美容雪櫃

幫你去水腫! 美容雪櫃 正流行

美容界近日最hit之事非 美容雪櫃 莫屬。去Instagram睇下,淨係#skincarefridge已經有2,000+個tag,加上KOL同美容編輯齊齊加入打卡行列,令美容雪櫃人氣爆登。
撰文:Iris|圖片:Instagram

呢啲咁pure咁cute嘅粉色迷你美容雪櫃,確係幾上鏡;將啲美容產品整齊放晒入去,仲可以一次過晒冷!靚還靚,呢類美容雪櫃係咪真係有用?的確有部份美容產品適合冰鎮使用,但有啲反而雪咗唔好。呢度同大家分享下,千祈唔好打錯卡!

適合放入mini beauty fridge美容雪櫃嘅產品

  • 水性面霜、噴霧、面膜:有降溫、收緊皮膚作用,亦會令皮膚表面血管短暫收縮,帶嚟降紅嘅效果。
  • 含活性成份產品:含有高濃度活性成份嘅美容產品,比如維他命C精華液,本身都要儲喺陰涼地方,放入迷你雪櫃都啱嘅。
  • 紙面膜:最啱朝早敷,雪凍有助去水腫。
  • Probiotics產品:純粹衞生啲,盡量減少細菌滋生。
  • 玉石滾輪:即係周迅喺《如懿傳》入面用嚟按摩塊面支棒棒,依家外國都好流行㗎,叫佢Jade Roller,幫助通淋巴,加強血液循還,雪凍咗去腫效果更好,亦可以配合精華液使用。

不適合放入mini beauty fridge美容雪櫃嘅產品

  • 油性美容產品:雪凍咗啲油會凝固,令份子結構改變,放室溫就夠。
  • 香水:太熱或太凍都會令香水份子結構改變、味道走樣。都係放雪櫃頂啦!
  • 化妝品:大部份化妝品都不適合入雪櫃。你注意到嗎?通常手心嘅熱度會令佢哋好用啲。


但千祈唔好有錯覺,以為美容產品放咗入美容雪櫃可以keep得耐啲。即使雪咗,都要根據生產商建議嘅限期前用晒佢哋㗎!