李佳芯

李佳芯女神育成之路 未紅前絕密靚相曝光 超抵諗親切實錄

最新娛聞

廣告

由節目主持做到視后的李佳芯(Ali),想當年未做Cable主持前,已經是旅遊記者熱門選用的Model,更多次成為《新假期》的封面女郎。當年李佳芯不單止上山下海,最勁甚至去過南極,計起來仲早過旅遊大師兄洪永城兩年!即刻同大家回顧下Ali的女神初育成之路!

編輯:東方新地|原文:新假期|圖:新傳媒圖片庫

李佳芯
李佳芯Ali十多年前已多次同《新假期》上山下海,由台灣、日本,去到意大利、澳洲、斐濟,最勁仲去埋南極!

李佳芯 多次獻身《新假期》

李佳芯Ali自2012年由收費電視轉到大台後,演姣精、演被人強姦演得又放又好戲,到2016年已在無綫《萬千星輝頒獎典禮2016》取得飛躍進步女藝員,2017年更憑《與諜同謀》和《踩過界》兩部劇集打低胡定欣和宣萱取得大馬視后「我最愛TVB女主角」獎,成為首名奪得「飛躍進步女藝員」僅兩年就獲封視后的女藝人。原來未紅前的Ali在旅遊記者界已經頗出名,出名肯捱肯搏好相與,大約十多年前已多次同《新假期》上山下海,由台灣、日本,去到意大利、澳洲、斐濟,最勁仲去埋南極!以下的封面同內容,眼利網民又記唔記得先?

李佳芯
由收費電視主持,轉到大台做是非精,再由情婦角色做到入屋,全靠呢副煞食笑容。
李佳芯
Ali在劇集《踩過界》中變身豪放大法官,其實她以前出trip都已夠放,健康Bikini碎料啦!

01|當Model第一次 走勻全台灣影婚照(2005年)

12年前的Ali剛投身Model界(當年𡃁模呢個term仲未出現!),還未做有線主持,第一次同《新假期》出Trip,人生第一次的婚紗相就要走勻全台灣影。當年的妝髮造型今日睇起上來當然娘味十足,不過當年唔興過份的Photoshop、唔興假眼睫毛和大眼仔,Ali 靚樣同今時今日差唔多,證明靚樣真材實料啦!

李佳芯
影靚相彈性要高,見到條公路都可影一餐,Ali 一樣配合到。
李佳芯
李佳芯Ali首次為《新假期》拍封面,就穿起嫁衣!(307期|2005年7月出版)
李佳芯
當年仲興嘅Sammi式幼眉、無大眼仔、無粗黑眼線,天然無添加都已夠靚!

攀山涉水擺甫士

影過婚紗相的人就知,靚相一般在兩日內瘋狂影晒;Ali在拍攝期間要著住婚紗攀山涉水、公路狂奔:爬上台南的七股鹽山、在青青農場拍攝薰衣草和野花遍地的場景,忍受38度高溫及長期暴曬的折磨。

李佳芯
七股鹽山的鹽堅硬巉手,Ali著住婚紗爬上去影相都唔易。
李佳芯
以為影靚婚紗相好輕鬆? Ali踩住泥都一樣交足戲。

當年的記者憶述,拍攝當日台北天氣驟晴驟雨,拍攝團隊只好躲在車內,待雨停時Ali立刻跑出車影,影不到兩三張又下雨了,又要躲起來。如是者,跟天公玩足一整天躲貓貓。Ali都以專業態度面對,第一次出Trip,其實好難得!

李佳芯
拍攝時38度的高溫、又時晴時雨,Ali 坐埋一邊整理妝髮都無黑面。
李佳芯
呢張相Ali應該都唔想睇返!

翻閱2005年的陳年舊雜誌,當年記者好鍾意寫詩,而影相的攝影師亦好鍾意Model頭戴一大朵花(利申那位是台灣婚攝公司的攝影師)。

李佳芯
當年影相的台灣攝影師好鍾意在Model頭上戴上一大朵花。
李佳芯
去到墾丁海邊叫Ali同臨記「老公」耍親熱,絕無托手踭!

02|天寒地凍 沖繩追櫻(2007年1月)

為了向廣大的讀者報導日本的櫻花情報,《新假期》記者往往要帶同Model 提早出發。去完台南的1年半後,Ali跟《新假期》記者2007年1月出發到沖繩,在短短5日拍攝時間內要影櫻花、又要影海邊Resort。當年的記者指,那時候Ali已經是模特兒界的女神,但過程雖然辛苦捱凍,一樣好影無架子有交帶。

李佳芯
1月出發沖繩影櫻花,其實仍凍,但為咗封面靚,赤膊捱凍仲笑容燦爛!(390期|07年2月出版)
李佳芯
其實當時花期未到,只得間唔中有一、兩棵開了櫻花的樹,Ali獨個兒爬入山谷花叢扮晒全部花花世界,上山落水無怨言,工作態度一流。

春寒扮初夏 背心短裙頂硬上

1月的沖繩還是冬天,只有10度的低溫,但為了畫面好看,拍攝時全程要穿上春裝,背心短裙,女神一樣拍心口頂硬上,抵讚!

李佳芯
繼續是招牌燦爛笑容,邊個會估到Ali今時今日會做到咁奸嘅角色!
李佳芯
在櫻花祭中童真的一面,背後其實凍到震!

白滑背脊第一露!

要知道旅遊記者去一個Trip唔只返一隻稿,當年1月已經要去影Resort,你估下呢間無人曬太陽嘅Resort,當時有幾咁凍?就係咁,Ali首次露出了白滑背脊畀《新假期》同廣大讀者。

李佳芯
咪睇女神個靚背脊就以為影Resort 好爽,鏡頭背後不知幾凍!(396期|07年4月出版)
李佳芯
只可惜Ali的泳衣照唔多,而且張張都好Wide,旅遊雜誌嘛,睇景舒服重要過睇人啦,唔通張張相叫Model舉高手又踢腳咩?

Follow Ali to…

去到海邊resort,蔚藍海岸耍脾氣,時晴時雨,大風,陰陰涼,女神毫不扭擰,要著bikini落水永不say no。最正係去到海邊,攝影師為滿足親近女神欲望,情不自禁,影了一大堆拖住著得性感嘅Ali女神隻手踏浪的相呀,咦,拖手相,咪仲早過instagram手拖手遊世界的 #FollowMeTo情侶Murad Osmann!

李佳芯
放開個女仔!攝影師的拖女神相,係咪要畀嬲先?!
李佳芯
睇真啲當年雜誌個版面,Ali張相只係出咗手心咁大咋,仲細過同頁的豬頭!

03|無P圖!早過男神勇闖南極(07年11-12月)

翻查資料,當時的Ali未做主持,但當時在Model 界她都多見報,算搶手貨。原來女神仲早過洪永城兩年去南極拍攝(編按:洪永城在NowTV年代曾以幕後身份,與黃貫中前往南極拍攝《一個地球》),係咪威先!

李佳芯
好多人問張相係咪Key,當年《新假期》美術部主管確認,只得左邊放大嘅企鵝有做手腳,輯相真係去咗南極登岸影㗎!(435期|08年1月出版)
李佳芯
有相為證,真係有企鵝㗎南極!

辛苦捱到去極地

咪以為去極地就好爽皮,其實要坐足兩日半的飛機,由香港飛荷蘭落阿根廷,幾乎環遊全球,然後再捱30個鐘的船程⋯⋯聽到都想準備嘔吐袋。坐郵輪入南極,大浪到有如坐足兩日海盜船,而且南極天氣變幻莫測,能否如期登岸也需聽天由命。所以,女神每日就像飛虎隊般,隨時候命。

李佳芯
隨時候命!女神日日整裝待發出發影相都無怨言。
李佳芯
話說前往南極大風大浪,每日都嘔幾次,郵輪廁所的骰,女神高挑身型都要屈就下。
李佳芯
當年去南極的郵輪不是豪華郵輪,得上下格床,Ali都要影一餐!

自備企鵝拍Selfie

去南極當然想睇企鵝,但為保護牠們,規矩講明必須跟企鵝保持最少五米距離,以免影響企鵝的生活。唔知係咪女神太靚(定手上的企鵝公仔?),對人類已沒有戒心的企鵝們也會自動走近,又或乖乖站在附近任影唔嬲。

李佳芯
如果當年有IG,女神呢張相應該爆晒Like。
李佳芯
要坐雪地等企鵝埋位影相,Ali投入又無怨言!
李佳芯
影咗幾日,突然放晴,一聲令下再影,Ali保持專業即瞓落雪上。
李佳芯
據知登岸時Ali 忘記帶銀包,南極之行的紀念品大概只有postcard。

陰公!出場少過企鵝

揭返當年本雜誌,今次南極之旅Ali出場位主要在封面,文中幾乎只有冰山大相同企鵝相,當同船嘅大陸客都有full page赤祼照一大張,Ali只獲得細碎行行企企食飯典床版面,好在呢輯相出土了,否則政府圖書館都睇唔返!

李佳芯
Opening只得半身退地人。
李佳芯
企鵝都有一個Spread啦!

04|終極一脫 三點式玩斐濟(09年)

雖然Ali 沒有好似一般𡃁模出寫真集,平日出席大台活動都鮮有走性感路線,不過09年女神其實不介意健康性感,和《新假期》去斐濟時,就大曬Bikini +長腿。

李佳芯
去到斐濟陽光與海灘,封面無Bikini,但內裡有不少健康性感照。(519期|09年8月出版)
李佳芯
睇住靚景浸浴,當然夠晒歎。
李佳芯
望住包毛巾的女神,唔准心邪呀!
李佳芯
話說私人別墅的泳池足有270度的海景,靚人靚景!
李佳芯
極罕之長腿!

又到揭雜誌時間,斐濟出名陽光海灘,配上Ali同樣燦爛的笑容,你估下呢張拋花球青春少艾相出咗幾大版?

李佳芯
青春無敵的Ali,比現在多了份清澀感。
李佳芯
大家搵唔搵到Ali响邊呢?佢輸咗畀搽泥鬼妹!!!
李佳芯
不過睇返斐濟的稿,其實Ali出場已經多過之前去南極㗎喇!

05|跟水哥達人遊澳洲(09年7月)

2009年的Ali 已經成為有線主持,主持《體育王》,被網友追捧為「體育女王」,知名度已大大提升;《新假期》難得就到檔期邀請李佳芯去斐濟,同一個Trip順便Part埋飲食達人紀曉華Walter Kei,去埋澳洲塔斯曼尼亞歎世界食好西。

李佳芯
封面上Ali畀Walter勁搶戲!(517期|09年8月出版)
Ali 李佳芯
Ali 跟住紀曉華飲飲食食,仲學到不少下廚心得。
李佳芯
回到Ali未紅時,成個Trip都做水哥下把,一齊搞笑。
李佳芯
美食稿當然要影食嘢相!

當時去採訪的旅遊記者回憶,話說採訪塔斯曼尼亞東岸蠔場時,位處南半球的塔斯曼尼亞正入冬,到訪之時白天只有8-10℃,天寒地凍,Ali 和紀曉華都要著上「賣漁勝」裝束落水。咁嘅情況下正常人都會嗌凍,但當時人氣已不俗的Ali 毫無嗌辛苦怕凍的,震住都快手開工。

李佳芯
落水得幾度,女神笑容依然燦爛,襟撈!
李佳芯
咁大盤蠔勁抵食!
李佳芯
見到可愛的Tasmania Devil,Ali 都忍唔住露出可愛樣。
李佳芯
對住細路,攝影師要捉Ali自然神情話咁易。
李佳芯
入得廚房的Ali今次做了紀曉華的小助手。
李佳芯
Cooking class上Ali堅有幫手,唔係扮嘢影相等導演喊Cut㗎!

06|意大利慢食、揸靚車之行(08年5月)

跟住《新假期》出Trip,真係為女神帶來好多難忘的時刻,好似08年的意大利都靈、五漁村之旅,女神就連續兩星期登上《新假期》封面。

李佳芯
意大利五漁村的繽紛小屋,加埋女神食雪糕,靚!(455期|08年5月出版)
李佳芯
坐在經典中的經典Alfa Romeo Spider 1600老爺車之中,在意大利最美麗的托斯卡納(Tuscany)山地飛馳,羨慕死人!(456期|08年6月出版)

今次意大利之旅,Ali跟著記者採訪拍攝Alfa Romeo的四天古董車托斯卡納豪華自駕遊,當年都索價2千歐羅!不過坐在經典的Alfa Romeo Spider 1600老爺車,駛過一片片鮮黃油菜花田,穿梭於一字排開的柏樹之間,享受頭髮被風吹起的感覺⋯⋯好屈機呀!

李佳芯
意大利鄉郊靚景處處,有老爺車加俊男美女,輕易構成靚相。
李佳芯
呢個封面位加上香車和美人,絕配呀!
李佳芯
開車途中遇上羊群,造就成為當年的封面。
李佳芯
成隊Alfa Romeo老爺車車隊,就如皇帝出巡一樣,陣容強大,連當地人都覺得好奇。

意大利的五漁村(Cinque Terre)近年成為亞洲人的熱門之選,女神當年去到,除了學習地中海人悠閒步伐,在漁村影靚相,仲有機會大嚼當地海鮮同松露。

李佳芯
要知道旅遊記者出Trip無化妝隨團,咁近影大頭相,睇得出Ali幾乎零瑕疵!
李佳芯
出Trip成日面對住成櫃甜點、朱古力,女神都係Keep得咁好。
李佳芯
五漁村勁多靚景位,影足幾粒鍾Ali都保持專業!
李佳芯
都靈大教堂前的Ali 好搶眼。

將來還有什麼演唱會值得留意?

有不少歌手宣布舉辦演唱會,小編為你整合了2023香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

週末可以參觀博物館,例如太空館科學館香港藝術館M+香港文化博物館等,更為你整合行山路線野餐地點,絕對是假日消遣的必然之選!