李佳芯自嘲自己都有「死角」 化妝師曾警告千祈唔好…

早前李佳芯(Ali)與剛由加拿大回港的岑麗香一同出席FWD MAX衝破極限挑戰賽2018。期間,Ali就嘲自己曾被化妝師警告千祈唔好做一樣事,以免變得唔靚!究竟係咩事呢?至於同場的香香則回應好友鍾嘉欣已誕第二胎一事!

撰文:東方新地|圖片:新傳媒圖片庫

李佳芯自嘲自己都有「死角」

日前,李佳芯與岑麗香一同出席極限挑戰活動,同為靚女的二人不約而同齊齊晒美腿!當Ali接受傳媒訪問時,她直言自己自細已是個運動健將,會玩繩網、平行木及高低綱等,聽落少啲體力都玩唔到以上運動!她續指比賽卻較少參加。

對於極限運動,Ali就坦言曾玩攀石,但因到高處再望落地下,先發現原來自己有少少畏高,仲話因已經過咗玩笨豬跳的年紀同冇勇氣,所以亦未曾玩過笨豬跳,但就反而想試下跳降傘!

當問到Ali覺得咩類型的女生較吸引,她指自己較喜歡女生短頭髮同曬黑,但因曾經有一次化妝化到好黑,結果令化妝師跟她說千祁唔好曬黑,因為話曬黑後完全唔靚,所以她從來都唔會曬黑,因為知會唔襯自己!

香香自爆俾人咬

另一方面,同場出席活動的香香剛由加拿大回港,冇見一排,香香望落依然神彩飛揚!她接受傳媒訪問時,表示最近努力增肥,希望可以長多啲肉,更笑稱:「不但是為了生BB,肥美些被人咬亦不錯。!」難道老公平日很喜歡咬她?

香香於加拿大養尊處優的生活相信不少人都非常羨慕,她亦指最近多了時間自己煮食,身體都健康些!提到造人大計,香香表示仍是順其自然,會期待新生命來臨!

香香回應好姊妹誕第二胎一事

近日有傳鐘嘉欣已秘密誕下第二胎,對此,香香則不停地笑說:「我不知道,我對著鏡子已經練了100句不知道,還是等當事人公佈吧。」 睇嚟大家都係要等嘉欣BB親自公佈啦!

李佳芯 肯捱肯搏好相與

想當年由model做起嘅Ali,原來在旅遊記者界出名肯捱肯搏好相與,大約13年前開始已多次跟住記者上山下海,由台灣、日本,去到意大利、澳洲、斐濟,最勁仲去埋南極!以下的版面同靚相,眼利嘅網民又記唔記得先?

01|當Model第一次 走勻全台灣影婚照(2005年)

13年前的Ali剛投身Model界(當年𡃁模呢個term仲未出現!),還未做有線主持,第一次同記者出Trip,人生第一次的婚紗相就要走勻全台灣影。當年的妝髮造形今日睇起上來當然娘味十足,不過當年唔興過份的Photoshop、唔興假眼睫毛和大眼仔,Ali個樣同今時今日差唔多,證明靚樣真材實料啦!

攀山涉水擺甫士

影過婚紗相的人就知,靚相一般要在兩日內瘋狂影晒;Ali在拍攝期間要著住婚紗攀山涉水、公路狂奔:爬上台南的七股鹽山、在青青農場拍攝薰衣草和野花遍地的場景,忍受38度高溫及長期暴曬的拆磨。

當年的記者憶述,拍攝當日台北天氣驟晴驟雨,拍攝團隊只好躲在車內,待雨停時Ali立刻跑出車影,影不到兩三張又下雨了,又要躲起來。如是者,跟天公玩足一整天躲貓貓。Ali都以專業態度面對,第一次出Trip,其實好難得!

翻閱2005年的陳年舊雜誌,當年記者好鍾意寫詩,而影相的攝影師亦好鍾意Model頭戴一大朵花(利申那位是台灣婚攝公司的攝影師)。

02|天寒地凍 沖繩追櫻(2007年1月)

為了向廣大的讀者報導日本的櫻花情報,記者往往要帶同Model 提早出發。去完台南的1年半後,Ali跟記者2007年1月出發到沖繩,在短短5日拍攝時間內要影櫻花、又要影海邊Resort。當年的記者指,那時候Ali已經是模特兒界的女神,但過程雖然辛苦捱凍,一樣好影無架子有交帶。

春寒扮初夏 背心短裙頂硬上

1月的沖繩還是冬天,只有10度的低溫,但為了畫面好看,拍攝時全程要穿上春裝,背心短裙,女神一樣拍心口頂硬上,抵讚!

白滑背脊第一露!

要知道旅遊記者去一個Trip唔只返一隻稿,當年1月已經要去影Resort,你估下呢間無人曬太陽嘅Resort,當時有幾咁凍?就係咁,Ali首次露出了白滑背脊畀廣大讀者。

Follow Ali to…

去到海邊resort,蔚藍海岸耍脾氣,時晴時雨,大風,陰陰涼,女神毫不扭擰,要著bikini落水永不say no。最正係去到海邊,攝影師為滿足親近女神欲望,情不自禁,影了一大堆拖住著得性感嘅Ali女神隻手踏浪嘅相,咦,拖手相,咪仲早過instagram手拖手遊世界的 #FollowMeTo情侶Murad Osmann,同埋日本時興嘅男友視角相囉!

03|無P圖!早過男神勇闖南極(07年11-12月)

翻查資料,當時的Ali未做主持,但當時在model界她都多見報,算搶手貨。原來女神仲早過洪永城兩年去南極拍攝(編按:洪永城在NowTV年代曾以幕後身份,與黃貫中前往南極拍攝《一個地球》),係咪威先!

辛苦捱到去極地

咪以為去極地就好爽皮,其實要坐足兩日半的飛機,由香港飛荷蘭落阿根廷,幾乎環遊全球,然後再捱30個鐘的船程⋯⋯聽到都想準備嘔吐袋。坐郵輪入南極,大浪到有如坐足兩日海盜船,而且南極天氣變幻莫測,能否如期登岸也需聽天由命。所以,女神每日就像飛虎隊般,隨時候命。

自備企鵝拍Selfie

去南極當然想睇企鵝,但為保護牠們,規矩講明必須跟企鵝保持最少五米距離,以免影響企鵝的生活。唔知係咪女神太靚(定手上的企鵝公仔?),對人類已沒有戒心的企鵝們也會自動走近,又或乖乖站在附近任影唔嬲。

陰公!出場少過企鵝

揭返當年本雜誌,今次南極之旅Ali出場位主要在封面,文中幾乎只有冰山大相同企鵝相,當同船嘅大陸客都有full page赤祼照一大張,Ali只獲得細碎行行企企食飯典床版面,好在呢輯相出土了,否則政府圖書館都睇唔返!

04|終極一脫 三點式玩斐濟(09年)

雖然Ali沒有好似一般𡃁模出寫真集,平日出席大台活動都鮮有走性感路線,不過09年時女神其實不介意健康性感,和記者去斐濟時,就大曬Bikini +長腿。

又到揭雜誌時間,斐濟出名陽光海灘,配上Ali同樣燦爛的笑容,你估下呢張拋花球青春少艾相出咗幾大版?

05|跟水哥達人遊澳洲(09年7月)

2009年的Ali已經成為有線主持,主持《體育王》,被網友追捧為「體育女王」,知名度已大大提升;難得就到檔期跟雜誌去遊斐濟,同一個Trip順便Part埋飲食達人紀曉華(Walter Kei),去埋澳洲塔斯曼尼亞歎世界食好西。

據當時去採訪的旅遊記者憶述,說採訪塔斯曼尼亞東岸蠔場時,位處南半球的塔斯曼尼亞正入冬,到訪之時白天只有8-10℃,天寒地凍,Ali 和紀曉華都要著上「賣漁勝」裝束落水。咁嘅情況下正常人都會嗌凍,但當時人氣已不俗的Ali毫無怨言,震住都快手開工。

06|意大利慢食、揸靚車之行(08年5月)

今次意大利之旅,Ali跟著記者採訪拍攝Alfa Romeo的四天古董車托斯卡納豪華自駕遊,當年都索價2千歐羅!不過坐在經典的Alfa Romeo Spider 1600老爺車,駛過一片片鮮黃油菜花田,穿梭於一字排開的柏樹之間,享受頭髮被風吹起的感覺⋯⋯好屈機呀!

意大利的五漁村(Cinque Terre)近年成為亞洲人的熱門之選,女神當年去到,除了學習地中海人悠閒步伐,在漁村影靚相,仲有機會大嚼當地海鮮同松露。

讀者留言