江嘉敏姣花硬撬 黃嘉樂正印出招箍仔

最新娛聞

無綫盛產進取型發電機小花,後浪推前浪長期供應放電能力源源不絕,去年憑《親親你好媽》爆上位的23歲江嘉敏就係後輩中的表表者,年紀輕輕、視齡尚淺,緋聞已經見一個傳一個,合作男星永不落空。最新獵物係年紀相差16年的上位小生黃嘉樂,合作拍劇極速冧掂又玩得埋。

39歲黃嘉樂其實有個拍拖一年談婚論嫁攝影師女友Samantha,不過江嘉敏上任緋聞男友王浩信唔止有老婆仲有個6歲女,有正室都起唔到阻嚇作用,未入門正印Samantha當然感到地位受威脅,嗱嗱聲睇緊啲、箍實啲!

撰文:東方新地|圖片:新傳媒圖片庫、江嘉敏IG

江嘉敏 攞正牌攬頭攬頸

早前同女細老婆嫩王浩信拍《兄弟》傳出暗撻,江嘉敏依然話「清者自清,唔使避嫌」,今次拍《果欄中的江湖大嫂》傳轉移目標再電劇中男友黃嘉樂,更加有恃無恐攞正牌一樣每日在個人社交網絡發布二人日對夜對攬頭攬頸新動態。23歲江嘉敏外形甜美再加上性格主動,難怪正印Samantha眼見男友黃嘉樂疑似就快抵抗唔住要出招反擊!

黃嘉樂 跟得女友放閃不停

由「御用細佬」捱到今時今日足足經歷18年,黃嘉樂才總算捱出頭來,角色漸漸吃香又成功埋到金牌監製班做到梁材遠愛將,既然得來不易,上位中收埋正印低調處理感情是常識吧!不過男方低調、女友就唱反調,每日一po連朋友都頂唔順形容Samantha為「長期閃光彈」。

宣示主權

據知情人士透露,正印要宣示主權原來係為江嘉敏所逼:「其實佢哋上個星期(5月2日)至啱啱拍拖一周年,嘉樂雖然話過想儲兩年錢先結婚,但係變數可以好大,兩年後身邊係邊個邊有得保證。Samantha同嘉樂年紀差唔多、唔想再浪費時間,同埋真係覺得男友好仔唔想錯過。」

知情人士續說:「本來Samantha對男友好有信心,都冇諗過要搞咁多嘢,不過江嘉敏咁進取惟有見招拆招,除咗返電視台,男朋友去到邊、見咩娛樂圈朋友Samantha都跟到實,次次仲要打埋卡晒恩愛,又成日旁敲側擊叫嘉樂快啲求婚畀啲表示,都係為咗全世界都知佢係嘉樂嫂、希望有人知難而退啫!」

讀者留言