【深宮計】宮女飛上枝頭做闊太 大肚李美慧 含淚嫁富商曾文豪
一對新人昨日在淺水灣酒店行禮及簽紙註冊，新娘子宣讀誓詞時眼濕濕，好感動⋯
撰文：東方新地｜圖片：新傳媒圖片庫、李美慧IG
大肚李美慧 爆喊嫁富商曾文豪
完婚後，一對新人接受傳媒訪問，新娘子李美慧開心話：「我哋儀式同普通新人一樣。」曾文豪接住話：「換衫，化妝，嚟到招呼朋友、簽紙。之前講話落雨，好彩今日天氣好好。」再婚兼有三名女兒的曾文豪表示自己嘅仔女有到場觀禮，因為儀式簡約，無安排啲孫做花仔：「兩個女外孫，同一個男外孫都有到齊。」
新娘子講到出嫁心情：「想令自己攰啲，所以出海游水游咗一個晏畫，但夜晚都係成晚瞓唔着，到依家都未瞓過。（心情係咪好興奮）唔知興奮定緊張，驚啲嘢安排得唔好，好多謝老公。不過頭先台上致辭時，腦中一片空白，唔知自己想講咩。」老公即刻話：「我都有好多嘢想講，怕overrun冇講。」
問李美慧幾時正式停工養胎？佢就話8月前會完成所有工作。老公有冇叫結咗婚之後唔好做嘢？曾文豪搶住答：「唔會，佢鍾意就得。」李美慧聽到個樣勁冧，挨實老公然後話：「我老公好好。」新娘着住束身腰間透視婚紗，無花誇裝飾，戴住條珍珠頸鍊，手上戴上鑽戒，簡約好睇。
開門利是 金牛成寸厚
郭千瑜受訪時，就喺個袋度拎出封開門利是，見到全部係1千蚊紙，仲有成寸咁厚，楊埕大讚新郎：「男家好大方，女方嫁得好，Peter（曾文豪）份人好好，乜都OK。今朝其中一個玩新郎環節，要喺尿片食啲嘢，本來唔使佢食，但佢都搶住食，仲話好肚餓，所以啲遊戲難唔到佢哋，兄弟團個個又好有義氣，做唔到嘅環節都會畀利是，唔會托手㬹。」
陸詩韻是姊妹團成員之一，而準新郎曾文豪弟弟曾文能是其舊愛，問陸詩韻到時會唔會撞到曾文能覺得尷尬，佢大方話：「唔會，我哋有聯絡，有時都會食飯gathering，唔會尷尬，同Auntie都熟。」
當中姊妹團全部都係李美慧喺演藝圈中好友，包括陸詩韻、楊埕、郭千瑜同梁麗瑩等，而陳展鵬、李民橋夫婦、許晉亨、陳志健、楊卓娜、楊明等好友都有出席觀禮！
李美慧 感動爆喊
在較早前的《深宮計》活動中，馬浚偉代表劇組向李美慧送上鮮花恭賀佢下月結婚，仲送上全部演員簽名賀卡，令李美慧即場感動爆喊，馬浚偉更表示：「美慧係個好女仔，喺橫店拍嘢撞見流浪狗，佢會捉佢哋去睇醫生、沖涼，之後又返去睇小狗！」但當一班演員開始玩遊戲時，馬浚偉忽然爆響口：「你粗身大細呀！小心啲！」洩露李美慧雙喜臨門！
問到李美慧係咪有喜，佢就話：「唔講得住！」至於婚後係咪要等生完B休息一年先再做嘢？佢話會睇自己到時嘅身體狀況先決定。
繼女曾昭儀環保轉贈BB衫
而李美慧嘅未來繼女曾昭儀日前出席活動，就直認早知李美慧有喜，亦有心理準備再做家姐，育有一女嘅佢直言會同繼母分享湊女經，以及建議對方食維他命增強營養，更表示：「到時我都會畀啲小朋友衫BB著，床方面都會借畀佢哋，環保啲，唔好浪費！」
Natalie Chan Kwok 曾昭怡（@mammachewy）分享的貼文 於 張貼
李美慧 細未婚夫25歲
31歲嘅李美慧下月就正式嫁畀大佢25年、已故百億富豪曾紀華二房長子曾文豪，會先喺淺水灣酒店搞結婚派對，7月會到法國尼斯再擺酒。
李美慧同未婚夫上個月仲去咗不丹、喜馬拉雅山影婚照㖭。李美慧透露同未婚年係朋友介紹認識，拍咗半年拖左右就決定訂終身。
李美慧同未婚年嘅細女曾昭亮同年，未婚夫大女曾昭怡比佢更大一年，睇佢啲相就知一早融入家中，而兩個繼女亦有陪同一齊去不丹影婚照，相信都好接受呢個繼母！
李美慧 曾演多套電視劇
現年31歲的李美慧，真名李斯庭，於2006年曾參選港姐，可惜三甲不入。其後加入無綫藝員訓練班，曾做過遊戲節目《一擲千金》的千金小姐，又擔任TVB8主持《娛樂最前綫》，曾參演過多套電視劇，但最為人認識的是於《少年四大名捕》中飾演馬國明的妹妹、《宮心計》等。
大讚男方夠成熟
李美慧被問到男方有何吸引之處時，她就指對方是個成熟型暖男，對她及其屋企人亦很好。當時被問到會否生小朋友，她則說：「都會努力造人，男女冇所謂，因為佢都已經有仔女。」
婚後繼續工作
而婚後會否繼續拍劇？她說：「都會客串吓拍劇，同埋做有關動物嘅義工，又會想搞生意但未計劃，到時老公一定會幫手，不過我都會諗清楚都，唔想蝕佢本。」
曾文豪有女又有孫
據了解，曾文豪年前已離婚，而他亦已有兩名女兒曾昭怡（Alison）及曾昭亮（Natalie），亦都已經做咗人爺爺，兩名女兒同樣活躍於社交圈。
