外父走數 老婆焦慮 陸永撲水填氹

近年人氣急升的農夫成員陸永拍劇、拍戲、主持、廣告瓣瓣掂,又有個幸福家庭,但原來陸永有苦自己知,其從事裝修工程的外父近年街數纍纍,陸永不但要借錢畀外父還債,老婆更因此被牽連,經常被收數佬上門追債滋擾,搞到焦慮失眠。孭起頭家的陸永安慰老婆又幫手湊女,出埠開工又關顧住老婆情緒,陸永話:「我同太太講呢個唔係我哋嘅錯,叫佢唔好咁擔心!」陸永直認外父已經人間蒸發:「根本睇唔到有幾多嘅債!最重要係,我哋都搵佢唔到!」

陸永外父欠債走數

陸永近年拍住鄭裕玲Do姐演出後人氣急升,拍劇、拍戲、主持、廣告樣樣做到冇停手,同太太陳莉娜 (Reina)及一對女兒一心、一穎非常幸福,不過其實有苦自己知!因為其裝修工程的外父欠債纍纍兼走數,連累Reina被人上門追債滋擾!

陸永同太太都鍾意在lG放閃,一家四口幸福滿瀉!

陸太Reina被滋擾愁爆

日前陸永不在港,陸太Reina獨自揸車送囡囡返學,被問到老竇走數連累佢不停畀人追債滋擾一事,Reina顯得相當緊張:「係呀!」問到個數目多少?Reina皺眉話:「已經幫佢(指父親)唔到!」之後就急急腳上車離開。事實上,Reina父母早年離婚, Reina跟父親關係疏離,至近年父親向Reina表示開設裝修材料公司,因為生意周轉唔到要借錢應急,而據知陸永覺得嗰個始終係外父,所以最後都有借錢,但估唔到會沒完沒了!

陸永不在港,上周五陸太Reina獨自帶女返學,被問到被父親牽連畀收數佬騷擾,Reina一臉無奈。

 

Reina拖著女兒急急腳趕返學校!

 

出發去意大利前,陸永就同太太一齊送兩個囡囡返學, 兩個囡囡得意可愛, 更遺傳咗爸爸DNA ,非常開朗又識氹人開心。

 

美容院退股避滋擾

去年陸永打本給太太與友人合資開設美容院,將裝修工程交給外父負責,完成裝修後更已經找清所有款項,惟美容院正式營業時,不時有工人及其他人上門追數,令Reina情緒非常低落。據知陸永勸太太退股離開美容院,雖然突然退股損失咗一筆錢,又會影響到朋友,錢冇咗可以再賺過,又唔使再被騷擾。

受父親欠債打擊至落晒形的Reina,不願多講父親,只表示近日冇被騷擾。

 

陸永:太太瞓唔到覺

以為退股一了百了,直至最近再有另一班債主,去騷擾陸永太太已退股的美容院,陸永外父欠債纍纍才爆煲!身在外地的陸永電話回覆本刊記者:「佢哋不停打電話去太太已經退股的美容院要搵我太太出嚟,甚至搵埋我出嚟!」陸永直指外父債項是無底深潭,已經令陸永夫婦無法處理,陸永現最擔心係太太心情受影響,太太更因終日擔憂而失眠!

農夫現正同Do姐及蕭正楠去了意大利拍攝《Do姐再shopping》。

發聲明斷絕關係

心情大受影響的陸太,上月中就忍痛發聲明同父親斷絕關係。Reina在聲明中表明立場:「有關陳X X 及駿星材料工程有限公司對外之一切行為及金錢糾紛,一概與本人無關!若任何人就上述之事宜,或因本人丈夫之身份,而向本人作出任何要脅、騷擾或纏擾之行為,本人必將報警處理。」其實Reina就曾在lG亦試過嬲到留言發洩:「 希望爸爸似返個人!」據知陳爸爸在外邊早有第二頭住家,卻不理大堆債項影響女兒,幸好這段艱難時間,Reina有個顧家又負責嘅好老公陪她並肩作戰。

長期受騷擾的Reina,以中文名陳莉娜發聲明,忍無可忍同欠債走數的父親劃清界線。

 

陸太發聲明斷絕關係前數天,曾在IG留言,可見欠債父親對佢傷害極深。

搏命做搵錢養家

陸永同C君組成農夫10年,初出道時工作未如理想,他們就曾自爆戶口試過只得雙位數字,直至15年同Do 姐拍《Do 姐去shopping 》大受歡迎,二人工作愈做愈有,今年陸永就歌影視三線出擊,早前參與拍攝台慶劇《誇世代》煞科,又拍了電影《原諒他77次》及電視劇《抱擁情人》,近期就同Do姐飛歐洲拍攝《Do 姐再shopping 》。終於捱出頭的陸永,雖然因為要養家及照顧外母,至今仲未上到車買樓,但為了給太太及兩個囡囡有個更舒適的家,去年就由地下村屋搬到月租3萬的一幢式三層村屋,寧願自己辛苦啲賺錢,亦要畀家人有個安樂窩。

一個人撐起頭家,陸永近期搏命工作,早前因為日以繼夜拍劇搞到冇得瞓,回家一陣就攰到瞌著!

 

陸永派翠如上門睇實

陸永為幫外父填氹,忙於工作賺錢,另一方面既要安慰開解老婆Reina,又要幫手湊女睇住頭家,身心極之疲累。陸永現正身在意大利拍攝《Do姐再shopping 》,即使人不在港,仍擔心老婆冇人照顧,出發前安排一班朋友輪流上屋企睇實,安排好晒啲節目,又日日打電話畀老婆同兩個女視像傾偈,果然係個廿四孝老公!

因為擔心老婆冇人照顧,陸永每次出trip都會叫好友輪流去屋企睇實老婆,早前黃翠如就受命去陪陸太,與大班朋友一齊在陸永家打邊爐!

 

錫老婆鍚到燶的陸永,出Trip前就搵定朋友陪老婆,Reina在lG留言明顯對老公緊張自己甜到入心!

 

全文完