《平安谷》大結局預告 婦女聯盟抗爭成功 黃浩然會死？
《 平安谷之詭谷傳說 》獲觀眾一致讚好，今晚終於來到大結局，究竟被徐榮等一眾山賊入侵的平安谷，村民們究竟能否擊退外敵？黃浩然係咪真係會死？而一班長久抗爭的婦女們最後會點？依家先睹為快！
《平安谷》大結局預告
昨晚第19集，講到徐榮飾演的山賊帶領部下殺入平安谷，全村上下陷入做奴隸的生活，劉江與黃浩然父子慘被當眾折磨一番，女人們當然亦唔會好過！
大男人們擔水劈柴
由第一集開始已經開口埋口男人大晒的劉江及一眾叔父們，淪落到要去河邊擔水劈柴，呢個時候佢哋先明白女人平時做的大小事務係咁辛苦！所以心裏暗暗佩服。
簡淑兒坐滑翔機走佬
徐榮同山賊們盡情飲酒玩樂，陳凱琳就率領婦女跳舞，呢個時候謝東閔就趁機帶簡淑兒坐滑翔機逃走！
黃浩然會死？
而今晚大結局的重點係黃浩然，話說佢被徐榮開槍打中，雖然之後成功將子彈取出，但身體出現黑斑，懷疑感染鼠疫。最後韋家雄代徐榮開槍殺死黃浩然，並命人將屍首抬離平安谷火化… 主角光環失效？
阮兆祥終被炸死
另一方面，壞事做盡的阮兆祥在廟中被蘇玉華佈下的捕獸器弄傷，蘇玉華趁佢動彈不得時放下炸藥，點知被阮兆祥捉住雙腳，想攬住一齊同歸於盡！最後蘇玉華當然無事，而阮兆祥終被炸死，惡人有惡報。
大奸角徐榮有惡報
徐榮喺劇集雖然只係啱啱出場，不過奸到出汁非常搶鏡，結局中佢得知新政府軍打到嚟平安谷，於是坐滑翔機走佬，不過就被黃浩然 (無搞錯)用槍打中小腿，最後跌死。
婦女打碎女誡碑
平安谷最終迎來happy ending，一眾婦女革命成功，將女誡碑打碎！村中小朋友個個有書讀，全村上下樂也融融！
