同家傭提早慶中秋!張繼聰細女 屋企搞花燈晚會
張繼聰除咗最愛喺個人社交網同老婆謝安琪閃爆留言外,另一樣最鐘意嘅就係放囡囡張靖(KaKa Ball)嘅可愛萌爆片同大家分享!近日阿聰就話KaKa Ball見中秋臨近,喺屋企大搞花燈晚會⋯⋯
撰文:東方新地 圖片:張繼聰IG
張繼聰細女 屋企搞花燈晚會
住家男張繼聰最愛一對子女,日前佢就上載左擁右抱照,一手抱KaKa Ball,另一手抱囝囝張瞻,阿聰笑言兒子真心錫,妹妹係借位,搞笑又甜蜜!
KaKa Ball未到中秋已收到好多花燈,阿聰笑言囡囡見中秋臨近,喺屋企同工人姐姐搞花燈晚會,見KaKa Ball同姐姐們玩得好開心,相信佢哋嘅感情都相當好!
仲有片睇:
張繼聰教定一歲囡囡拒絕男生
一向都知張繼聰勁錫寶貝女KaKa Ball,阿女出世後就已經外父上身話:「諗到佢將來有男仔拖佢手我已經嬲!」日前,佢喺個人社交網上載兩段關於囡囡嘅短片,教個女點樣拒絕男仔!
張靖開頭坐唔穩兼趴地嗌「哎呀」,之後坐定定老竇就指示:「坐低先,123,哼吖。」

張靖就即刻扁起嘴仔、交叉繑手兼擰歪面,再高傲咁發出「哼」一聲,十分趣緻!
大讚有老婆風範
睇到囡囡咁叻豬,充滿成功感嘅張繼聰就留言:「好努力教妹妹第日啲𡃁仔想約佢去街嘅反應 #哼 #依家放心哂 #有佢媽咪嘅風范(範)」言詞中就仲透露咗老婆謝安琪都係咁,原來最終目的係想KaKa Ball將來似媽咪咁拒絕男仔!
張繼聰因狗狗呷醋
近日,張繼聰於個人社交網上載幾張囡囡張靖(乳名KaKa Ball)同愛犬一齊嘅相,見到隻狗狗體形大過KaKa Ball幾倍,但KaKa Ball一啲都唔驚,仲成個頭挨落狗狗個身到又錫錫,兩者非常親密!
狗狗全程表現乖巧,任KaKa Ball點對佢,都只係坐喺地下望住小主人。見到KaKa Ball除咁錫錫狗狗,又摸摸狗狗個頭,真係可愛到爆!
張繼聰囡囡為零食嗌爸爸
之後,張繼聰又再度分享一段囡囡嘅短片,片中佢問呀囡要唔要食嘢食,而得意到暈嘅KaKa Ball擺出一副極之楚楚可憐嘅樣,邊點頭邊係咁嗌爸爸、爸爸,睇到人心都軟哂,難怪連爸爸都冇哂佢符,緊係要俾零食囡囡啦!