日本神還原台版《那些年》 經典場面重現眼前！
原作台版《那些年》
「那些年錯過的大雨…」由九把刀同名小說改編的青春校園電影《那些年，我們一起追的女孩》，2011年上映時在各地爆紅，沈佳宜與柯景騰的故事令萬千觀眾憶起自己「那些年」的青澀歲月，兩位主角柯震東及陳妍希亦成為炙手可熱的演員。現時大家提起往事，都唔講「以前」，改口講「那些年」啦！
翻拍日本版
日本版《那些年》(《あの頃、君を追いかけた》)日前公開首支預告片和宣傳海報，日版沈佳宜由日本當紅女團乃木坂46主將齋藤飛鳥飾演，男主角柯景騰則由男星山田裕貴擔綱。原版的《那些年》故事設定在1994年的台灣，而日版《那些年》的年代背景將會變成2000年代的日本。
背景改成日本，兩位主角當然唔會係同一個名，佢哋分別叫「水島浩介」及「早瀨真愛」。
重現多幕經典場面
｜海邊排排坐
日版有幾跟足原作台灣版嘅《那些年》？首先電影其中經典一幕，一眾演員排排坐喺海邊，仲記得當年有唔少人約齊一班好友搵個靚位，齊齊去影番張一模一樣嘅相，諗起都覺得青春！
｜背脊篤不停
記得戲中男主角因經常上堂瞌眼瞓，而遭女主角用原子筆篤背脊，日日咁篤法，搞到男主角件白裇衫都留低哂藍色原子筆痕，而日版當然都唔少得有呢一幕。
｜光頭與馬尾
記得男女主角因成績鬥高分而打賭，男輸咗要剃光頭，女的就要紮馬尾，後來男主角輸咗「找數」去剷咗個光頭。但出奇地，贏咗的女主角竟然都紮起馬尾番學，喺一眾男角色面前行過，女神仙氣咁出現，男主角就梗係睇到出哂神啦。日版同台版比，唔知大家鍾意邊個嘅演繹多啲？
｜自由格鬥賽
仲記得男主角柯景騰因為認為男生都要喺女生面前表現自己最強嘅一面，所以喺學校舉辦咗個「自由格鬥賽」，喺日本版山田裕貴亦都打到爆哂缸！
｜平溪放天燈
柯騰同沈佳宜去約會，於平溪放天燈呢一幕非常經典，日版非常跟足原作，兩位主角同樣齊齊放天燈。
日版女主角 齋藤飛鳥
現年只係19歲的齋藤飛鳥原來係個日本緬甸混血兒，現時係日本當紅女子偶像團體乃木坂46主將，喺日本超有人氣。雖然飛鳥妹妹只係第二次拍電影，但相信會為電影帶來一定叫座力。
日版男主角 山田裕貴
而家27歲的山田裕貴2011年拍攝電視劇《海賊戰隊豪快者》以演員身份出道，7年以來曾參演多套電視劇，不過拍電影就係第一次！大家覺得佢同柯震東有冇相似之處呢？
