方媛 擇日開刀 郭富城 撲返港陪產

郭富城4月在半島酒店迎娶國產網模 方媛 (Moka),下月又即將榮升「城爸」,半年內雙喜臨門。方媛懷孕初期大部分時間都在上海安胎,近月長駐香港等生,據知城城已找高人擇定吉日,仍在國內為電影《破局》宣傳的他,將會撲返香港陪產,見證城B出世。老公城城不在港,方媛悶到要急call母親陪high tea,陀住八個幾月巨肚的她,日前更去柴灣影樓影大肚靚相,樣靚手腳纖弱零水腫,盛傳陀女方媛得天獨厚,一啲都唔論盡,生夠一隊足球隊都仲得。

郭富城拒回應 方媛 懷「城種」

郭富城今年4月突然結束鑽石王老五生涯,拍拖只有年幾的方媛(Moka)一坐低即食糊正式做城嫂,有傳當時她已懷有「城種」,但城城一直未有回應,Moka對懷孕一事亦非常低調,近月不時穿大肚婆恩物高腰傘裙來遮掩漸漸隆起的肚皮,不過紙包唔住火,預產期在9月的Moka早前被影到返上海探父母,素顏的她已明顯見肚。

Moka懷有「城種」後今非昔比,除正式獲賜城嫂名份外,行頭亦愈來愈富貴,早前更拖實城城去置地血拼,拎住袋名牌戰利品不知幾威威。

避鬼節提早開刀

城城婚後對 方媛 愛謢有加,有指因為方媛不太適應香港生活,所以早前他豪擲8千萬在上海靜安區購入兩層同一地段的豪宅,一層是自己與妻女住,另一層則供外父外母住,方便兩老照顧 方媛 與BB。知情者透露:「Moka所有屋企人同朋友都喺上海,佢覺得喺香港好悶,出街又驚畀記者影相,但佢想BB喺香港出世攞香港身份證,所以最後都決定喺香港生,城城已安排好外母嚟香港幫手照顧,仲請咗兩個星級陪月,全天候照顧妻女嘅起居飲食。城城早前佢喺加拿大拍緊莊文強套《無雙》,下個月要開翁子光導演嘅新戲,呢個星期又飛國內做宣傳,真係好少時間陪老婆,不過佢已經請定假,Moka擇日開刀嗰日佢一定會掉低所有工作,撲返香港陪產,因為9月撞正農曆七月鬼節,高人話成個舊曆七月都唔適宜生B,所以Moka好大機會8月尾就開刀。」

剛剛在加拿大拍完電話,城城近日又飛到國內多個地方為電影《破局》宣傳,預計周五(18日)才完成工作返港,準備陪Moka生B。

 

攰爆外出

8月5日晚飯時間,城城一支公離開城堡,戴上口罩在大門口等車,期間他四圍望又不停打電話。近月城城周圍飛趕拍電影及跑宣傳,一攝到時間就返港陪老婆,當晚見他兩眼通紅狀甚疲累。

返香港待產 影大肚寫真

為搵奶粉錢,城城未能長時間留在Moka身邊陪安胎,不過他早已為Moka做好所有準備,提供最好的坐月所需,除了book定養和頂級私家病房外,據知還請多兩個保母及助手,方便陪住Moka產前產後外出。日前Moka被影到在上海機場現身,有指城城完成手頭上的電影工作後,會飛上海接老婆返香港待產,但原來Moka已靜悄悄返港。周一(14日)下午一時許,頭戴草帽不施脂粉的Moka,在女助手陪同下步出大坑的「城堡」,到達柴灣的工業大廈,Moka落車時帽又跌鞋又甩,好彩女助手眼明手快,當日Moka兩手揈揈只拎住自己個名貴小手袋,粗重物品全由女助手負責,現場所見女助手則抽住幾套衫及大袋裝有鞋盒的紙袋,二人上了一間studio,相信當日Moka是去影大肚靚相。

周一(14日)城城身在北京宣傳新戲,Moka在女助手陪同下到達柴灣工業區,一襲白色高腰連身裙,正面睇完全唔似大肚婆。

 

落車時一陣怪風吹起,Moka頭上的草帽被吹落地,搞到佢披頭散髮又甩鞋,場面有點狼狽。

 

Moka與女助手進入一幢工業大廈搭車立上影樓,戴帽戴黑超的Moka頭耷耷唔想畀人認得,不過懷孕後谷奶升cup的她露出大大條事業線,好吸睛。

 

Moka想在香港生B,城城一早在養和book定頂級私家房,錫老婆錫到燶。

陀B八個多月 Moka從不戒口

至晚上八時許,化了個濃妝的Moka與女助手一齊離開,坐車直達銅鑼灣,影了大半日相的大肚婆應該非常肚餓,Moka在多間食店外左揀右揀,最後選擇食日本燒烤。陀B八個多月以來,Moka從不戒口,嚐辣的她繼續食麻辣火鍋,熱氣的日本燒烤更加冇問題,見她皮膚白裡透紅,又肥胎唔肥人,30歲的她陀B陀得非常輕鬆。當晚Moka食飽飽離開燒烤店,在店外等車時本刊記者上前訪問,她顯得非常慌張,躲在女助手背後,而女助手亦出手擋駕,問Moka是否留在香港擇日生B及幫囡囡改咗名未?她都一概唔答。

晚上的Moka巨肚突現,雖然腹大便便行路依然輕盈,在銅鑼灣鬧市周圍搵好嘢食。

 

Moka似乎對日本菜好有興趣,不停在店外睇餐牌研究,最後幫襯日本燒烤。

 

食飽飽call車返城堡前,本刊記者上前採訪,Moka全程避鏡頭,拒絕回應任何提問。

避記者 call UBER出入

為了讓Moka好好安胎,城城曾叮囑Moka多留家待產,不過Moka經常呻悶,早前更急call母親來港陪high tea,日前她在微博上載兩母女high tea相,留言:「喜歡工作忙碌的每一天,最近有點空的好不習慣,出來唞唞氣。」城城不在港的日子,她不時在女助手陪同下外出,而每次都是call UBER,看來是想避過記者耳目。

有指Moka唔習慣悶爆的安胎生活,早已安排母親來港陪待產打發時間。

 

生完再下一城

做了多年王老五,城城突然榮升人夫人父,負擔與責任都大了,心態上更有巨大的轉變,知情者透露:「自從Moka有咗,城城意識到自己即將踏入另一個人生階段,生活將會有好多轉變,唔再好似以前咁優柔寡斷,依家出去做嘢,佢會同其他爸爸傾偈取經,之前未知仔定女,佢話仔女都冇所謂,因為佢計劃唔止生一個,最好有仔有女,再加上郭老太有孫抱不知幾開心,佢話想屋企再熱鬧啲!城城咁孝順點會逆阿媽意,Moka亦唔反對繼續生。」

有指城城希望Moka低調陀B,早前戴住金勞(勞力士錶)的Moka在車內自拍,鏡片竟反映到她肚凸凸,她即時秒刪照片。

 

「城堡」擺放風水陣

一向篤信藏傳佛教的城城,早前更請來高人指點,在其大坑寓所布下追仔陣,除了在室內擺放風水陣外,在天台亦放了九條青龍、四大天王及一對瑞獸,除了可保家宅平安外,更旺丁旺財兼擋煞。有「城爸」負責搵錢養家,「城媽」負責生完再生,頂樓全層加天台共六千呎的「城堡」,應該都夠晒住!

 

全文完