大仔轉讀猶太學校 陳茵媺 約蔡少芬傾媽媽經

陳豪、 陳茵媺 的大仔梓燁 (Aiden) 今年十二月就4歲,早前陳氏夫婦為囝囝的入學問題,費盡思量,一度心儀有「首相搖籃」之稱的哈羅國際學校,又到加拿大國際學校面試。不過兩人細心篩選後,最後卻選擇了非主流的香港猶太教國際學校,全因睇中猶太式教育,對培育學生的數學、精算方面有卓越成績,諾貝爾獎得主中佔三成也是猶太人!

為了栽培大仔成才,陳豪茵媺不惜每日輪流做司機,風雨不改接送大仔由大埔寓所到港島半山返學放學。來回車程三粒鐘,為兒女的未來鋪路,為人父母,幾辛苦都無所謂﹗

陳茵媺 母子雨中漫步

Aiden入讀的香港猶太國際學校位於港島半山波老道,猶太式教育教導學生熱愛發問,培養獨立思考力,學習多種語言等。日前本刊拍得茵媺在大雨及雷暴警告下,親自駕接送Aiden。兩母子在雨中漫步,邊走邊傾,Aiden更不時攬實媽咪,好嗲豬!

本來Aiden放學後成個人散晒,之後食飽蛋糕,飲完果汁後,即刻醒神晒!

爸爸密做冇停手

至於陳豪近日忙於為新劇《誇世代》開工,日曬雨淋都頂硬上,早前和對手李佳芯為一個鏡頭曬足全日。本刊記者上前問陳豪有關大仔入讀猶太教學校一事,陳豪笑住拒回應,但問到囝囝是否適應校園生活,就點頭話:「Ok,佢已經適應學校生活。(咁遠會唔會好辛苦?)有啲啦,有啲遠。」陳豪密密做,同時兼顧咖啡批發生意,都是為了提供優質生活、環境給子女,絕對係好爸爸!

細女凱婷標致可愛

老公開緊工,茵媺就照顧小朋友,日前佢相約兩女之母蔡少芬傾媽媽經,茵媺手抱細女凱婷手拖大仔,而同行兩名工人姐姐照顧二仔浩鋒,三大三小到淺水灣The Pulse的親子主題餐廳。細女凱婷樣子標致可愛,如同餅印茵媺,難怪媽咪錫到燶,一直抱住!細女一雙肉腿及圓嘟嘟臉超級可愛,眼仔碌碌定睛望實鏡頭。

 

之後蔡少芬到門口迎接陳家眾人,細囡終於落地,茵媺則教三子女向Auntie Ada打招呼。

大仔二仔感情要好

兩位媽咪傾唔停,大仔二仔到餐廳內的兒童遊戲區內先玩足球機,再去爬繩網,二仔特別愛黐住哥哥,兩兄弟感情要好,去邊都一齊。

 

媽媽經傾足四粒鐘,兩家人齊齊去停車場取車打道回府。

全文完