Liu1

客串李思捷《一家大晒》「燦哥」廖偉雄好艷福

近年北上種「有機米」 嘅廖偉雄(燦哥),最近被李思捷誠意打動,客串佢自導自演嘅賀歲新片《一家大晒》,戲中佢飾演李思捷老闆,辦公室內有多位性感比堅尼女郎做陪襯,認真好艷福!

撰文:東方新地

廖偉雄 闊別港片17年

燦哥對上一部拍嘅港產電影已經係2001年嘅《漫畫風雲》,今次相隔17年再出山,燦哥話片酬只屬其次,重點係導演李思捷交出咗二百分誠意:「其實思捷畀劇本我睇時,我唔想拍,因為實在太忙冇時間,更加唔想分心拍戲,影響農場嘅工作,但後來思捷專誠到我位於廣州花都嘅農場搵我,誠意十足,想推都推唔甩,但我事先聲明,只有一日檔期可以幫忙拍攝!」

廖偉雄
燦哥介紹李思捷戲中係佢公司老臣子,對公司一條心,令老闆燦哥一直想炒佢但又唔捨得。
廖偉雄
燦哥話佢一直冇脫離過演藝嘅圈子,只係用緊另一種方法去表達藝術。

問到酬勞係咪好吸引?燦哥直言就算收一蚊酬勞都會拍:「錢,大家都未傾,事實係我依家唔係靠演藝行業搵飯食,多與少唔係重點,畀一蚊又好,唔畀都好,我當玩吓客串冇所謂!」

廖偉雄
李思捷特登請假同老婆慶祝結婚周年紀念,等佢一離開公司,燦哥就同大班比堅尼女郎一齊開P慶祝。
廖偉雄
導演李思捷搵來多位性感比堅尼女郎喺辦公室內陪住「老闆」燦哥做對手戲,認真識做。

 

廖偉雄
李思捷封燦哥做「燦神」,大讚佢表演值200分:「好耐冇睇過佢做呢類戲,狀態依然好fit,做喜劇,幽默感好重要,燦神就天生係呢類人!」
廖偉雄 李思捷 蘇永康
戲中除咗燦哥,仲有狄龍大哥、元秋、蘇玉華、林敏驄、錢小豪、羅家英等老戲骨主演,拍攝當日,蘇永康更到場為李思捷打氣。

關鍵詞
李思捷