花旦凋零 煞停婚事 35歲李佳芯誓搶視后!

最新娛聞

無綫花旦凋零的時代,屬於李佳芯的機會來了!年中《 BB來了》令李佳芯女神變人母,角色貼地入晒屋,被指是今年視后的大熱人選!勁敵只有《深宮計》的「太平公主」陳煒。李佳芯見形勢大好即出招迎戰,原本有意放慢腳步嫁ViuTV藝人男友陳炳銓的計劃,都決定煞停。李佳芯為表誠意搶視后,向無綫承諾短期內不婚不生B,劇接劇加上為公司不停吸金,靠拼搏精神跑贏一眾為結婚生仔放棄攀頂峰的花旦。下個月踏入36歲的李佳芯要盡地一煲,男友陳炳銓就要耐心等候喇!

撰文:東方新地|圖片:東方新地、Instagram、電視截圖

花旦凋零 煞停婚事 35歲李佳芯誓搶視后!

無綫近年陷小生花旦荒,除了請外援救收視外,同時亦要致力栽培新晉小生花旦上位,胡定欣與唐詩詠先後被捧上視后位置,前者刻意減產有意約滿向外闖,後者則人氣下滑,今年未見有代表作,其他有潛質花旦如王君馨、岑麗香及陳凱琳又急做人妻等生B,就連黃翠如都休假一年享受人生,造就朱晨麗及李佳芯齊齊上位,不過論搏殺程度,李佳芯絕對稱后!

時勢造花旦

據知Ali去年年尾做完卵巢手術,表示要睇淡名利,體會到冇健康就乜都做唔到,嗰段日子陳炳銓好照顧佢,即使要開劇很忙,但成日都做柴可夫車Ali出入。再加上拍《 BB來了》同啲小朋友日對夜對,Ali本身都鍾意小朋友,話晒佢都35歲,覺得係時候要計劃一下將來,佢之前同Danny傾過,想買個三房單位,等今年拍埋套《殺手》就停一停,好好籌備人生大事!

靠《BB來了》食糊

不過女人係善變嘅,近年無綫當家花旦走得就走,再唔係就結婚生仔,有指Ali見個勢唔同晒,知道係上位好時機,佢喺高層面前承諾短期內唔會結婚生仔住,拎埋視后會博多一段時間,Ali咁有決心,視后志在必得!加上佢近年成為最搵到錢花旦之一,出晒名唔揀擇易話為,深得經理人同客戶寵愛。雖然煒哥呼聲同民望都好高,但煒哥深知知自己的位置,亦冇Ali咁進取,加上又同無綫仲有長約,Ali今年冇十足都有九成把握!」

No.1 吸金女神

李佳芯近年人氣急升深受廣告客戶歡迎,各類代言工作與商場騷不斷,吸金力甚強的她大小通殺不會揀擇,已成為無綫花旦中搵錢之冠!

劇接劇博到盡

最強勁敵煒哥

無綫《萬千星輝頒獎典禮2018》將於12月16日舉行,李佳芯憑《BB來了 》惡鬥在《深宮計》飾演「太平公主」的陳煒,雖然有傳實力非凡的煒哥有高層力撐,但李佳芯的演出深得觀眾喜愛,再加上煞停婚事誠意可嘉,煒哥睇嚟都要讓路!

 

李佳芯:「有票都會投自己!」

李佳芯挾住強勁人氣,今年連拍兩部劇集《白色強人》及 《殺手》,在《殺手》中她再度挑戰演技,飾演一名育有11歲兒子兼有歷練的師奶。女神在劇中再加轉Look,爆炸頭配粗框眼鏡,繼續靠演技取悅觀眾。對於今年有機會以大熱姿態問鼎視后,Ali早前公開表示:「今年難度真係高咗好多,但我對自己有信心,如果有票我都會投自己。而且媽咪都有讚我表現得好,佢從來都未試過讚我,佢係師奶嘅代表,如果佢都鍾意,證明觀眾都好喜歡。」

另外講到陳煒是最大勁敵,李佳芯就話:「唔可以話係勁敵嘅,我都有睇佢做太平公主,佢平時個人好好,但做奸角好出色,我好欣賞佢!我未同煒哥合作過,我哋大家都係做好自己。」

《深宮計》煒哥同樣大熱

無綫花旦買少見少,造就李佳芯上位爭視后,而加盟無綫六年的煒哥亦成為大熱之選。煒哥是不少金牌監製愛將,由配角做起的她,曾憑《梟雄》及《火線下的江湖大佬》提名視后,實力毋庸置疑,今年在《 宮心計2深宮計 》演霸氣「太平公主」,演技更大爆發,在《果欄中的江湖大嫂》亦擔正女一,獲網民推舉為「民間視后」,連無綫行政總裁李寶安都睇好她,是李佳芯唯一勁敵。

男友落寞買麵

如無意外,兩個月後李佳芯就升呢做視后,為了上位把說好的婚事煞停,與男友陳炳銓距離再被拉遠,事業心重的她工作忙難免冷落男友,近月再無見二人恩愛拍拖公開露面,陳炳銓的IG全是男人與狗的世界,閒時帶愛犬去行山,更苦悶到影空凳暗示自己在等人。本刊記者亦多次影到陳炳銓獨自離開與李佳芯同居的將軍澳愛巢,到附近買麵醫肚。

儲錢搵樓趕上車

李佳芯與陳炳銓拍拖已四年,雖然遇上不少阻力但仍意志堅定,愛得義無反顧。據知Ali更是用心良苦,希望趁呢幾年搵多啲,可以快啲買到層樓做安樂窩。佢之前同Danny放風想搵西貢同將軍澳一帶嘅村屋同私人屋苑單位,不過仍未睇啱心水。李佳芯曾表示希望 買個風水好及有升值潛力的單位,仲話揀樓同揀老公一樣,希望自己工作同感情都穩步上揚有升值潛力。李佳芯有樣又食腦,搶完視后再做人妻都未遲啦!

讀者留言