李國麟

李國麟拖女兒晒愛:個女拍拖我會呷醋!

TVB「綠葉王」李國麟 在《溏心風暴3》中,對劇中寶貝女岑麗香錫到燶,而現實生活中,李國麟一樣當15歲女兒Cherie如珠如寶!猶記得七月女兒生日時,佢因為po了一張同女兒的親嘴相,引起網民爭議,不過,面對網民攻擊仍無阻父女繼續晒愛!早前李國麟同女兒著住父女裝,在將軍澳商場出巡,拖住手逛街睇嘢,吃飯時更非常有愛,互餵對方分甘同味,父女全程表現Sweet,難怪李國麟接受訪問時都話:「個女拍拖我會呷醋!」

李國麟咀女兒惹非議

62歲TVB「綠葉王 」李國麟,近日在《溏心風暴3》中,演曾救夏雨一命的恩公,劇中更有個寶貝女岑麗香,二人有不少父女內心戲,交織出不少火花;跳出角色,李國麟對自己15歲女兒Cherie一樣錫到燶,由細到大女兒亦視父親為偶像。不過今年七月時,佢因為上載同女兒慶生的親吻照,就引來網民爭議!

因為一張同囡囡慶生的親吻相,引發網民爭議,李國麟就充滿正能量表示:趁機同佢上一課,每個人有唔同睇法!

 

而當時Cherie亦留言撐爸爸:「女兒親爸爸,一個傳達愛意的舉動,在我眼裡,我看見滿屏都是父愛,在你們眼裡,卻想到亂倫。一個發自親情的吻卻被人們說得如此低俗,我真的感到很可笑。」

 

自細鍾意黐爸爸的Cherie,開心就攬住爸爸錫,兩父女相處時刻都充滿愛。

李國麟拖女兒晒愛

早前李國麟返TVB開工前,就先揸車同女兒去電視城附近的將軍澳一商場逛街,李國麟泊低車後,兩父女就手拖手行街睇嘢,15歲的Cherie差不多有爸爸咁高,雖然還有些Baby fat ,但束起髮髻的她輪廓鮮明,更有點像無綫女藝人江嘉敏。李國麟大部分時間都係陪睇,陪女兒睇完首飾又睇手錶,完全將阿女放第一位!

李國麟囡囡Cherie,已經去到爸爸眼眉咁高,當日兩父女著晒父女裝拖手行街,真係好Sweet!

 

當然唔少得selfie一番!

 

Cherie睇手機,李國麟從後探頭睇埋一份,唔通係緊張女兒有人追?

兩父女撐枱腳餵嘢食

行到攰,兩人在商場地下的Cafe開餐,兩父女黐到實出去揀嘢食,李國麟就交由女兒負責點餐俾錢,自己就先去搵位坐;開餐期間,點了沙律的囡囡,不時餵爸爸食車厘茄,爸爸又將自己吃的牛角包切開,餵埋入口俾女兒吃,兩父女感情好到不得了!

咗沙律的Cherie,不時餵爹哋吃車厘茄,爸爸亦切開牛角包餵番囡囡,兩父女乜都分甘同味!

 

李國麟對女兒無微不至!吃飽後,仲幫囡囡抹嘴。

父女情深

吃飽後,李國麟見仲有時間,就陪女兒到公園散步,都話女兒是爸爸前世情人,見李國麟望實女兒已經冧爆,全程慈父上身,不停用手機幫女兒影相,Cherie又突然搭住爸爸行,兩人一路行一路傾,更不時笑到咔咔聲。

每位爸爸總想留住女兒成長片段,李國麟都唔例外!

 

李國麟:「個女拍拖我會呷醋!」

15歲的Cherie,剛升上F4,自小受父親演戲薰陶,對演藝深感興趣,對娛樂圈亦充滿好奇。不過李國麟就叫女兒諗清楚先,始終娛樂圈好複雜,唔係話努力就會成功!但佢表示唔會阻止女兒,會將自己的經驗同佢分析。

 

李國麟又稱Cherie細細個時咩都會同自己講,但女兒慢慢長大又進入反叛期,呢年幾已經唔似以前咁無所不談。問到Cherie有冇拍拖,李國麟就話現時未有,但就話如果女兒第時拍拖,自己真係會呷醋!