李日昇

李日昇《棟仁》演自閉青年獲讚 入行20年默默耕耘

無綫劇《棟仁的時光》就快大結局,其實劇中主角袁偉豪及唐詩詠發揮只屬中規中矩,反而配角幾突出,除了趙希洛備受讚賞外,飾演自閉青年「阿正」的李日昇亦得到觀眾留意!李日昇6歲開始演藝生涯,默默耕耘20年,今次繼《城寨英雄》「小智」後再有角色跑出,希望佢將來有更多演出機會,遇到一個令佢上位爆出的角色啦!

撰文:東方新地|圖片:劇集截圖、劇照、Facebook

李日昇演自閉青年獲讚

在《棟仁的時光》中,除了趙希洛飾演刻薄上司Emma姐入型入格,備受讚賞,其實劇中演其弟弟的李日昇都相當不俗!李日昇的角色「阿正」係一名自閉青年,李日昇演得入木三而不造作,呆得討好!早前一集佢被袁偉豪強吻後暈倒,繼而出事!

暈倒醒來的李日昇夢遊出走,無意識地行出馬路,結果被車撞倒昏迷!

童星出身 入行20年

今年26歲的李日昇,年紀輕輕,但其實佢當童星出身,6歲起開始參與演藝工作,不經不覺入行20年!多年來李日昇拍過多部劇集和電影,同過唔少紅星藝人合作,講資歷的話其實係老前輩!

獲杜Sir欣賞

李日昇雖然現時喺無綫多演出一啲小角色,但其實佢多年來參與唔少大製作,小時候就係大導演杜琪峯愛將,演出過《黑社會》、《神探》及《文雀》等作品。

李日昇
李日昇拍《黑社會》時與影帝任達華有唔少對手戲
劉德華、甄子丹主演的《追龍》,亦見到李日昇

《城寨英雄》的小智

其實早喺2016年的《城寨英雄》中,李日昇都飾演過有特殊問題的角色,演出弱能人士「小智」。劇中的小智純品又善良,而且正直勇敢,而「強者是為了保護弱者」為宗旨,可惜最後為拯救師叔(何啟南飾) 慘被炸死,令人心酸。

要多謝黃浩然

雖然入行多年,但李日昇的演藝生涯未算理想,更曾經有一段時間放棄演員夢去投考消防員。直至有一次佢喺TVB劇《愛我請留言》飾演年輕版黃浩然,佢向黃浩然透露想放棄後,對方同佢講:「不如你去考訓練班啦,嗰度多一啲機會」李日昇早年接受訪問時,直言黃浩然呢句話令佢重燃希望!

熱愛運動狂操肌

現實中,李日昇並非如劇中小智或阿正咁潺仔!其實佢熱愛運動,一得閒就狂做gym,操出一身結實肌肉,40吋胸肌真係好吸睛!