囝囝百日宴 胡杏兒老公：希望抱兩個真嘅BB！
撰文：東方新地
胡杏兒老公 恨追多一個
上周五係囝囝Brendan滿百日嘅大日子，杏兒夫婦喺九龍塘一會所搞百日宴，大宴親朋好友，而杏兒老公貼咗張相，相中二人拎住印有Brendan唔同樣子嘅紙版，並喺Instagram留言話：「Hopefully we will have the chance to carry two real babies one day (好希望有一日我哋有機會抱兩個真嘅BB！)」睇嚟佢哋真係心急追B喎！
當晚無論場地選址、回禮嘅小曲奇、場地嘅氣球布置等等、全部由杏兒全權策劃及精心安排。睇真啲佈置同主題仲係森林動物，好cute喎！
杏兒化身Pink Lady
杏兒幫主角囝囝打扮成黑白小紳士，同爹哋襯埋父子裝，杏兒自己就一身迷人Pink Lady現身，勁搶眼。
囝囝瞓不停
囝囝扭眼瞓，杏兒就四圍招呼朋友，預咗囝囝未必撐足全場，杏兒預備了多個大型BB紙版，畀來賓任影唔嬲，又安排即影即服務，安排夠晒貼心﹗
胡說八道會都有去
杏兒幫囝囝擺百日宴，胡說八道會班契媽又點可以錯過？平時其實聚會、上門已經見唔少契仔，估唔到胡定欣同姚子羚為咗撐場，都係收工趕番嚟，胡定欣仲係偷走、個頭仲係《包青天再起風雲》個古裝look添！呢啲咪誠意囉！
經濟百日宴
第一次做媽媽第一次搞百日宴，一向貼地務實的杏兒都係選擇中價私人會所，而不是為場面選擇五星級大酒店。地點位於九龍塘，方便男家沙頭角親友，地點又夠私隱唔怕被傳媒粉絲打擾。而酒菜和人數，最低消費係約16圍酒每圍六千大元包酒水，夠晒實惠！
杏兒全力湊仔享受家庭樂
剛滿38歲的胡杏兒在短短兩年內完成為人妻再為人母心願，不過距離40前生三個目標就仍需努力。所以陀B不久已經講定趕時間生多個、分娩又為容易恢復而選擇順產、生完Brendan更餵母乳為陀下胎做準備，既不會節食趕修身、也暫不接電影電視長時間工作趕復工，萬大事都大不過趕在40歲之前生夠三個。Brendan現時剛滿三個月，三個月來杏兒僅僅出席過兩個公開活動，其他時間都全心全力用來湊仔和享受家庭樂。
奶奶返港 幫手湊孫
丈夫Philip經常在個人IG帳戶晒三口之家家庭樂，一時孭住個仔行山、一時就去到西貢市歎漢堡吹海風，不過本刊日前所見，其實李家日常不止夫妻兩同Brendan三個，原本移居英國多年的李媽媽最近亦搬回港，還索性長住杏兒同Philip的大埔愛巢，幫助新手媽媽湊仔、亦主理一家三口日常飲食，為再抱孫調理新抱身體。周日（14日），杏兒一家老嫩驅車往家附近的大美篤搵食。
貼地食茶餐
老人家湊仔有一套又愛話事是常識吧？所以一行人到埗，杏兒無從插手，就算陪月同行，但亦全權交由奶奶一手一腳將囝囝放妥在嬰兒車內，並為他戴上冷帽，緊張BB免著涼。星期日家庭日食晚飯，想不到一家人既不是靚裝餐廳也不是大魚大肉，反而貼地在茶餐廳解決。一人一碗餐蛋麵一支熱維他奶、再加三兩碟燒賣，極速半個鐘就醫好肚打道回府。
奶奶幫杏兒補身
胡杏兒生完囝囝即刻諗住再追女，趕住喺40歲生日前生多個，所以為湊B又為幫杏兒調理身子，老公Philip媽媽、杏兒奶奶專程由英國趕返香港同住三個月，一來幫手湊孫，二來幫新抱杏兒調理身體，早前本刊發現Philip媽媽由司機接載從逸瓏灣出發，去完跌打舖睇症，不是回家休息，而是直接去藥房買湯包、花旗參，再專程去老牌餅店買番兩盒中式糕餅回家慰勞兒子和新抱，絕對是廿四孝奶奶。
老太由買餸煲湯煮飯都落手落腳親自嚟，杏兒有口福了！
有子萬事足
生完仔兩個月，杏兒日日攬實囝囝、又經常自爆想生多個、掛住BB在肚內感覺，據悉想學葉翠翠產後半年速孕到，最好可以好似陳茵媺四年抱三，李家 新抱任務完成。
將來還有什麼演唱會值得留意？
有不少歌手宣布舉辦演唱會，小編為你整合了2023香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
