李克勤 盧淑儀 全天候行孖咇

講過N次都係要再講,點解拍拖加結婚25年都可以咁恩愛呢?模範夫妻嚟講,娛樂圈當中李克勤、盧淑儀都算係數一數二!早排去到中環,一見用屋企一對大小老闆名做車牌的保母車,就知呢對夫妻又出街拍拖,果然一落車就拖到實,克勤仲要先行一步,幫老婆睇好無車先至過馬路。

撰文:東方新地|圖片:新傳媒圖片庫、李克勤FB

李克勤 拉大隊食天婦羅

原來李克勤、盧淑儀兩公婆當日約咗浦儀眼鏡老闆邱子傑同老婆邱李茂琪去威靈頓街食天婦羅,同行仲有譚詠麟同彭建新,話說間餐廳新開唔夠一年,專攻精緻日本菜,普通一個餐都閒閒哋過千蚊,不過呢個價對呢班食家嚟講,濕濕碎啦!

留意番,點解會係呢班人聚腳飯局,食足兩粒鐘臨走仲企喺街頭傾唔停呢?查實邱子傑同老婆邱李茂琪同李克勤、阿倫相識多年,左鄰右里演唱會都有份贊助,邱李茂琪仲係盧淑儀閨蜜,成日一齊high tea、shopping、過生日!話時話,點解個局唔見閨蜜另一位成員李嘉欣呢?

讀者留言