YIU FI

姚瑩瑩6歲仔好生性!陪媽咪片場開工 自己溫書做功課

2011年姚瑩瑩忽然自爆同拍拖八年的圈外男友產子,但自此男友也未見露面,六年來都是靠姚瑩瑩辛苦湊大及養大囝囝Evan,供兒子讀國際學校、一周學足六日興趣班,45歲的瑩瑩更捱出周身病。不過咁,難得係阿仔只得6歲但乖巧又生性,早前跟住媽咪一齊開工,Evan坐喺戶外枱和櫈上,乖乖地自己溫書做功課,相信瑩瑩捱得再辛苦但也覺值得⋯⋯

撰文:東方新地

圖片來源:新傳媒圖片庫、姚瑩瑩Instagram

姚瑩瑩 6歲兒子好生性

姚瑩瑩雖然不是女一,但當配角的她在無綫演出機會不斷﹐除了拍新劇《BB來了》﹐還要為處境劇《愛·回家 之 開心速遞》開工,日前囝囝Evan陪瑩瑩拍《愛·回家》外景,瑩瑩開咗張戶外枱和櫈,難得Evan會坐定定做功課和温習﹐偶爾才拿媽媽的劇本八掛一下,以6歲的小男生來說,算乖巧又生性,相信瑩瑩一定覺得好安慰!

姚瑩瑩
《愛·回家》長拍長有﹐鐵腳姚瑩瑩當然日日都要開工!
姚瑩瑩
日前姚瑩瑩帶埋6歲兒子Evan開工,Evan會自己坐定定做功課和溫習,仲偷睇媽咪《愛·回家》的劇本!

 

姚瑩瑩
睇吓!瑩瑩的劇本畫到花呢碌,有做足功課㗎!

姚瑩瑩獨力養大6歲仔

回帶睇番2011年6月30日,瑩瑩在微博報喜po相宣布做媽媽。其實瑩瑩產子前,她的圈外男友不時會被傳媒拍到出現女方西貢寓所,不過兒子出世後鮮有露面。姚瑩瑩曾自爆與圈外男友生子、又曾在訪問中親認「小朋友爸爸還健在」,但六年來親子畫面從來少了爸爸,六年來姚瑩瑩都是靠自己捱大個仔。

產子前,姚瑩瑩的圈外男友不時會被傳媒拍到出現女方西貢寓所,但近年反而極少露面,而二人是男女朋友關係定已婚,瑩瑩一直迴避問題。

自稱「虎媽」

姚瑩瑩自稱「虎媽」,自幼稚園已經為兒子每周報讀普通話、英文、數學、游水、音樂、畫畫學足六日,又因瑩瑩在新加坡長大廣東話欠佳,為容易同仔溝通,她頂硬上報國際學校捱貴學費。

姚瑩瑩
近日Evan開始放聖誕假,瑩瑩都一同放假,和兒子搭飛機離港外遊!
姚瑩瑩
Evan依家6歲,愈大愈靚仔!

年拍十劇捱出病

母兼父職的姚瑩瑩要應付龐大開支,所以未停過手工作,一年拍七套劇,近年更加全力搵銀,去年最高產拍足十套劇。賺錢緊要,試過Evan兩歲時因為特發性血小板減少性紫癜(簡稱ITP)入院,都要趕回廠拍《愛‧回家》,要搵工人姐姐代勞辦理入院,分身不暇。早年拍《廉政追擊》跌傷膝患復發、《全職沒女》腰痛延遲就醫又搞到尾龍骨第三節移位和軟組織突出,周身傷加上休息不足都要頂硬上!

 

姚瑩瑩
姚瑩瑩捱到周身病痛,患上頸椎移位、膝蓋舊患,難怪佢要喺微博呻「有苦自己知」!

再攰再忙 也抽時間親子

儘管爸爸鮮有現身,但姚瑩瑩絕對是廿四孝媽媽。早前本刊拍得她見趁著好天氣帶家傭和6歲兒子Evan,山長水遠由西貢車到數碼港踩單車,不施脂粉的她把單車從車尾廂抬下,再孭住兩大袋推單車往目的地進發。6歲Evan年紀還小,快樂無憂踩上車時,完全不知媽媽的辛苦。

姚瑩瑩
雖然有工人跟身,但搬單車呢啲粗重嘢瑩瑩都親力親為!

姚瑩瑩
看見兒子開心踩單車,相信姚瑩瑩覺得再攰也值得!
姚瑩瑩
雖然拍劇又忙又攰,但姚瑩瑩堅持抽空陪愛子去踩單車!

初出道時索爆

早前深宵時份重播《天地豪情》,到依家熱播的《壹號皇庭V》都見到瑩瑩的演出!當年25歲的姚瑩瑩經選美舊相識袁詠儀引薦入TVB,不夠兩年就被力捧欽點拍台慶劇《天地豪情》更同當家小生羅家良演一對,前途無可限量,之後她在《壹號皇庭V》演輕度智障的靚女,劇中先後同吳啟華、林保怡演情侶,戲份不多但搶鏡。20年後,瑩瑩雖然不是做女一,多數演配角,但她拍劇量相當驚人!

姚瑩瑩
在早前重播的《天地豪情》中,當年25歲的姚瑩瑩堅靚,飾演Apple的她仲同當紅小生羅嘉良合演情侶,以新人嚟講真係好難得的機會!
姚瑩瑩
喺《壹號皇庭V》中姚瑩瑩雖然演輕度智障人士,但係索女一名,更周旋於吳啟華及林保怡之間!
姚瑩瑩
《壹號皇庭》系列晚晚熱播,一班演員約出來飯敍,姚瑩瑩都有出席!