喜劇

盤點歷年10大經典喜劇 周星馳嗰啲都未係最搞笑!?

講到經典喜劇,相信大家第一時間都會諗起星爺嘅電影,但喺一眾班巴打心目中,似乎仲有比星爺嗰啲更加搞笑嘅電影喎,唔知係啲咩戲呢?

撰文:占士、酒啊九叔│圖片來源:電影海報、電影截圖│編輯:占士

網民盤點10大經典喜劇

周星馳嗰啲都未係最搞笑!?

一套戲搞唔搞笑真係見人見智,畢竟你覺得好笑嘅,其他人未必都認同,不過有啲喜劇就真係無論邊個睇都會笑餐死,到底巴打們公認覺得最搞笑嘅10套戲會係邊啲呢?

10. 《新紮師妹》

「我唔要你啲污糟錢呀!」、「我叫方中sir。」……呢套由楊千嬅主演嘅《新紮師妹》,幾乎有睇過嘅都幾乎笑到標尿。而就算隔咗咁多年,呢啲經典對白再睇返,一班巴絲仍然可以會心一笑。

9. 《低俗喜劇》

呢套由杜汶澤主演嘅笑片,顧名思義擺到明就係要賣低俗,當中嘅有味笑話,一班巴絲們都睇得津津有味,不過到底牛歡喜係咩味呢?似乎真係要食過先知……聽聞仲會食過翻尋味添。

8. 《龍咁威》

要數到近十年來一套可以睇完又睇,基本上背到所有笑位的電影,由谷德昭執導的《龍咁威》系列,絕對是其中一個代表作!近日谷導在24味的訪談節目《廿四7talk》中透露,有意開拍第三集!

7.《人間喜劇》

王祖藍近年已經轉戰內地,接拍嘅新片已經越嚟越少,如果大家想再次睇到佢嘅演出的話,不仿重溫呢套由王祖藍同杜汶澤合作嘅《人間喜劇》,搞笑之餘仲非常熱血,深得一班巴打歡心㗎。

6. 《九品芝麻官》

數到最經典嘅星爺電影,不得不提一定有《九品芝麻官》份,真係無論幾時睇都係咁好笑!

5.《春嬌救志明》

如果要講香港經典愛情片,《志明與春嬌》好可能會有份,而講到笑片方面,一班巴打嘅心水就係《春嬌救志明》!仲有巴打覺得呢套電影搞笑之餘,仲學到好多嘢添。

4.《嚦咕嚦咕新年財》

不時都有人話近年嘅賀歲片越嚟越唔搞笑,而呢套早年嘅賀歲片《嚦咕嚦咕新年財》,一班巴打絲打就覺得非常搞笑!

3. 《喜馬拉雅星》

所以話呢,一套電影搞唔搞笑真係視乎觀點與角度。有唔少人完全睇唔明呢套喜劇有乜咁搞笑,仲唔知套戲做緊乜添……所以呢套電影能夠成功跑出,成為巴打們心目中最搞笑嘅電影之一,小編都覺得好搞笑呀!

2. 《喜劇之王》

呢套戲搞笑嘅除咗星爺之外,仲有扮演柳飄飄嘅張栢芝!電影有唔少笑位都令人印象深刻,尤其係鴇婆同栢芝講做雞同做人一樣,要借視線。點知栢芝偶到嗰位嫖客竟然係八兩金,樣唔駛多講啦,點知耳仲有蟲走出嚟!真係好絕望呀!

1.《金枝玉葉》

能夠比起星爺電影更加有認受性嘅一定唔簡單,呢套由張國榮、袁詠儀、劉嘉玲等主演嘅《金枝玉葉》,睇過嘅都笑到標哂眼水。電影搞笑之餘,仲有唔少感動位,笑中有淚。