麻雀術語英文考起高院翻譯員 即睇書商中英對照卡點解釋！
撰文：東方新地｜圖片：商務出版Facebook、新傳媒圖片庫
麻雀術語考起高院翻譯員
日前，高等法院審理近年深水埗無屍兇殺案時，因證供涉及多個麻雀術語，如：「碰」、「上」、「明暗槓」、「一炮三響」等，令外藉主控官聽到一頭霧水之餘，亦考起當日嘅翻譯員！
當日審訊案件時，翻譯員即場將「碰」譯作 「it can win in combination of same pattern or number, cannot win in consecutive pattern or number」，令在場唔少識打麻雀嘅人都忍唔住笑咗出嚟！
書商出中英對照卡抽水
日前，商務出版就出帖文，列出部分麻雀術語嘅漢英對照圖，擺明車馬就係想趁今次一事抽個靚水！
有網民就笑言以上麻雀術語嘅中英翻譯會繼「Add oil」後，喺不久嘅將來又會被列入牛津字典，亦有網友就話建議直接用港式英語比較方便！大家又點睇呢？
港式英文「add oil」被列入牛津詞典
早前，台北東吳大學英文系副教授曾泰元喺今年10月發現港式英文「add oil」喺世界最權威嘅《牛津英語詞典》（Oxford English Dictionary，簡稱OED）出現！據OED解釋，「add oil」屬於港式英文，用嚟表達鼓勵、煽動、或支持，相當於英文嘅「go on!」或「go for it!」。
「add oil」被最權威嘅牛津辭典收納為正式用語，相信日後好多香港人都可以名正言順，大大聲同人講句：「add oil！」仲可以同老師講「add oil」已經成為正式用語啦！
10個有潛質入牛津字典港式英文
｜「Hea」
「Hea」可以話係浪費時間，或敷衍了事嘅行事作風，而喺心理層面上就係解作冇心機兼頭腦完全空白嘅精神狀態，近年非常流行使用「Hea」呢個字，小編呢個時候都好想可以「Hea」番陣…
|「Chok」
「Chok」呢個字就已經流行咗多年，一般用嚟形容想表現自己有型一面，或者簡單啲嚟講就係「扮嘢」。2011年，「Chok」呢個字更由林峯發揚光大，皆因佢首歌《Chok》。
|「Chur」
唔少大學生都會用「Chur」呢個字嚟形容自己嘅大學生活，「Chur」可以解作好忙碌，或令人有透不過氣嘅意思！唔知大家平日嘅工作生活又Chur唔Chur嘅呢？
｜「No eye see」
唔洗講都知只有香港人或者識廣東話嘅朋友先會明，簡單嚟講就係「冇眼睇」嘅意思，即係睇都唔想睇，理都唔想理嘅心情！
｜「Jeng」
取自「正」嘅發音，不過又同正統嘅廣東話拼音又有啲唔同，其實真實拼音係「Jing」，但好多人習慣打「Jeng」。
|「Laugh die me」
照字咁譯就係「笑死我」嘅意思，由確實存在嘅英文字拼湊而成。
｜「You play me」
「You play me」同「Laugh die me」原理差唔多，即是「你玩我呀？」嘅意思。
｜「Collect skin」
顧名思義即係「收集皮」嘅意思，唔少人都會喺日常生活到用到，但通常大家都只會講：「X皮！」。
｜「Dllm」
呢個好明顯就係問候人哋家人嘅意思，相信係香港人最常用嘅港式英文之一。幾時會用到，小編相信唔洗講大家知嘅！
｜「People mountain people sea」
由成語「人山人海」翻譯而成，近年好似已經沒咩人用。不過講開又講，點解唔係用「Hill」，反而係用「Mountain」就不得而知嚕。
