城城

新年願望恨添丁 城城:想追多個仔!

郭富城昨日出席狗年新春活動,做咗爸爸嘅城城勁風騷大談湊女經,餵糊仔、氹瞓覺講到鬼咁開心,仲話想喺狗年追多個仔㖭!

 

撰文:東方新地

圖片:東方新地

城城熱鬧過新年

城城身穿藍色唐裝衫配襯藍色太陽眼鏡風騷現身,心情大靚嘅佢笑到四萬咁口,仲即場大派利是,城城新年屋企好熱鬧:「結咗婚、多咗個女,屋企熱鬧咗好多!(喺屋企過年?)過去咁多年放假嘅時間都好短,今年就提早喺過年前完成電影宣傳,好好享受家庭樂,依家做咗爸爸嘅心情都仲係好興奮。」至於新年願望?城城興奮表示:「追多個仔啦!」仲話希望今年可以拍三部戲,下半年就舉行50場巡迴演唱會。

 

城城
城城戴上藍色太陽眼鏡著上配襯藍色唐裝出席新春慶典,在台上拆開兩個大利是封,裏面寫著「強」字及「旺」字,向在場市民拜年。
心情大靚嘅城城笑到四萬咁口,仲即場大派利是。
心情大靚嘅城城笑到四萬咁口,仲即場大派利是。

想生多幾個

 

有女萬事足嘅城城指今年新年特別開心:「有小朋友係好熱鬧,成家都好開心,成個世界真係快樂咗好多,希望寶寶身體健康、快高長大、聽教聽話、孝順父母。其實媽媽都成日叫我快啲追多個仔,抱孫女都唔夠,想抱多個孫仔,我哋都好孝順,會盡量努力,但順其自然,希望今年可以追多個仔。」問到佢想生夠幾多個?城城笑笑口話:「如果太太唔怕辛苦,我都想佢生多啲,一仔一女喺現代社會都足夠,但如果佢唔辛苦可以生多幾個。」

城城
城城翹住兩個財神行紅地氈入場,並主動向財神獻吻,十分風騷。
城城
經常將囡囡掛喺口唇邊嘅城城,坦言同老婆會努力造人,想追番個慈姑椗。

 

幫囡囡沖涼

 

城城又分享湊女經,自爆有幫手餵糊仔畀囡囡食,不過講到換片佢就話:「有喺側邊睇囉,希望下次可以挑戰沖涼啦,最驚整親佢,見過太太幫佢沖涼濁親,飲咗啖水,自從咁樣我就唔敢啦。我有氹佢瞓覺,希望做嘢之前可以帶佢出街玩,帶佢去公園玩係我下一個目標。(識叫爸爸媽媽未?)未咁快,但我好奇佢會講廣東話定普通話先,因為我同佢講廣東話,太太就講普通話。」城城笑指囡囡逗咗好多利是,但太太方媛唔捨得拆:「佢話想留番畀個女做嫁妝。」

城城
做咗爸爸嘅城城對同場嘅小妹妹呵護備至,父愛氾濫。

 

城城
唔單止小朋友,城城仲主動撩狗仔玩。
城城
城城與同場嘅李丞責師傅合照。
城城
城城話雖然工作好辛苦,但返到屋企就會好開心好warm:「人生有咗BB好圓滿,追多個仔就滿上加滿,盆滿缽滿!」