李璨琛

李璨琛 喪飲唔收斂 醉駕激嬲孕妻

15年因為夜蒲醉酒攬女搞到婚姻一度亮紅燈,但李璨琛仍未肯修心養性,年初五(2月20日)又因醉駕被捕惹官非,再次激嬲老婆。原來42歲李璨琛將做狗年老竇,老婆Pae(梁志瑩)已經陀B八個多月,本來是開心事,不過,快為人父的他依然唔定性,經常夜蒲喪飲,今次又飲醉出事,令粗身大細的李太要為他憂心!

撰文:東方新地

圖片:新傳媒圖片庫、李璨琛IG

李璨琛 飲醉就失控

年初四晚,李璨琛同廿四味一班兄弟團拜,男人聚埋飲番兩杯都好平常,不過,政府都忠告市民,飲咗酒千祈唔好揸車,偏偏李璨琛身為藝人未有以身作則,當晚同班兄弟飲天光,早上七時多還自己駕車返家,途經九龍城就被交通警截查,「吹波波」超晒標被捕,案件現交由東九龍總區交通部跟進。電影經常演問題青年的李璨琛,在圈中浮沉二十多年經常衝動鬧事,有報道指他試過醉酒打人又試過飲醉攬女,今次新年流流竟醉駕被捕。

李璨琛
日前,李璨琛陪住大肚老婆到大坑吃午飯,食飽飽再送老婆返銅鑼灣時裝店。難得兩人步出餐廳,動作一致喺度撩牙,夫妻同步。
李璨琛
兩公婆吃完午 餐,李璨琛緊張搭實老婆膊頭,一齊行去附近攞車。

據知情人士透露:「阿Sam(李璨琛)咁多年嚟都好鍾意飲酒,每次飲醉酒就失控又躁狂,飲到啤啤夫都唔知試過幾多次,阿Pae(梁志瑩)點會唔擔心吖!兩年前,阿Sam夜蒲飲醉攬女,啲相見晒報,搞到老婆好冇面,但佢解釋話當時自己斷晒片,阿Pae都原諒佢,但依家年紀唔細,阿Pae成日勸佢戒酒,要顧住身體,每次講完佢係飲少咗,但冇耐又故態復萌,阿Pae都冇晒佢辦法!」

李璨琛太太
李璨琛太太Pae陀B唔想咁張揚,著大褸仲刻意用個大袋遮肚。
李璨琛太太
但側面睇,李璨琛太太其實孕味已經好濃。

承諾會戒酒

李太如此憂心,事關42歲李璨琛將做狗年老竇,屋企快多個新成員,真係一家大細將來靠晒佢。知情者透露:「阿Pae好鍾意小朋友,知道有咗之後佢兩公婆不知幾開心,Sam仲承諾會戒酒,冇諗過佢會咁唔生性,飲醉仲揸車,上個月阿娘(梁漢文)因為醉駕撞車,身邊成班朋友都話佢!當時阿Sam都有講話,點都好,但飲酒就唔應該揸車啦!點知呢頭講完唔夠一個月,自己又醉駕出事!」

李璨琛太太
去年造人成功,低調陀B八個月的李璨琛太太,個肚亦有番咁上下份量。
李璨琛
為咗迎接BB來臨,李璨琛早前去上育嬰班,學習幫BB沖涼換片,為屋企未來新成員做足準備。
李璨琛
年初五(2月20日)早上七時,李璨琛在九龍城醉駕被捕,原來出事前約了廿四味成員團拜飲咗唔少酒,相中的他更飲到面都紅晒。

幸好今次只係「吹波波」超標,未有發生交通意外,話晒就快做老竇,李璨琛真係要生生性性做人,唔好要老婆大住個肚仲為佢操心!

李璨琛
李璨琛同陳奕迅飯局,亦杯不離手,例必飲兩杯。
李璨琛
快將做人父母,剛過去的情人節亦別具意義,李璨琛老婆都在lG幸福放閃,話老公開心到反晒眼。
李璨琛
李璨琛趁著農曆新年唔使開工,不停搞新春聚會,年初三赤口,就與大班好友團拜,大肚李太抱住小女孩更母愛氾濫,笑到見牙唔見眼。本來新正頭一家人好開心,點知年初五就出事,相信李太再笑唔出。