懂得撒嬌的女人!港女唐詩詠 VS 台妹張瑋純

無綫4K劇《不懂撒嬌的女人》播出以來口碑不俗,不時將港、中、台三地的女士作比較,睇到觀眾非常有共鳴!日前劇情講到 唐詩詠 向索台妹張瑋純學習撒嬌,後者舉手投足都嗲味十足,聲線誘人,真係睇到男觀眾流晒口水!而詩詠學成後亦對王浩信大展嗲功,讓觀眾見到不一樣的她!唔知你又鍾意邊個多啲呢?

唐詩詠練習撒嬌

昨晚一集講述詩詠去到台南為美食節做準備,不過因為未能邀得當地食店老闆合作而苦惱,於是佢以王浩信為實驗品練習撒嬌!雖然詩詠一開始就跌膊出擊,可惜講嘢粗聲粗氣,又好大力咁推對方,完全冇撒嬌的感覺!

張瑋純出擊

詩詠完全未夠班,於是由台妹張瑋純出手示範!先有台妹高八度的超級嬌嗲聲線,之後有意無意地同對方有身體接觸,讚對方「很帥」又豎起手指公講嗲到爆的疊字「好棒棒」,叫男人點頂得住……

台妹的眼淚

見王浩信繼續「口裏說不」,於是張瑋純將行動升級,成個人挨向對方之餘,又搓手又彎腰地扭計,最後仲用埋必殺技:喊!女人的眼淚向來係最強武器,何況係索台妹?王浩信同觀眾都即時融化咗……

詩詠嗲功之學成

經張瑋純的一番訓練後,詩詠終於學有所成,向王浩信展示嗲功!呢幕見到詩詠突然捉實王浩信隻手,含情默默咁話「你好棒啊!」「我肚子好餓餓啊!」 大家都知道詩詠素有「不能錯過的女友」之稱,如今出動埋電眼及台妹嬌嗲口脗,難怪見慣大場面的王浩信都呆一呆!

浪漫遊台南

之後劇情又講到詩詠同王浩信兩人騎着單車遊台南,見到詩詠着住條短褲仔大晒白滑美腿之餘,兩人的感情亦開始萌芽!詩詠在夕陽下挨住王浩信膞頭一幕,畫面非常浪漫!

全文完