大肚葉翠翠難忍鄰居噪音 報警求助

最新娛聞

葉翠翠陀B已近六個月,今日(3月6日)佢喺FB發文向網民求助,原來佢近幾年都受到鄰居噪音滋擾,搞到佢患上抑鬱症和焦慮症,感到好無助:「今早7:50 小王子又被嚇醒了,嘈音持續,9:25 在無助之下報警了。」但佢話報警求助後,仲要搵到一個第三方證人,證明佢受到噪音滋擾,警方先可以向對方發出告票。

撰文:東方新地

圖片:葉翠翠FB

葉翠翠:就快生點搬?

葉翠翠2015年7月嫁建築公司董事周曉東(Raymond),之後三年抱兩,去年四月誕下囝囝周津羲(Jake),今年元旦再次宣布有喜,預產期為今年六月,葉翠翠話希望再添多個囝囝:「老公鍾意仔,話可以陪他玩。生女會擔心啲,依家有啲女仔12歲就話拍拖,好驚。如果生女,日日都要接佢返學放學,所以生仔會較放心。」對於今次報警投訴鄰居發出噪音,葉翠翠指對方「每早製造噪音,管理處勸喻,警察勸喻,全部無效,反而變本加厲!」

每晚失眠

葉翠翠話自己住喺呢個單位八年以上,以往從來未試過投訴,但今次實在忍無可忍:「每早小王子都比(畀)噪音吵醒,非常影響他的心理生理發展,做媽媽非常內疚,什麼也做不到,導致我出現抑鬱症和焦慮症,並且每晚失眠⋯⋯」又話:「我地(哋)好想搬屋,但我就快生點搬?帶兩個奶樽走?搬去服務式公寓,大公主點算?點解要咁對個大肚婆⋯⋯」網友都好為佢憂心,希望事件可以盡快得到解決,唔好影響到BB健康!

孕媽葉翠翠 趕追女

選擇於元旦日公佈成功陀二胎喜訊,實情翠翠同老公9月做人成功,等足三個月至敢向外公佈。據悉陀住小王子時過程舒服又順利,比起今次陀二胎完全係兩極,經常疲勞見暈甚至曾出現休克症狀,所以翠翠三個月來極度小心,為安胎唔敢接job,仲臥床足足兩個月。

疲勞過度險休克

本刊致電翠翠,當事人亦承認第二胎的確比起上次懷孕事狀況連連:「我陀第一胎時一直好多嘢做,生完又冇足夠休息,好似冇嘢,但係再懷孕事就發覺現晒形。成日見暈,有一次仲覺得想休克,好彩個人喺屋企……我有睇醫生,話係疲勞過度血壓低,所以俾自己喺屋企抖咗兩個月、唔敢接工作,更加唔敢抱個仔,直到過咗三個月胃口同精神至慢慢精神番。」話就話唔接job,不過成功再懷孕,FB立即湧入海量訊息詢問懷孕秘技,卧床兩個月一樣冇停手:「真係有好多想懷孕或者不幸小產inbox我,佢哋的確需要幫助,可以做到我都好樂意分享資訊。呢個階段未知道係仔定女,其實仔女我都冇乜所謂,老公又冇俾壓力我。(再陀B有冇獎勵?)梗係冇啦!我生第一個都冇獎勵吖!我老公唔興呢啲,生日同紀念日唔提都一定唔會有禮物收。不過識佢第一日已經係咁,重點係只要我出到聲,佢係半夜兩點都會出去買雪糕俾我嗰種人囉!」

讀者留言