NG1

最揪得碩士 伍允龍:我斷過兩條肋骨

《新地》請來於《城寨英雄》演龍成虎嘅伍允龍做訪問,原來伍允龍唔止功夫了得,更擁有碩士學位,能文能武,絕對係最揪得碩士!

延伸閱讀︰

《城寨》張頴康登場 拳佬牙佬反目成仇

拆解《城寨英雄》8大謎團

新地:新 伍允龍:伍

葉問徒孫

新:你係葉問的嫡傳徒孫?
伍:係,我師傅係「講手王」黃淳樑,係葉問最出名嘅徒弟,亦係李小龍師兄,好多嘢都係佢教俾李小龍,《葉問2》黃曉明演嗰個角色就係我師傅。
新:你係天生鍾意打功夫定因為你爸爸係教蔡李佛拳?
伍:我諗係男仔都鍾意郁動、打功夫,不過好大原因都係我嗲哋同我啲舅父,我7歲移民美國,娛樂唔係好多,會喺後園教我套路、功夫,咁啱我啲舅父又係教功夫,一個教洪拳、一個教詠春。

IMG_2710a

不諱言曾有打架經驗,「做一個男仔同武術家,細個都會曳過,不過大個咗覺得唔值得,山外有山、天外有天,分分鐘一鎚打暈你,同埋唔用拳頭解決嘅問題我覺得最好,除非要保護人或者自己嘅生命。」

擁碩士學位

新:你有碩士學位,你讀咁多書同你咁好功夫有冇衝突?

伍:功夫嘅嘢都係一個技術嚟,讀書唔會阻止咗嗰種技術嘅,唔會有衝突嘅!

新:你想喺呢行發展,其實唔使讀咁多書吖!

伍:自己想做呢行,不過大家都知呢行冒險好高,未必話想做就做到,實際啲讀飽書有個back up plan。所有練過功夫嘅人都有幻想過拍功夫片,我都係,師傅過咗身之後我返香港跟啲師兄弟學功夫,認識咗行內嘅朋友,演過一啲好小嘅角色,對呢行有啲興趣,最初期做武師,跟住喺藝人之家(以演藝人為主的基督教團體)識咗鄭敬基,佢介紹錢嘉樂俾我識,嗰時佢啱啱開緊部電影叫《少年阿虎》,需要個副武指識詠春、洪拳、蔡李佛拳,又可以用英文同啲演員溝通,於是請咗我去度啲打嘅畫面同訓練吳建豪、安志杰,算係呢行第一個正式嘅工作。

拍過愛情片《獨家試愛》及《爛賭夫鬥爛賭妻》,「不過如果你問我,我喜歡拍動作片,用身體語言表達去講個故仔。」

斷過兩條肋骨

新:你識幾多種功夫?
伍:我係蔡李佛拳同詠春教練,另外洪拳、跆拳道黑帶,有練柔道柔術、菲律賓魔杖、西洋拳、泰拳,譬如拍套戲要打螳螂拳,雖然我未學過,但可以模仿到同快啲上手,我細個學咁多功夫,冇諗住用嚟拍戲,只係想做一個全面嘅武術家。
新:試過受傷?
伍:有,之前我搵吳建豪、安志杰開咗部戲《潛龍狙擊》,嗰部戲受傷都多,第一日就俾棍打爆眼,要縫針,冇幾耐撞到鐵柱爆咗膝蓋,之後俾安志杰踢斷兩條肋骨,不過因為自己做監製,資源唔係好夠,咪紮住繼續拍頂埋佢,聽講插入肺,會死㗎!不過我好相信「痛苦係暫時,電影係永遠」,如果套戲做得唔好,我會regret,但我肋骨會好番。

說到跟非武功底的陳展鵬在無綫劇《城寨英雄》中過招,「佢拍劇拍得好密,所以演技好有技術,同佢打比較同一個專業武打演員打唔係好大分別。」

TVB拍劇辛苦

新:拍戲遇過咁多動作巨星,邊個最好打?
伍:真正好打同電影好打係兩件事,我合作咁多武打演員喺佢哋身上都學到好多嘢,有一個我要提,係洪金寶大哥,我好欣賞佢拍嗰個style,花巧得嚟實淨,實淨得嚟花巧,有嘢睇得嚟唔會覺得虛,同埋佢唔止識拍戲,仲識得演,喺現場乜嘢部門佢都好熟悉,我好欣賞佢嘅專業態度同佢識嘅嘢。
新:拍電影到拍電視,慣唔慣?
伍:初初我係唔慣個環境,TVB比較大,有時搵個洗手間都唔知喺邊,我嗰時worry拍電視要拍動作唔夠時間,不過我感覺佢哋好認真對打鬥畫面,例如拍擂台都拍咗六、七日,絕對係足夠,時間可能長啲,有時外景接廠景,廠景接外景,就會辛苦少少。

每日舉重、跑步、壓腿維持身形,「我初初冇練到咁犀利,係晶哥同我講:『我知你好打得,不過觀眾睇外表多啲,如果你嘅身材可以配合埋你嘅功夫就最好!』」

全文完