miu fi

戲內戲外做小三 苗可秀 善心落區派飯

睇《溏心》永遠有嘢落袋,今輯《溏心3》來到尾聲,學會原來做小三都有高低之分。陳敏之黑bra送上門勾引唐文龍呢種算係入門,等到苗可秀出場至見識到其實終極小三可以大條道理當自己係正室、若干年後都要窮追不捨搞破壞!
正所謂戲如人生,劇中癡戀黃永正(夏雨)四十年,想介入和李司棋的婚姻,現實中苗可秀亦一度盛傳與李小龍有一段情,雖然被當事人否認,不過就真係四十年後仍然孑然一身,65歲從加拿大回流,冇個伴亦無兒女的她拍戲做義工過日辰。

撰文:東方新地

圖片:新傳媒圖片庫

苗可秀 善心落區派飯

薑係老嘅辣,第三者都係老嘅最有手段,戲裡有強迫症又憎到司棋姐一個點,現實中的苗可秀其實人緣好又樂善好施。回流香港除了間中拍劇接戲過戲癮、約埋同輩女星友人聚舊外,單身的她亦用了大部份時間做義工。日前本刊就發現苗可秀低調現身九龍城,為茶餐廳做義工派免費飯盒畀長者做晚飯。雖然自己年紀都唔細,還是由天光派到天黑,親力親為又面帶笑容盡力幫助有需要的長者。

企足半日 冇人認得

獨身多年,適逢大時大節新年前夕,苗可秀選擇到九龍城做義工,派飯盒畀長者。唔係做樣咁簡單,苗可秀真係企足全程、在九龍城街頭落手落腳派飯,由天光派到天黑。雖然保養得宜、又化了淡妝,不過戴埋黑超、啲公公婆婆眼力又差啲,竟然半日冇人認得出昔日嘉禾公主。

出道多年來首次出演無綫劇集,苗可秀在《溏心3》中角色對夏雨所飾黃永正一廂情願癡戀四十年。

 

單身多年的苗可秀用了不少時間做善事和從事公益活動,去年農年間就去老人院探訪,陪長者一齊過年。

三段情 難逃宿命

出身富裕、天生麗質,當年一入行就做電影女主角仲係李小龍御用「龍女郎」,因乜解救一代女神至今都未嫁亦都冇個伴喺身邊?其實苗可秀多年來有三段情最為人津津樂道,而無獨有偶,三段情對象都有另一半。外傳四十年未嫁係因為對李小龍痴心一片,實情當事人多年前已經解畫:「李小龍對我嚟講更似大哥哥,在羅馬拍《猛龍過江》時,有位意大利製片人經常對我拋媚眼,為咗令佢知難而退,李小龍至會去到邊都拖住我行。」但問到李小龍冇冇追過佢?就大賣關子

苗可秀入行即做龍女郎,連做《唐山大兄》、《精武門》、《猛龍過江》三套戲女主角,亦因此同李小龍傳足多年緋聞。

小三之路

至於與台灣影帝柯俊雄,則是苗可秀唯一一段承認過的婚外情,自責當年「年少不更事又太任性,愛情來了,擋也擋不住。」反倒87年因為拍亞視劇《滿清十三皇朝》撻着的潘志文,直到最近再被拍到二人來往,才揭發單身背後,苗可秀做足人夫潘志文三十年知己情人。

三段婚外情,苗可秀唯一肯認係同台灣影帝柯俊雄,自稱當時年少又任性:「愛情來的時候,擋也擋不住。」
87年,苗可秀參演亞視劇集《滿清十三皇朝》時,再傳與有家室的潘志文撻著,相隔三十年,二人再被拍到會面,有傳保持知己情人關係已經三十年。

一代嘉禾公主

現年65歲的苗可秀原名陳詠嫻,父親是飛機工程師,一心想做空姐卻陰差陽錯加入嘉禾做演員。因為天生麗質氣質過人,一出道就被力捧,還由大俠金庸親自改藝名作苗可秀,紅足十多年,直到八十年代才息影從商,再移民加拿大。

一入行就做鄒文懷力捧新人、連做李小龍三套經典作女主角,苗可秀當年有嘉禾公主之稱。
拍完李小龍,再為多套成龍電影做女主角,多年之後苗可秀再出山,就係獲成龍前經理人陳自強之邀。

出山拍古天樂

息影多年,07年苗可秀被陳自強邀請出山,出演張艾嘉導演、古天樂主演電影《一個好爸爸》天恩媽一角。雖然苗可秀現時感情生活係個謎,不過友情生活就相當豐富,無論在加拿大定回港,總見到苗可秀約埋黃淑儀、羅蘭姐及前輩南紅聚會外出。

關鍵詞
小三