張振朗多女埋身 揭與陳芷尤分手內幕

拍拖三年,張振朗同陳芷尤呢一對一直以「好好朋友」互稱,去年戀情慢慢浮出水面、拍拖歐遊、見埋家長,男方探班仲探到去新加坡,仲以為轉入直路修成正果,點知上周二(3日),張振朗和陳芷尤同一時間、同一個景點、同一句說話分別在個人公布分手消息。原來幾愛都好,始終敵不過小花連環埋身同事業起飛而相距愈來愈遠。

撰文:東方新地|圖片:新傳媒圖片庫、張振朗陳芷尤IG

張振朗 陳芷尤 此情不再

相愛三年都未肯承認戀情,想不到張振朗和陳芷尤第一次承認關係,係夾啱Timing同口供出Po宣布分手。去年五月,二人拍住 拖飛去歐洲遊完法國再遊荷蘭,互做專屬攝影師隔空晒恩愛,想不到相隔不到一年,愛的印記變分手通告,巴黎海邊漫遊照變此情不再空凳相。

據知情人士透露,15年在《愛‧回家》第二輯飾演男主角Anson的張振朗人氣急升,緋聞亦都跟住來。上位兩年每年拍四套劇、由跑龍套變男二甚至升呢做男主角,而次次拍劇都必然同合作對手傳緋聞。蔡思貝、劉佩玥、龔嘉欣、陳瀅見一個傳一個,被力捧已經劇接劇聚少離多,又日日見電力小花多過見女友,緋聞疑幻似真,陳芷尤終於感到心淡決定斬纜。

陳芷尤心情沉重搵閨密陪

知情人謂:「佢兩個夾好將戀情低調,為咗唔影響大家事業,但係Owen(張振朗)同啲小花成日傳緋聞,又玩到癲咁,芷尤已經覺得好冇安全感!而且Owen走紅之後愈嚟愈忙,大家連見面時間都冇乜,結婚目標更加係遙遙無期!」雖然陳芷尤係提出分手嗰個,但還是大受打擊,日前就被本刊目擊約埋閨密白雲去街陪散心。

不過人在商場、老友又在身邊,琳琅滿目商品依然不能轉移陳芷尤視線,全程心不在焉按電話、行步路都扁晒嘴,看來回復心情move on還需要一段時間。

張振朗 緋聞一大籮

論到近年上位小生,張振朗絕對係發電機強力磁石,每次拍劇每任女拍檔都必定傳出緋聞,不過個個佢都話係兄弟,就算有生理反應,都係見到對方「拳頭會硬」。

讀者留言