香香

拍戲傷腰影響陀B 強強押香香返加拿大

岑麗香去年12月在加拿大溫哥華嫁強強(Joshua),結束短短年半的異地戀,新婚夫婦戀火仍熾熱,強強更為香香放棄在加國的事業,留港陪老婆。但婚後香香拍劇未停過,腰傷舊患未好,早前又傷手,傷在香身,痛在強心啊!女人條腰骨唔多唔少影響陀B,為盡快令33歲的香香養好身體生強B,強強成功游說香香推劇跟佢返加國小休,希望離開香港呢個繁忙地,在冇壓力下一擊即中!

香香嫁強強一周年

香香去年12月與強強回到家鄉溫哥華舉行婚禮,在約200位親友見證及牧師見證下成為夫妻,香香着上胡杏兒品牌的婚紗靚到不得了,從相片已可以感受到婚禮溫馨又浪漫,香香好幸福!

香香爆忙冷落老公

今個月是岑麗香成為人妻一周年,因為婚前已接落兩套劇《溏心風暴》及《果欄中的江湖大嫂》,香香劇接劇忙足成年,不免冷落為佢移居香港的老公強強,為此佢曾表示未盡妻子本份愧對老公。強強默默守候住香香,不時做司機返工放工管接送,香香最好的彌補方法,相信就係為恨做老竇的強強生個B!

香香為強強推劇

早前無綫新劇《BB來了》試造型,據知原本女一屬意香香,但最後卻換上李佳芯,監製廖晉碩直認香香係其中一個考慮人選,但香香話婚後第一年希望同家人過年,但冇提及係咪有BB。」香香因推劇被傳有咗,但她多次出來澄清未有餡,而推劇真正的原因就是為了強強。

返加拿大探親兼造人

據知強強知雖然好恨做老竇,但香香一直有工作喺身唔可以有住,佢都好有耐性咁等。現時香香拍晒兩套劇,兩公婆終於有機會計劃下,因為香香周身傷患,之前拍戲整到條腰都未好,女人要陀B腰骨好重要,所以香香趁呢排有時間就去搵脊醫做治療。強強知道香香拍劇壓力大,所以想佢同佢外遊慶祝結婚一周年,然後返加拿大探親,乘機可以休息吓造人!

拍《辣警霸王花》傷腰

香香去年拍錢國偉執導的電影《辣警霸王花》,香香在大馬拍外照時,要赤腳追賊,又要在5層樓高游繩、跳急流,公主變打女唔易做,搞到日日腰酸背痛兼扭親,一次在沙灘拍攝時更撞石跌倒要入院照X光,拍戲辛苦之餘仲傷及腰骨舊患,香香認真手尾長。

其中一幕欣宜唔小心跌落急流,眾女跳河營救,香香仲瞓身賣命親身上陣,結果整親腰周身傷。

 

搵神醫整腰

返加拿大展開不設防造人計劃前,香香想醫好條腰骨,所有一有時間就去搵脊醫。早前香香由女助手陪同下到達九龍城啟德道,見佢上了一幢似是普通民居的唐樓,本刊記者望勻全幢大廈都找不到任何醫館的招牌。個多小時後香香離開,佢表示上去搵醫師整腰,還用手勢示範醫師怎樣用手肘去治療,連招牌都欠奉的醫館,看來是隱世的神醫。

其後香香接受訪問時表示,該脊醫是由圈中好友介紹俾佢,已幫襯了好幾次。另外香香又再笑笑口否認大肚,話有好消息時一定會通知大家!

拖到實幸福放閃

香香與強強經常合體現身,早前香香唔使開工,翹實強強到將軍澳中心商場撐枱腳,食飽飽離開食店巧遇本刊記者,戴住黑超的香香難掩幸福強光,甜笑冇停過,強強亦看似習慣面對鏡頭,雖然對記者提問不發一言,但佢全程笑得燦爛,拖實靚靚老婆出巡,非常風騷!強強娶到肯為佢推劇生B的香香公主,令唔少宅男羨慕又妒忌,又的確抵佢威威嘅!

香香與強強離開將軍澳中心寓所,落商場食越南嘢醫肚,食飽飽拖住手離開,二人雖然街坊裝打扮,依然笑住任影唔嬲。

 

兩公婆行到邊閃到邊,兩隻手愈拖愈緊,好似搽咗萬能膠,隔住個芒都聞到甜味。