360秒人生課堂|綠葉王戴耀明

360秒人生課堂|49歲綠葉王戴耀明:「都慣咗被人叫大茄!」

最新娛聞

廣告

《360秒人生課堂》|49歲綠葉王戴耀明1992年在亞洲電視出道、1994年轉投無綫,轉眼已做了28年,為人熟悉的角色包括《鐵馬尋橋(2010)》入面大難不死嘅排長,喺《巾幗梟雄之義海豪情(2010)》入面迷戀陳法拉嘅日軍向山少佐,呢啲角色大家冇可能冇印象!正常打工仔,打咗十幾年工,點都升到管理層嘅位置,份糧亦有番咁上下。反之喺TVB磨咗十幾年嘅戴耀明,一直原地踏步,飾演小人物角色。戴耀明話:「都慣咗被人叫大茄!」

《360秒人生課堂》|戴耀明為盡孝道放棄北上發展

戴耀明在《360秒人生課堂》提及與母親的關係,入行多年除了未曾帶過媽媽入電視城,更為照顧家中八十多歲的母親放棄不少北上發展機會,由於是家中獨子,父親十多年前已逝世,所以要獨力負起照顧母親的責任。

 《360秒人生課堂》|戴耀明
戴耀明在《360秒人生課堂》提及與年邁母親的關係。(圖片來源:360秒人生課堂@TVB)

戴耀明19歲投身娛樂圈:一定要有副業

想當年,戴耀明19歲就投身娛樂圈,一做就做咗十幾年。「讀書已經好鍾意做話劇,希望大個後可以投身呢行。其實入行經過都幾戇居,有日,我阿媽睇電視嗰時見到亞視請演員,咁啱當時畢業,未搵到嘢做咪試下,咁就入咗行。後來喺亞視做咗1年,發現冇咩人睇,覺得無綫好似好啲,就去無綫考訓練班囉!」加入TVB後,戴耀明先至發現TVB新人輩出,比起亞視更難「有人睇」。

「當時過嚟TVB冇諗過呢點,不過既然選擇咗,可能係命中註定嘅呢!我唔知道乜嘢叫做運氣,但可能係我唔夠進取。我比較被動,人際關係比較輸蝕。」身為獨生子,即使對星途樂天知命,但總要對家人有所承擔。

 93年投考無綫電視第6期藝員進修班,同學包括蔡子健、伍文生和傅明憲等。
93年投考無綫電視第6期藝員進修班,同學包括蔡子健、伍文生和傅明憲等。(圖片來源:無綫電視截圖)
 在無綫工作廿八年,非常襟撈,今年新劇《新四十二章》亦有他的身影。
在無綫工作廿八年,非常襟撈,今年新劇《新四十二章》亦有他的身影。(圖片來源:tvb.com)

家人支持 甘心留喺TVB

「其實屋企人好支持我做呢行,又冇嫌棄我喺娛樂圈唔湯唔水,搵唔到大錢。其實人一世物一世,做到自己鍾意嘅嘢,又唔係搵唔到食,OK啦!做演員都有萬零2萬蚊底薪,加埋爆show分佣,收入都算穩定。

「試過有年爆show搵多咗十幾萬,但都有試過唔爆show冇乜錢,唯有少啲出街囉!坦白講,我呢個年紀已經好難喺出面搵份工。反而keep住做呢行,幫到我搞啲小生意,因為啲人認得我,傾起生意上嚟都易啲。做呢行一定要有副業,以前都有搞過酒吧同埋運輸。除非TVB炒我,如果唔係我都唔會放棄。」甘心留喺TVB做綠葉,只可以話佢真係好鍾意呢份工!

 於網友認為其光頭形象酷似日本動漫《一拳超人》主角埼玉,故令他獲得 PlayStation 及 FHProductionHK 邀請,以一拳超人造型擔任電視與手機遊戲代言人。
於網友認為其光頭形象酷似日本動漫《一拳超人》主角埼玉,故令他獲得 PlayStation 及 FHProductionHK 邀請,以一拳超人造型擔任電視與手機遊戲代言人。(圖片來源:戴耀明@facebook)

戴耀明:我係戇居

「可能係我個樣生得戇居居,所以普通一句對白,由我個口講出嚟,就變得好騎呢。其實我都覺得自己演喜劇係容易啲被接受,扮市井我冇問題,如果要我演醫生、律師,似乎冇咩說服力。」

 《潛行狙擊》入面嘅磨碌,戲分唔算多,但係就因為個髮型似阿Bert而被網民惡搞。連戴耀明都受寵若驚咁話:「點解佢哋會惡搞配角?」網民嘅喜好咁易被你估到咩!

《潛行狙擊》入面嘅磨碌,戲分唔算多,但係就因為個髮型似阿Bert而被網民惡搞。連戴耀明都受寵若驚咁話:「點解佢哋會惡搞配角?」網民嘅喜好咁易被你估到咩!(圖片來源:新傳媒資料室)

戴耀明試過Send短信向佘詩曼示愛

無綫綠葉王戴耀明一直封佘詩曼做女神,曾經話將來搵到錢要娶阿佘做老婆,又試過飲醉酒send短訊示愛,預咗食檸檬嘅佢日前喺訪問度話:「我哋嘅距離係10萬億咁遠,望吓就夠,」阿佘真係好正!做人有夢想係好嘅!

對住陳法拉好易投入

戴耀明被網民惡搞嘅起源,嚟自《巾幗梟雄之義海豪情》,佢飾演日軍向山少佐,同陳法拉重有幕床戲,呢場戲影像化咗唔少巴打嘅final fantasy,亦令佢做咗毒男嘅代表。「晴晴(陳法拉)獻身俾我嗰場戲,其實我冇掂過佢㗎!但係法拉真係好專業,雖然大家冇同時入鏡,但係拍我嘅戲分嗰時,法拉都照樣做番成場戲俾我,照樣除衫,帶我入戲。」「咁當時你個腦諗緊咩呀?」我問。

「全程投入㗎喇!對住法拉好容易投入㗎嘛!」真係聞者葡萄,見者噴血。不過《巾》劇監製李添勝當年曾經公開點名多謝戴耀明。

「聽到我好感動,佢係我伯樂,關照咗我十幾年。有時我出show唔夠數,添哥都會救我,佢可以講得上係我嘅再生父母。」當年黎耀祥都係多得李添勝關照,憑住《巾幗梟雄》一鋪翻身,但戴耀明就唔敢將自己同黎耀祥相提並論。

「我想像唔到自己可以擔起1套劇。唔係對自己冇信心,但做咗十幾年,大概都知道乜嘢人可以帶得起成套劇。我自問只可以喺主角側跟錦上添花,只要觀眾留意到我,我已經好滿足。初入行嗰幾年,都會對人氣有憧憬,而家做咗十幾年,都睇化喇!」你咁講法即係話黎耀祥唔靚仔啫!

(圖片來源:新傳媒資料室)

做秋生短命都制

入行廿幾年,好多人叫唔出佢嘅真名外,甚至連片尾字幕都打錯佢個姓做叫「載」耀明。

「而家行出街都有人會叫我大茄㗎!初初未習慣都會有啲唔開心,但做咗十幾年,情緒上冇咩事喇!我只會覺得呢啲人冇禮貌。反而最慘嘅係當年喺訓練班出嚟,試過要扮牛頭馬面,笠住個面具拍古裝,角色完全見唔到個樣。又試過坐係藝員休息室,保安以為我係臨時演員,重諗住趕我走。最辛酸嘅係,我哋做配角會同時間騎住幾套劇,最多試過兩個月騎4套劇。凌晨4點拍完一組戲,另外一套劇又開晨早6點。多劇拍雖然係辛苦,不過一定會爆show,一睇銀行簿仔就開心番。」但係佢並唔係為咗爆show就咩角色都肯演。

「如果要我除褲露屎忽、打格仔露J嗰啲,我一定唔會接,就算露完可以上封面我都唔制。但係如果係梁家輝嘅《情人》,嗰啲又唔同。人一定會計數,有等價交換。我年紀唔細,如果俾5千蚊我拍兩組鹹戲,就梗係唔制啦!除非真係冇飯開㗎啫!我最大嘅宏願係做到黃秋生,佢每個角色都好搶。做到佢咁樣,我真係短幾年命都制。」黃秋生已經係影帝級,戴耀明要學佢,首先要掃番幾個獎先。不過佢似乎對《萬千星輝頒獎典禮》有啲意見。

「『飛躍進步』獎其實都係頒俾主角級嗰啲,最好有個『綠葉』獎!」講完呢句,佢就哈哈大笑。相信,佢都知道呢個建議係妙想天開。

後記:而我不知戴耀明是誰?

入行近卅年,拍過嘅劇絕對比好多1線小生重要多,戴耀明亦不止一次接受採訪,其中一個訪問在多年前進行,記者帶咗戴耀明落旺角影相。影影下,人群開始聚集起嚟,後來重有自遊行主動要求逐一同佢合照。戴耀明忽然變成旅遊景點,可惜喺班自遊行入面,冇人講得出戴耀明個名。對於1個演員嚟講,冇知名度會唔會係最大嘅遺憾呢?

 當年的訪問花絮,戴耀明忽然變成旅遊景點,可惜喺班自遊行入面,冇人講得出戴耀明個名。對於1個演員嚟講,冇知名度會唔會係最大嘅遺憾呢?
當年的訪問花絮,戴耀明忽然變成旅遊景點,可惜喺班自遊行入面,冇人講得出戴耀明個名。對於1個演員嚟講,冇知名度會唔會係最大嘅遺憾呢?(圖片來源:新傳媒資料室)
 大茄有樣好,冇包袱做咩都得,就算被網民做萬能key都有一百樣可能發生。
大茄有樣好,冇包袱做咩都得,就算被網民做萬能key都有一百樣可能發生。(圖片來源:新傳媒資料室)

常見問題

TVB綠葉王戴耀明為何甘心留TVB?

戴耀明於節目《360秒人生課堂》提及做演員廿多年來一直原地踏步的辛酸事……詳情請看

戴耀明為何被網民惡搞?

戴耀明被網民惡搞的起源,來自《巾幗梟雄之義海豪情》……詳情請看

圖片來源:360秒人生課堂@TVB, 新傳媒資料室

讀者留言