拒讓位被笑厚粉王賢誌獲網民力撐EQ高

王賢誌：長知識

王賢誌自今年4月開始擔任東華三院主席，之後就為參與東華三院各項慈善活動而非常忙碌，經常要周圍飛，上周五(6日)佢就要飛到鄭州再轉車去開封，出席由東華及北京清華大學首次合辦嘅「東華三院‧清華大學甫智方舟中學生暑期扶貧計劃」，回港唔夠廿四個鐘又要飛，十足「空中飛人」！

不過今次王賢誌話佢一落機就收到朋友轉發某位小姐所出嘅po文，該位小姐留言話：「我46分鐘前才到counter，連在場負責排隊分流的職員都著急，催我快啲去check in行李，咁我見前面得一個男乘客排隊，咁我就即刻換『可憐樣』mode求佢畀我出去check in先，結果係唔㑹work的，佢直接話『我都好趕喎、我差唔多夠鐘』、『哎呀economy個條隊好似仲快啲』，點解佢唔會讓我？因為⋯⋯佢係前TVB司儀／現為東華三院的，王賢誌⋯⋯Vinci Wong⋯⋯（原來佢同阿媽一樣生日，都係天秤座，所以好厚粉）」

Vinci對於這位小姐嘅po文咁樣回應：「其實當時business class check in counter條隊只得兩個人排，我排第一，呢位小姐排第二…我自己亦確實幾趕，我飛鄭州班機係12:50起飛而我差不多12點先到機場…隔離econ class counter又完全冇人排緊，所以我提議呢位小姐過去嗰邊可能仲快啲…我承認我冇讓俾呢位小姐，如果因為咁令到佢覺得唔舒服，抱歉！厚唔厚粉？見仁見智啦…不過我真係第一次聽人講天秤座嘅人都好厚粉，又長知識嘞！#估唔到飛緊都有是非 #是非比飛機傳得仲快 #下次都係早啲出機場」

網民都一面倒力撐Vinci，紛紛留言指「讓係人情，唔讓係道理！」仲大讚Vinci好有修養、EQ高㖭！

Vinci更逐一多謝支持同安慰佢嘅網民。