杜如風

杜如風帶團被插搵笨 萬四蚊坐廉航行程趕到甩轆

旅遊節目主持人杜如風拍咗一系列乜乜攻略旅遊節目後,即有旅行社搵上門叫佢帶團,仲聲稱以親民價$13,888遊九州四日,之不過畀皮幾嘢要人坐廉航仲要早機去早機返,三日內玩晒成個九州係咩玩法?

撰文:東方新地

圖片:縱橫遊

杜如風帶團 坐廉航早機返

杜如風最近落力宣傳嚟緊復活節將會親自帶團到九州玩四日三夜,未計附加費齋團費盛惠萬四蚊,有得食有得玩仲有明星睇皮幾嘢似乎幾合理,不過有網民望真啲就發覺唔多對路囉!首先畀皮幾嘢要人坐廉航HK Express,除時delay嘥你半日都夠慘,仲要寫明11點45分飛機返港,即係朝早9點就要仆到機場,四日行程變相得番三日,好蝕抵啫!

杜如風
跟杜如風去日本玩盛惠萬四蚊,抵唔抵則見人見智。
杜如風
旅行社行程話四日三夜,但早機去早機返實情得番三日玩囉!
杜如風
有網民質疑畀皮幾嘢團費仲要坐廉航,似乎食水幾深。
杜如風
匆匆三日行程由熊本去福崗,由南到北坐足幾粒鐘長途車,最後又要返熊本坐機返港,三日真係玩得晒成個九州?

趕頭趕命

餘下三日行程又點樣走?首先day 1直飛熊本行街觀光,夜晚就要坐2粒鐘JR到福崗,搭完機仲要捱長途車,攰到爆!第二日又坐2粒鐘車去由布院睇貓頭鷹兼去參觀神社,第三日又再返熊本睇海豚,第四日晨咁早就撇,行程平平無奇唔在講,趕到甩轆至攞命,玩得咁辛苦為乜?

杜如風
太宰府
杜如風
行程安排去太宰府神社、城下懷舊古街、KUMAMON廣場,呢啲地方唔使人帶都識去。

除時甩底

重點係sell杜小姐帶團,但行程表列明「若杜如風小姐因個人身體狀況或其他不能預見因素導致未能隨團,客人不能藉此退出,敬請見諒」及「杜如風小姐每日隨團之時間,以當日安排為準」,換言之如果杜如風no show冇得追究,每日隨團亮相幾耐佢話事,就算見得十分鐘你都吹佢唔脹,各位團友又點睇先?

杜如風
杜如風話自己每次出埠都大出血,但今次呢團去睇貓頭鷹、海豚,未見有捐窿捐罅去shopping。
杜如風
跟得杜如風梗係要潮買、潮食,坐遊艇賞海豚會唔會悶咗啲呢?!
杜如風
有網民認為呢個星級團定喺3月29日玩到4月1日走,賞櫻花時間尚早,分分鐘櫻花都未開。
杜如風
呢個團重點係有杜如風,但行程列明如果佢有咩頭暈身㷫可以除時甩底,帶團時間長短都由當事人話事,有網民話驚佢say個hi就走,都吹佢唔脹!

 

杜如風
呢個就係今次杜如風帶嘅鴨仔團行程表,大家不妨參考吓!

延伸閱讀:流感肆虐 黃浩然囝囝都中招

關鍵詞
杜如風