗五個月,留言話兩公婆快要當爸爸媽媽,並多謝大家的祝福!

吳雨霏
吳雨霏透過唱片公司回應,指收到很多朋友的短訊祝福,謝謝各位媒體朋友的愛和關心。

吳雨霏心情大靚 大展零孕味衣著

正專心養胎嘅吳雨霏早前喺IG分享一張近照,並透露而家懷孕心情「心情好 甚麼都好 #星期一不blue #goodvibesonly」相中吳雨霏戴上黑超,仲着上黑色短袖卡通Tee大擺甫士,睇得出作為大肚婆嘅佢除咗型到爆之餘,心情真係相當靚啵!唔知係咪着呢件黑衫遮得好,就算個foucs 容易會放左肚個位置嘅公仔到都好,個肚都唔算話好現形,難怪粉絲見到都要讚吳雨霏索咗兼有型!

著黑T嘅吳雨霏完全零孕味!

吳雨霏大肚身形依然纖瘦

計番依家吳雨霏佗B接近六個月,但睇落佢雙手仲係好幼,口腫面腫現象冇出現之外,面形依然keep得好靚。無論係著住白色定黑色t-shirt嘅吳雨霏,個肚睇落都只係微微隆起,佗B可以佗到咁fit認真羨慕死人‌~

著住白T一樣唔太顯肚。

16年曾經小產

吳雨霏(Kary)在2016年被傳小產,惟新聞爆出後Kary一路冇承認及否認,直至同年11月3日Kary終於在社交網站首度為事件開腔,與老公洪立熙(Brian)發表一篇長文章講述小產經過、發生不幸的事後兩夫婦如何一起走過黑暗的日子,及再期待小生命的降臨!

其實Kary和Brian兩公婆都好鍾意小朋友,兩人2015年1月在美國註冊,7月意大利行禮,2016年2月成功陀B,但懷胎個多月不幸流產,令一直恨做媽媽的Kary大受打擊,一直停工休息,而Brian亦放下工作陪Kary度假散心。經過大半年休養,Kary終於收拾心情,身體已回復最佳狀態,兩公婆早前趁住假期飛到有蜜月聖地之稱的北海道二世古,再度開行turbo造人!

去完二世古再度蜜月,Kary繼續同老公朝夕相對,又跟老公到跑馬地一間日本餐廳撐枱腳,Kary要調理身體,食清淡的日本菜就最啱。而為生B Kary亦開始谷肥自己,叫到成枱食物,食到唔停口,身型亦唔再得棚骨,有番肉地,做足準備催孕!

食完晚飯離開餐廳去取車,雖然只是一條街之隔,但兩公婆在街頭纏綿,時而十指緊扣,時而攬到實如連體嬰,煙韌到爆!上車前Kary更忽然舞癮起,站在車邊手舞足蹈,氹到Brian即場哈哈大笑,超sweet!祝福Kary生個肥肥白白嘅BB,展開人生新一頁!

關鍵詞
吳雨霏