張繼聰爆撞花軚軨 靚媽謝安琪出巡整車

張繼聰與謝安琪(Kay) 結婚十年,有仔有女家庭美滿又幸福,但其實張繼聰耿耿於懷未紅時受盡冷嘲熱諷,女尊男卑搞到夫婦二人齊齊患抑鬱,近年發圍的阿聰有能力擔起頭家,阿Kay大可以繼續長休安心做其湊仔婆。兩公婆又不時在網上甜蜜耍花槍,阿聰早前大爆其愛車被阿Kay撞花軚軨,於是阿Kay日前出巡到九龍城整車!

一家四口幸福美滿

過去兩年謝安琪放長假為追多個女,今年3月終如願以償誕下女兒張靖,加埋10歲兒子張瞻,湊個「好」字。與此同時,張繼聰的事業亦見起色,拍劇、拍電影、做廣告代言等工作量飈升,多年來被指唔夠老婆紅,被踩到一文不值的張繼聰終於吐氣揚眉!

張繼聰難忘當年頒獎禮

當年Kay已是樂壇天后,外界以女尊男卑來形容二人關係,張繼聰更被網民封為「謝繼聰」,佢透露當年自己出席頒獎禮、為Kay奪得叱咤樂壇女歌手銀獎撐場時心情矛盾,因為當時自己抑鬱病非常嚴重,但又希望在現場支持太太;同時擔心自己食白果被人嘲笑。而阿Kay當晚得到多個獎,但佢自己抑鬱病亦好嚴重,默默承受好大壓力。

 

對於曾經看不起佢的人,阿聰仲道謝:「其實,他們都是我的老師,佢哋全部都係菩薩;甚至表面上好似害我嘅人,其實佢哋令我成長咗。三十幾歲前有一段咁不平凡的經歷,學識好多嘢,幾抵!」與Kay走過高山低谷,阿聰更加愛錫老婆與一對仔女,因為佢覺得今日的一切得來不易。

爸爸與前世情人

40歲的Kay為追女不惜放棄如日方中的事業,停工休養多月終成功懷有女兒張靖。囡囡萬千寵愛在一身,除了爸爸張繼聰,還有爺爺與哥哥張瞻都對妹妹愛不釋手,痛愛有加。十年後再抱B,張繼聰完全被囡囡融化,大量上載與前世情人的合照上社交網,甘心做女兒奴,而囡囡則成為家中的小公主。

一家大小外遊

終年Job接Job的張繼聰,終於能抽空全家外遊,今次仲帶埋7個多月的囡囡,佢在社交網po一對仔女的食飯照,更留言大讚囝囝專業,囡囡精靈。

有網民看到張繼聰所po的泳池照,一眼就認出佢哋去了峇厘島,入住了當地有名的酒店。

人紅整車有贊助

張繼聰與阿Kay又不時在網上耍花槍,網民見到都覺sweet!阿聰日前上載一條短片,大爆愛驅的軚軨遭Kay撞花,佢車撞花事少,最緊要人冇事,雖然扮晒冷靜,不過就叫有共鳴的網民留個言:「Kay,你好嘢!」短片一出,即獲得好幾個維修贊助,又慳番一筆。

謝安琪出巡整車

所謂「一人做事一人當」,日前阿Kay單拖到九龍城搵車行換軚軨,見佢不施脂粉一身運動裝打扮,養尊處優多時肥肥白白,狀態不俗。換過軚軨後,Kay去了附近美容院做美容。

Kay一身運動服打扮,不施脂粉戴上口罩包到冚。

 

早前Kay撞花愛驅軚軨畀老公張繼聰唱通街,這日她一人做事一人當,親自揸車去九龍城搵司傅換軨。

 

張繼聰收工接老婆

至晚上6時許,張繼聰收工即去九龍城接老婆,兩公婆繑住手行去取車時,本刊記者上前打招呼,Kay不停友善揮手,問到之前整花愛驅軚軨,Kay笑言:「整番好啦!」至於另一架被張繼聰撞甩「輪拱」受傷的愛驅,張繼聰就話:「未有時間整。」結婚十年共度患難依然恩愛,感情更勝從前,實在係羨煞旁人!

張繼聰放工即仆去接老婆,在美容院樓下邊傾電話邊等。

 

結婚十年已經老夫老妻,不過張繼聰對Kay依然無微不至,開晒車門好有風度。

 

張繼聰見到本刊記者張繼聰表現甚cool,Kay就一直面帶笑容揮手講byebye。

全文完