LMJ2拷貝

搞泰國睇樓團 慘遭拖佣金 羅敏莊:我一蚊都冇收過!

羅敏莊去年用三百萬在泰國置業,計劃五年後移居當地過半退休生活,8月更開設fb專頁,做KOL介紹泰國樓盤,其實去年11月開始,她還親自帶團去泰國睇樓,近日就有團友爆料,指羅敏莊先後帶了兩個睇樓團,當中就有廿多團友成功在泰國買樓,令她大賺七位數字佣金。本刊記者向羅敏莊求證勁賺七位數佣金一事,她表現無奈:「唉!梗係冇啦!邊搵到錢?我諗佢哋(指地產公司)就賺好多,但我冇收過錢!佢哋成日話計畀我,但一路都冇,我一蚊都冇收過!」

撰文:東方新地

圖片:新傳媒圖片庫及網上圖片

羅敏莊 貼錢去泰國睇樓

因為喜歡泰國的關係,羅敏莊每年至少去當地旅行三四次,如同另一個家,去年更在泰國買樓,計劃五年後移民當地過半退休生活,亦開始成為泰國睇樓KOL,見她在fb專頁狂發po勁sell泰國樓,外人以為她靠賣樓賺到笑,但羅敏莊表示自己從來冇收過錢,反而是貼錢去泰國睇樓。

「我因為鍾意泰國,睇樓又係自己興趣,咁自己都有份睇,亦睇得好開心!」羅敏莊坦言是自己主動聯絡一間地產公司合作,叫對方畀樓盤她推介。「係我撩佢哋合作嘅,咁我係咪要攞晒啲佣呢?咁人哋都要搵員工follow嘅。我暫時只係帶咗兩個團,分別係上年11月同12月,我啲fans都有參加,佢哋同我講一團裡面有成12丶13個人扑槌買咗樓!佢哋問我點解唔收錢咁蠢,地產公司有話計畀我,但一路都冇畀,所以我一蚊都未收過。」

只係帶了兩次團,就成功為地產公司賣出多層樓,到底實際佣金收益有幾多,羅敏莊表示唔清楚。「發展商同地產公司點拆帳我唔知,總共賣出幾多層樓,真正數字我亦唔清楚!」

羅敏莊
上年聖誕羅敏莊同老公陳國邦及囡囡一齊去泰國旅行,一家三口到曼谷的火車夜市吃喝玩樂。
羅敏莊
羅敏莊plan好五年後移居泰國同老公過半退休生活,由於當地生活指數比香港低,當日羅敏莊同老公買咖啡同雪糕邊行邊食,都只需要45泰銖(折約港幣12元),只係香港三分一使費。
羅敏莊
羅敏莊坦言去泰國想生活化啲,每次都會留兩星期,每天瞓到自然醒,然後行吓街食吓嘢!老公亦被她感染愈嚟愈喜歡當地。
羅敏莊
羅敏莊親自帶團到泰國睇樓,三日兩夜睇樓團,曾試過一日連睇6個樓盤,羅敏莊咁博,難怪銷售量驚人,帶兩團已經替地產公司賣出廿多個樓盤,發展潛力驚人!

決定唔再合作

不過羅敏莊已下決定,未來不再同那間地產公司合作。「我決定唔再同嗰間地產公司合作,佢哋之後有同我講分番佣畀我,想同我繼續合作落去;但我希望可以再做好啲,因為始終係用自己名義,要對團友負責。我唔想只係睇樓先照顧佢哋,舉個例說,因為我覺得間地產公司只係顧及團友買樓時嘅感受,但買完樓,散啦,就即刻走,完全冇理佢哋點離開,咁佢哋係做地產我亦好理解,而我希望對團友可以呵護多啲,唔係睇完樓就唔理佢哋點樣走,我希望幫佢哋安排好啲,至少搵車接送佢哋。」

羅敏莊
好友梁奕倫,12月亦有跟羅敏莊去泰國睇樓,三日兩夜同團友一齊吃喝玩樂,梁奕倫更加落埋場孖羅敏莊拍片介紹泰國筍盤,但Mimi說梁奕倫是自費隨團,好唔話得。

梁奕倫 羅敏莊

羅敏莊
去年在fb專頁打正旗號賣廣告,羅敏莊更親自帶團去泰國睇樓,但原來至今未收過一蚊佣金。
羅敏莊
羅敏莊拍片介紹樓盤,更360°環迴式拍攝,帶大家睇四周環境。
羅敏莊
在Facebook開設「我要睇樓團」專頁,上年八月開始做泰國睇樓KOL,每次po文介紹泰國,羅敏莊都會細心逐一回覆每個網民留言,留言更一面倒對她讚口不絕。

做旅行社代言

羅敏莊表示已同一間大型旅行社傾妥合作,以代言人身份帶團。「我想貼心啲等佢哋覺得好似旅遊咁,唔係單係睇樓,成個trip要令佢哋有一種開心嘅感覺。」

成為KOL不足半年時間,已經成功建立泰國睇樓icon,但羅敏莊卻表示無意瞓身搞泰國地產:「我因為鍾意泰國,先開始睇當地嘅樓,想有自己夢寐以求嘅生活,我自己唔係好叻搞生意嘅人,我亦都唔係一定要賺好多錢,最緊要係自己過得開心,如果只為賺錢就唔會喺當地買樓啦!啲人成日話我點解唔用啲錢喺香港炒樓,我只係想以主持,Artist身份,帶人去當地睇樓,如果將來真係可以賺到錢,就當bonus!」

羅敏莊
羅敏莊為移民鋪路,對泰國生活環境、娛樂,以至教育醫療都深入研究,早前就到泰國做牙齒藍光漂白。
陳國邦 羅敏莊
因為在當地置業關係,陳國邦成功申請了當地銀行提款卡,加上之前買的物業已經放租,最近去泰國就可以將租金當使費。
羅敏莊
羅敏莊鍾意泰國,因為消費指數比香港低好多,加上泰國好多設施亦已經好先進,只須使三分一價錢,就連羅媽媽亦不時跟孝順女去泰國玩。
羅敏莊
羅敏莊去年將香港物業二按,一炮過以3百萬買下曼谷黃金地段實用面積800呎連家電豪宅單位,物業頂樓還有Sky pool,絕對係港人夢寐以求嘅理想居所。

羅敏莊:唔想囡囡有壓力

記 : 記者/羅 : 羅敏莊

記 : 係咪最開心係老公同囡囡受你感染,依家都咁鍾意泰國?

羅 : 當然!其實喺陳禛3歲開始,我已經成日帶佢去泰國玩,我哋自己去旅行,可能只係搵地方行吓街咁,但小朋友係要有好多玩樂嘅地方,泰國有好多遊樂場,泳池,就連小朋友廁所都好靚,當 地人對小朋友又好有禮貌,始終小朋友嘅成長過程係好重要。

記 : 老公之前唔係咁贊成你喺泰國買樓?

羅 : 男人諗嘢係冇女人咁堅決,佢只係問得唔得㗎!始終要二按香港層樓,攞錢去嗰邊買樓,但呢幾次我哋一齊去泰國旅行,佢體驗咗嗰邊嘅生活,佢覺得係可行嘅!仲話都幾正!

記 : 囡囡依家係咪讀緊國際學校?

羅 : 係,因為國際學校功課會冇咁大壓力,咁嗰度有好多外國人,都唔會留意娛樂圈啲嘢,因為如果太過被關注,無論好定唔好,其實都會有一定嘅影響。

記 :想移民泰國,係咪為咗囡囡將來教育問題?

羅 : 自己唔揀傳統學校,都係唔想個女有太大功課壓力,嗰邊啲國際學校,同香港學費差唔多,但就唔似香港要先畀昂貴入場費!

記 :係咪幫囡囡喺泰國已經搵咗學校?

羅 : 都睇咗啲國際學校,嗰邊啲學校有湖,有網球場,係英籍老師,師資同學習環境都好好!

羅敏莊 王君馨 陳禛
陳禛得意可愛又唱得,唔少人邀她演出,不過媽咪全部篩選過,上年12月,羅敏莊就帶同女兒返娘家 TVB演出《 流行經典50年》,當日陳禛更在化妝間派她父母自資錄製的新碟給家燕姐、王君馨及曹永廉等
陳禛 羅敏莊
陳禛都有親自試玩泰國嘅playground!

陳禛 陳國邦 羅敏莊

陳禛 羅敏莊